1. Եւ չոգաւ արքայ Ռոբովամ ի Սիկիմ. զի ի Սիկիմ գայր ամենայն Իսրայէլ թագաւորեցուցանել զնա:
2. Եւ եղեւ իբրեւ լուաւ Յերոբովամ որդի Նաբատայ, եւ ինքն էր տակաւին յԵգիպտոս յորմէ հետէ փախեաւ յերեսաց արքայի Սողոմոնի, եւ դարձաւ Յերոբովամ յԵգիպտոսէ.
3. եւ առաքեցին եւ կոչեցին զնա: Եւ եկն Յերոբովամ եւ ամենայն եկեղեցին Իսրայէլի. եւ խաւսեցաւ ամենայն ժողովուրդն ընդ արքայի Ռոբովամայ` եւ ասեն.
4. Հայր քո ծանրացոյց զանուր մեր, եւ դու թեթեւացո ի խիստ ծանրութենէ հաւր քոյ, եւ ի ծանր անրոյ նորա զոր ետ ի վերայ մեր. եւ ծառայեսցուք քեզ:
5. Եւ ասէ ցնոսա. Երթայք մինչչեւ ցերիս աւուրս, եւ դարձջիք առ իս: եւ գնացին:
6. Եւ խորհեցաւ արքայ Ռոբովամ ընդ ծերսն որ կային առաջի Սողոմոնի հաւր նորա մինչդեռ կենդանի էր, եւ ասէ. Զիա՞րդ խորհիք` եւ տացուք պատասխանի ընդ ժողովրդեանն:
7. Եւ խաւսեցան ընդ նմա` եւ ասեն. Եթէ յաւուր յայսմիկ լինիցիս ծառայ ժողովրդեանն այնմիկ` եւ ծառայեսցես նոցա, եւ անսասցես նոցա, եւ խաւսեսցիս ընդ նոսա բանս բարիս, եղիցին քեզ ծառայք զամենայն աւուրս:
8. Եւ եթող զխորհուրդ ծերոցն զոր խորհեցաւ ընդ նոսա, եւ խորհեցաւ ընդ մանկտին սնընդակիցս իւր` որ կային առաջի նորա.
9. եւ ասէ ցնոսա. Զի՞նչ տայք խրատ, եւ տաց պատասխանի ժողովրդեանն` որ խաւսեցան ընդ իս եւ ասեն. թեթեւացո յանրոյն` զոր ետ հայր քո ի վերայ մեր:
10. Եւ խաւսեցան ընդ նմա մանկտին սնընդակիցք իւր որ կային առաջի նորա` եւ ասեն. Այսպէս խաւսեսցիս յականջս ժողովրդեանն` որ խաւսեցան ընդ քեզ եւ ասեն, հայր քո ծանրացոյց զանուր մեր` եւ դու թեթեւացո ի մէնջ. այսպէս խաւսեսցիս ընդ նոսա. Ծկոյթ իմ ստուար է քան զմէջ հաւր իմոյ.
11. եւ արդ` հայր իմ եդ ի վերայ ձեր անուր ծանր, եւ ես յաւելից յանուրն ձեր. հայր իմ խրատեաց զձեզ գանիւք` եւ ես խրատեցից ձեզ քըքովք:
12. Եւ եկն ամենայն Իսրայէլ առ արքայ Ռոբովամ յաւուրն երրորդի` որպէս խաւսեցաւ ընդ նոսա արքայ եւ ասէ. Դարձջիք առ իս յաւուրն երրորդի:
13. Եւ պատասխանի ետ արքայ ժողովրդեանն խստութեամբ. եւ եթող Ռոբովամ զխորհուրդս ծերոցն զոր խորհեցան ընդ նմա,
14. եւ խաւսեցաւ ընդ նոսա ըստ խորհրդեան մանկտւոյն` եւ ասէ. Հայր իմ ծանրացոյց զանուր ձեր, եւ ես յաւելից յանուր ձեր. հայր իմ խրատէր զձեզ գանիւք, եւ ես խրատեցից զձեզ քըքովք:
15. Եւ ոչ լուաւ արքայ ժողովրդեանն, զի էր խոտորումն ի Տեառնէ. զի հաստատեսցէ Տէր զբան իւր զոր խաւսեցաւ ի ձեռն Աքիայ Սիլովնացւոյ, վասն Յերոբովամայ որդւոյ Նաբատայ:
16. Իբրեւ տեսին ամենայն Իսրայէլ` եթէ ոչ լուաւ նոցա արքայ. պատասխանի ետ ժողովուրդն արքայի եւ ասէ. Զի՞նչ բաժին կայ մեր ընդ Դաւթի. եւ ոչ գոյ մեր ժառանգութիւն ընդ որդւոյ Յեսսեայ. պնդեաց ի բնակութիւնս քո Իսրայէլ: եւ արդ` դու արածեա զտունն Դաւթի: եւ գնաց Իսրայէլ ի բնակութիւնս իւր:
17. եւ որդւոցն Իսրայէլի որ նստէին ի քաղաքս Յուդայ` թագաւորեաց Ռոբովամ:
18. Եւ առաքեաց արքայ Ռոբովամ զԱդոնիրամ հարկապետ` եւ քարկոծեցին զնա ամենայն Իսրայէլ քարամբք` եւ մեռաւ. եւ արքայ Ռոբովամ աճապարեաց ելանել ի կառս իւր եւ փախչել յԵրուսաղէմ:
19. եւ արհամարհեաց Իսրայէլ զտունն Դաւթի մինչչեւ ցայսաւր:
20. Եւ եղեւ իբրեւ լուաւ ամենայն Իսրայէլ եթէ դարձաւ Յերոբովամ, առաքեցին եւ կոչեցին զնա ամենայն ժողովուրդն, եւ թագաւորեցուցին զնա ի վերայ Իսրայէլի. եւ ոչ ոք էր զկնի տանն Դաւթի, բայց միայն ի գաւազանէ տանն Յուդայ եւ Բենիամինի:
21. Եւ Ռոբովամ եմուտ յԵրուսաղէմ, եւ եկեղեցացոյց զժողովուրդն Յուդայ եւ զգաւազանն Բենիամինի` հարիւր եւ ութսուն հազար երիտասարդաց պատերազմողաց` պատերազմել ընդ տանն Իսրայէլի, դարձուցանել զթագաւորութիւնն Ռոբովամայ որդւոյ Սողոմոնի:
22. Եւ եղեւ բան Տեառն առ Սամեա այր Աստուծոյ` եւ ասէ.
23. Խաւսեաց ընդ Ռոբովամայ որդւոյ Սողոմոնի արքայի Յուդայ, եւ ընդ ամենայն տանն Յուդայ եւ Բենիամինի, եւ ընդ մնացորդս ժողովրդեանն` եւ ասասցես:
24. Այսպէս ասէ Տէր. մի ելանէք եւ մի տայցէք պատերազմ ընդ եղբարս ձեր ընդ որդիսն Իսրայէլի, դարձցի իւրաքանչիւր ոք ի տուն իւր, զի յինէն եղեւ բանն այն: եւ լուան բանի Տեառն, եւ դադարեցին յերթալոյ ըստ բանին Տեառն:
25. Եւ շինեաց Յերոբովամ զՍիկիմ ի լերինն Եփրեմայ` եւ բնակէր ի նմա: եւ ել անտի եւ շինեաց զՓանուէլ:
26. Եւ ասէ Յերոբովամ ի սրտի իւրում. Ահա արդ` դառնայցէ թագաւորութիւնս իմ ի տունն Դաւթի,
27. եթէ ելանիցէ ժողովուրդս զոհել զոհս ի տան Տեառն յԵրուսաղէմ. եւ դառնայցէ սիրտ ժողովրդեանս այսորիկ առ Տէր, եւ առ Տէր իւրեանց Ռոբովամ արքայ Յուդայ. եւ սպանանիցեն զիս, եւ դառնայցեն առ Ռոբովամ արքայ Յուդայ:
28. Եւ խորհեցաւ արքայ, եւ չոգաւ արար երկուս երինջս ոսկիս. եւ ասէ ցժողովուրդն. Շատ լիցի ձեզ ելանել յԵրուսաղէմ. ահա աստուածք քո Իսրայէլ` որ հանին զքեզ յերկրէն Եգիպտացւոց:
29. եւ եդ զմին ի Դան` եւ զմեւսն ի Բեթէլ:
30. Եւ եղեւ բանն այն ի մեղս. եւ երթայր ժողովուրդն առաջի երեսաց միոյն մինչչեւ ցԴան:
31. եւ արար տաւնս ի վերայ բարձանց. եւ արար քուրմս զմասն ինչ ժողովրդեանն որ ոչ էին ի տանց Ղեւեայ:
32. Եւ արար Յերոբովամ տաւն յամսեանն ութերորդի` յաւուր հնգետասաներորդի նորին ամսոյ` ըստ տաւնին որ յերկրին Յուդայ, եւ ել ի սեղանն զոր արար ի Բեթէլ` զոհել երնջոցն զոր արար: Եւ կացոյց ի Բեթէլ քուրմս բարձանցն զոր արար:
33. եւ ել ի սեղանն զոր արար ի Բեթէլ, որ աւր հնգետասան էր ամսոյն ութերորդի տաւնին: ստեղծ ի սրտէ իւրմէ. եւ արար տաւնս որդւոցն Իսրայէլի: ել ի սեղանն զոհել:
Հաղորդում կայքում սխալի վերաբերյալ
Տվյալ հատվածում առկա է սխալ: