1. Եւ եղեւ յետ աւուրց բազմաց` եւ բան Տեառն եղեւ առ Եղիա յամին երրորդի, եւ ասէ. Երթ եւ երեւեաց Աքաաբու. եւ տաց անձրեւ ի վերայ երեսաց երկրի:
2. եւ չոգաւ Եղիա երեւել Աքաաբու: եւ սով սաստիկ էր ի Սամարիա:
3. Եւ կոչեաց Աքաաբ զԱբդիու զհազարապետ իւր. եւ Աբդիու երկիւղած էր ի Տեառնէ յոյժ:
4. եւ եղեւ ի կոտորել Յեզաբելայ զմարգարէսն Տեառն, եւ առ Աբդիու հարիւր այր մարգարէ, եւ թաքոյց զնոսա յիսուն յիսուն յայրի` եւ կերակրեաց զնոսա հացիւ եւ ջրով:
5. Եւ ասէ արքայ ցԱբդիու. Եկ շրջեսցուք ընդ երկիրդ առ ամենայն աղբերբք ջրոց եւ առ հեղեղատաւք, թերեւս գտցուք խոտ եւ ապրեցուսցուք զձիս եւ զջորիս, եւ ոչ սատակեսցին յանասնոց:
6. եւ բաժանեաց իւրեանց զճանապարհն շրջել. Աքաաբ գնաց ընդ մի ճանապարհ միայն, եւ Աբդիու գնաց ընդ այլ ճանապարհ միայն:
7. Եւ էր Աբդիու ի ճանապարհին. եւ եկն ել Եղիա ընդ առաջ նորա միայն, եւ աճապարեաց Աբդիու, անկաւ ի վերայ երեսաց իւրոց` եւ ասէ. Եթէ դո՞ւ իցես տէր իմ Եղիա:
8. եւ ասէ Եղիա. Ես եմ: երթ ասա ցտէր քո` թէ ահաւասիկ Եղիա:
9. Եւ ասէ Աբդիու. Զի՞նչ մեղայ, զի մատնես զծառայս քո ի ձեռս Աքաաբու սպանանել զիս.
10. կենդանի է տէր Աստուած քո, եթէ իցէ ազգ կամ թագաւորութիւն ուր ոչ առաքեաց Տէր իմ խնդրել զքեզ. եւ ասեն թէ չէ ուրեք. եւ այրեաց զթագաւորութիւնն եւ զաշխարհ նորա զի ոչ եգիտ զքեզ:
11. Եւ արդ` դու ասես, թէ երթ եւ պատմեա տեառն քում թէ ահաւասիկ Եղիա:
12. եւ եղիցի թէ ես երթայցեմ ի քէն, եւ հոգի Տեառն առնուցու զքեզ յերկիր զոր ոչ գիտիցեմ, եւ մտանիցեմ պատմել Աքաաբու, եւ ոչ գտանիցէ զքեզ, եւ սպանանիցէ զիս. եւ ծառայ քո երկիւղած է ի մանկութենէ իւրմէ:
13. Եւ ո՞չ պատմեցաւ Տեառն իմում զոր ինչ արարի ես ի կոտորել Յեզաբելայ զմարգարէսն Տեառն. թաքուցի ի մարգարէիցն Տեառն հարիւր այր` յիսուն այր յայրի` եւ կերակրեցի զնոսա հացիւ եւ ջրով:
14. եւ արդ` դու ասես ցիս, երթ եւ ասա Տեառն քում թէ ահաւասիկ Եղիա, եւ սպանանիցէ զիս:
15. Եւ ասէ Եղիա. Կենդանի է Տէր զաւրութեանց, որոյ կացի առաջի նորա. զի այսաւր երեւեցայց նմա:
16. Եւ գնաց Աբդիու ընդ առաջ Աքաաբու` եւ պատմեաց նմա. եւ ընթացաւ Աքաաբ եւ գնաց ընդ առաջ Եղիայի:
17. Եւ եղեւ իբրեւ ետես Աքաաբ զԵղիա, ասէ Աքաաբ ցԵղիա. Եթէ դո՞ւ իցես խանգարիչն Իսրայէլի:
18. Եւ ասէ Եղիա. Ես ոչ խանգարեմ զԻսրայէլ, այլ դու եւ տուն հաւր քո, ի թողուլ ձեր զտէր Աստուած ձեր` եւ երթալ զհետ Բահաղիմայցն:
19. Եւ արդ` առաքեա ժողովեա առ իս զամենայն Իսրայէլ ի լեառն Կարմելոս, եւ զմարգարէսն Բահաղու զչորեքհարիւր եւ զյիսուն, եւ զմարգարէսն Ամաւթոյ զչորեքհարիւր եւ զյիսուն, եւ զմարգարէսն անտառաց զչորեքհարիւր. որ ուտեն զսեղանն Յեզաբելայ:
20. Եւ առաքեաց Աքաաբ ընդ ամենայն Իսրայէլ, եւ ժողովեաց զմարգարէսն ի լեառնն Կարմելոս:
21. եւ մերձեցոյց Եղիա զամենայն ժողովուրդն. եւ ասէ ցնոսա Եղիա. Մինչչեւ ցե՞րբ կաղայք յերկուս հետս. եթէ տէր է Աստուած` երթայք զհետ նորա, եւ եթէ Բահաղն իցէ` երթայք զհետ նորա: եւ ոչ ետ ժողովուրդն նմա պատասխանի:
22. Եւ ասէ Եղիա ցժողովուրդն. Ես մնացեալ եմ մարգարէ Տեառն միայն, եւ մարգարէքն Բահաղու չորք հարիւր եւ յիսուն, եւ մարգարէք անտառին` չորեքարեւր:
23. Տացին մեզ երկուս եզինս, եւ ընտրեսցեն իւրեանց զմին, եւ յաւշեսցեն եւ դիցեն ի վերայ փայտից, եւ հուր մի դիցեն. եւ ես արարից զմեւս եզնն, եւ եդից ի վերայ փայտից, եւ հուր ոչ մատուցից:
24. եւ կարդասջիք զանուն աստուածոցն ձերոց, եւ ես կոչեցից զանուն տեառն Աստուծոյ իմոյ. եւ եղիցի Աստուած` որ լուիցէ հրով` նա է Աստուած: Պատասխանի ետուն ամենայն ժողովուրդն` եւ ասեն. Բարի է բանդ զոր խաւսեցար:
25. Եւ ասէ Եղիա ցմարգարէսն Ամաւթոյ. Ընտրեցէք դուք ձեզ զուարակ մի, եւ արարէք յառաջագոյն, քանզի դուք բազումք էք. եւ կարդացէք զանուն աստուածոցն ձերոց. եւ հուր` մի դնէք ի վերայ:
26. Եւ առին զզուարակն զոր ետ նոցա, եւ արարին. եւ կարդացին զանուն Բահաղու` յայգուէ մինչչեւ ցհասարակ աւր. եւ ասէին. Լուր մեզ Բահաղ` լուր մեզ: եւ ոչ գոյր բարբառ` եւ ոչ ունկնդրութիւն: եւ ընթանային շուրջ զսեղանովն զոր արարին:
27. Եւ եղեւ ի մէջաւրէին` եւ այպանեաց զնոսա Եղիա Թեզբացի եւ ասէ. Մեծաձայն կարդացէք զի Աստուած է` թերեւս զբաւսանք ինչ իցեն նմա, եւ միանգամայն թերեւս առնիցէ հրաման, կամ թէ ի քուն իցէ` եւ յառնիցէ:
28. Եւ կարդային մեծաձայն, եւ ցտէին ըստ աւրինի իւրեանց սրով եւ գեղարդամբք մինչչեւ ցհեղուլ արեան ի վերայ նոցա:
29. եւ եղեւ իբրեւ մերձեցան յընդերեկսն, եւ մարգարէանային մինչչեւ ցժամանակ մատուցանելոյ զոհին. եւ ոչ գոյր ձայն: Եւ խաւսեցաւ Եղիա Թեզբացի ընդ մարգարէս գարշելեացն` եւ ասէ. Ի բաց կացէք, արդ` ես արարից զողջակեզն իմ: եւ ի բաց կացին` եւ գնացին:
30. Եւ ասէ Եղիա ցժողովուրդն. Մատերուք առ իս, եւ մատեան ամենայն ժողովուրդն առ նա. եւ ողջացոյց զսեղանն Տեառն զկործանեալ:
31. եւ առ Եղիա երկոտասան քար` ըստ թուոյ ցեղիցն Իսրայէլի, որպէս խաւսեցաւ Տէր ընդ նմա եւ ասէ. Իսրայէլ եղիցի անուն քո.
32. եւ շինեաց զքարինսն յանուն Տեառն, եւ արար ծով` որ տանէր երկուց գրուաց սերմն շուրջ զսեղանով:
33. Եւ էդէզ զշերտսն ի վերայ սեղանոյն զոր արար, եւ յաւշեաց զողջակէզն, եւ էդէզ ի վերայ շերտիցն, եւ էդէզ ի վերայ սեղանոյն:
34. եւ ասէ. Առէք ինձ չորս սափորս ջրոյ, եւ հեղէք ի վերայ ողջակիզիդ եւ ի վերայ շերտիցդ: եւ ասէ. Կրկնեցէք. եւ կրկնեցին: եւ ասէ. Երեքկնեցէք. եւ երեքկնեցին:
35. եւ գնայր ջուրն շուրջ զսեղանովն, եւ զծովն լցին ջրով:
36. Եւ եղեւ ի ժամու մատուցանելոյ պատարագին աղաղակեաց Եղիա յերկինս, եւ ասէ տէր Աստուած Աբրահամու եւ Սահակայ եւ Իսրայէլի. Այսաւր ծանիցեն եթէ դու ես տէր Աստուած Իսրայէլի, եւ ես ծառայ քո. եւ ես արարի զգործս զայսոսիկ:
37. լուր ինձ Տէր, լուր ինձ հրով. եւ ծանիցէ ժողովուրդս` թէ դու ես տէր Աստուած, եւ դու դարձուցեր զսիրտ ժողովրդեանս այսորիկ յետս:
38. Եւ անկաւ հուր ի Տեառնէ յերկնից, եւ եկեր զողջակէզսն եւ զշերտսն, եւ զհողն եւ զջուրն որ ի ծովուն լափեաց հուրն:
39. իբրեւ ետես ամենայն ժողովուրդն` անկան ի վերայ երեսաց իւրեանց եւ ասեն. Արդարեւ Տէր` նա է Աստուած, Տէր նա է Աստուած:
40. Եւ ասէ Եղիա ցժողովուրդն. Կալարուք զմարգարէսն Բահաղու, եւ մի ոք ապրեսցի ի նոցանէ, եւ կալան զնոսա. եւ իջոյց զնոսա Եղիա ի հեղեղատն Կիսոնի եւ կոտորեաց զնոսա անդ:
41. Եւ ասէ Եղիա ցԱքաաբ. Ել կեր եւ արբ, զի ոտնաձայն անձրեւի է:
42. եւ ել Աքաաբ ուտել եւ ըմպել: եւ Եղիա ել ի գլուխ լերինն Կարմելայ. եւ խոնարհեցաւ յերկիր, եւ եդ զերեսս իւր ի մէջ ծնգաց իւրոց.
43. եւ ասէ ցպատանեակն իւր. Ել եւ հայեաց ընդ ճանապարհ ծովու: ել եւ հայեցաւ պատանեակն, եւ ասէ. Ոչ ինչ է: եւ ասէ Եղիա. Աղէ դու դարձիր եւթն անգամ. եւ դարձաւ պատանեակն եւթն անգամ:
44. Եւ եղեւ յետ եւթներորդում նուագին, եւ ահա ամպ մի փոքրիկ իբրեւ զթաթ առն` հանէր ջուր: եւ ասէ. Ել եւ ասա ցԱքաաբ. Լծեա զկառս քո եւ էջ, գուցէ հասանիցէ քեզ անձրեւ:
45. Եւ եղեւ մինչ նա այսր եւ անդր դառնայր` երկինք մթացան ամպովք եւ հողմով, եւ եղեւ անձրեւ մեծ: եւ լայր եւ երթայր Աքաաբ Յեզրայէլ:
46. եւ ձեռն Տեառն եղեւ ի վերայ Եղիայի, եւ պնդեաց զմէջ իւր եւ ընթացաւ առաջի Աքաաբու, մինչչեւ մտանել Յեզրայէլ:
Հաղորդում կայքում սխալի վերաբերյալ
Տվյալ հատվածում առկա է սխալ: