1. Եւ նստան զերեամ, եւ ոչ էր պատերազմ ի մէջ ասորւոց եւ ի մէջ Իսրայէլի:
2. Եւ եղեւ յամին երրորդի էջ Յովսափատ արքայ Յուդայ առ արքայ Իսրայէլի:
3. Եւ ասէ արքայն Իսրայէլի ցծառայս իւր. Ո՞չ գիտէք եթէ մեր է Ռամաթ Գաղաադու. եւ մեք լռեալ կամք առնուլ զնա ի ձեռաց արքային ասորւոց:
4. եւ ասէ արքայ Իսրայէլի ցՅովսափատ. Ելցե՞ս ընդ մեզ յՌամաթ Գաղաադու ի պատերազմ: եւ ասէ Յովսափատ ցարքայն Իսրայէլի. Որպէս ես, նոյնպէս եւ դու. եւ որպէս զաւրք իմ, զաւրք քո. եւ որպէս երիվարք իմ, երիվարք քո:
5. Եւ ասէ Յովսափատ արքայ Յուդայ ցարքայն Իսրայէլի. Աղէ հարցցուք այսաւր ցՏէր:
6. Եւ ժողովեաց արքայն Իսրայէլի զամենայն մարգարէս իւր իբրեւ արս չորեքարեւր. եւ ասէ ցնոսա արքայ. Երթա՞յց յՌամաթ Գաղաադու ի պատերազմ, թէ զտեղի կալայց. եւ ասեն. Ել, եւ տալով տացէ Տէր ի ձեռս արքայի:
7. Եւ ասէ Յովսափատ ցարքայն Իսրայէլի. Իցէ՞ ոք արդեւք աստ մարգարէ Տեառն` թէ չիցէ. եւ հարցցուք զՏէր նովաւ:
8. եւ ասէ արքայ Իսրայէլի ցՅովսափատ. Է աստ այր մի: հարցանել նովաւ զՏէր, եւ ես ատեցի զնա, զի ոչ խաւսի զինէն բարի, այլ չար. Միքիա որդի Յեմլեայ: եւ ասէ Յովսափատ արքայ Յուդայ. Մի ասասցէ այդպէս արքայ:
9. Եւ կոչեաց արքայ Իսրայէլի ներքինի մի եւ ասէ. Վաղվաղակի ած այսր զՄիքիէ որդի Յեմլեայ:
10. Եւ արքայ Իսրայէլի եւ Յովսափատ արքայ Յուդայ, նստէին այր իւրաքանչիւր յաթոռ իւրում վառեալ ի դրունս Սամարեայ. եւ ամենայն մարգարէքն մարգարէանային առաջի նորա:
11. Եւ արար իւր Սեդեկիա որդի Քանանու եղջեւրս երկաթիս` եւ ասէ. Այսպէս ասէ Տէր. սոքաւք խեթկեսցես զասորիս մինչչեւ սպառեսցին:
12. եւ ամենայն մարգարէքն մարգարէանային նոյնպէս, եւ ասէին. Ել յՌամաթ Գաղաադու, եւ յաջողեսցիս. եւ տացէ Տէր ի ձեռս քո զարքայն ասորւաց:
13. Եւ հրեշտակն որ չոգաւ կոչել զՄիքա, պատմեաց նմա` եւ ասէ. Ահաւանիկ ամենայն մարգարէքն խաւսին իբրեւ ընդ մի բերան բարի զարքայէ, արդ` եղիցի բան քո իբրեւ զմիոյ ի նոցանէն, եւ խաւսեաց բարի:
14. Եւ ասէ Միքա. Կենդանի է Տէր, եթէ ոչ զոր ինչ ասասցէ ցիս Տէր, զայն խաւսեցայց:
15. եւ եկն առ արքայ: Եւ ասէ ցնա արքայ. Միքիա, ելի՞ց յՌամաթ Գաղաադու ի պատերազմ, թէ զտեղի կալայց. եւ ասէ. Ել` եւ յաջողեսցիս, եւ տացէ Տէր ի ձեռս արքայի:
16. Եւ ասէ ցնա արքայ. Դարձեալ կրկին երդմնեցուցեալ զքեզ, զի խաւսեսցիս ընդ իս ճշմարտութեամբ յանուն Տեառն:
17. Եւ ասէ. Ոչ այդպէս է. տեսի զամենայն Իսրայէլ ցրուեալ ընդ լերինս իբրեւ զհաւտ` որոյ ոչ գուցէ հովիւ. եւ ասէ Տէր. Ոչ գոն դոցա տեարք, դարձցին իւրաքանչիւր ի տուն իւր խաղաղութեամբ:
18. Եւ ասէ արքայն Իսրայէլի ցՅովսափատ արքայ Յուդայ. Ո՞չ ասացի քեզ թէ ոչ մարգարէանայ նա ինձ բարի, բայց թէ չար:
19. Եւ ասէ Միքեա. Ոչ այդպէս. ոչ ես ինչ, այլ լուր զպատգամ Տեառն. ոչ ապաքէն տեսի զտէր Աստուած Իսրայէլի նստեալ ի վերայ աթոռոյ իւրոյ, եւ ամենայն զաւրք երկնից կային շուրջ զնովաւ յաջմէ եւ յահեկէ:
20. Եւ ասէ Տէր. Ո՞ պատրեսցէ զԱքաաբ արքայ Իսրայէլի, եւ ելցէ անկցի յՌամաթ Գաղաադու. եւ ասէ ցՏէր ոմն այսպէս, եւ ոմն այնպէս:
21. Եւ ել ոգի, եւ եկաց առաջի Տեառն` եւ ասէ. Ես պատրեցից զնա. եւ ասէ Տէր. Ի՞ւ:
22. եւ ասէ. Ելից եւ եղէց ոգի սուտ ի բերան ամենայն մարգարէից նորա: եւ ասէ. Պատրեսցես եւ կարասցես, ել եւ արա այդպէս:
23. Եւ արդ` ահա ետ Տէր ոգի սուտ ի բերան ամենայն մարգարէիցդ քոց այդոցիկ. եւ Տէր խաւսեցաւ ի վերայ քո չարիս:
24. Եւ մատեաւ Սեդեկիա որդի Քանանու, եւ եհար Միքայի զծնաւտս նորա, եւ ասէ. Ո՞ր հոգի Տեառն է այն, որ անց յինէն եւ խաւսեցաւ ի քեզ:
25. եւ ասէ Միքա. Ահա դու իսկ տեսցես յաւուր յայնմիկ յորում մտանիցես սենեակ ի սենեկէ թաքչել:
26. Եւ ասէ արքայ Իսրայէլի. Կալայք զՄիքիա եւ տուք ցԱմոն քաղաքապետ, եւ ցՅովաս որդի արքայի,
27. եւ ասասջիք. այսպէս ասէ արքայ. դիք զդա ի բանտի, եւ կերիցէ հաց նեղութեան եւ ջուր նեղութեան արբցէ, մինչչեւ դարձայց խաղաղութեամբ:
28. Եւ ասէ Միքա. Եթէ դու դառնալով դարձցիս խաղաղութեամբ, ապա ոչ խաւսեցաւ յիս Տէր. եւ ասէ. լուարուք զաւրքդ ամենեքեան:
29. Եւ ել արքայ Իսրայէլի` եւ Յովսափատ արքայ Յուդայ ընդ նմա յՌամաթ Գաղաադու:
30. Եւ ասէ արքայ Իսրայէլի ցՅովսափատ արքայ Յուդայ. Այլակերպեցայց եւ մտից ի պատերազմ, եւ դու զգեցիր զիմ հանդերձս: եւ այլակերպեցաւ արքայն Իսրայէլի, եւ եմուտ ի ճակատն:
31. Եւ արքայն ասորւոց պատուէր ետ կառապետաց իւրոց եւ ասէ. Մի մարտնչիցիք ընդ մեծի կամ ընդ փոքու, այլ միայն ընդ արքային Իսրայէլի:
32. Եւ եղեւ իբրեւ տեսին կառապետքն զՅովսափատ արքայ Յուդայ. եւ ասեն ցմիմեանս. Թուի թէ սա իցէ արքայն Իսրայէլի. եւ պատեցին զնա պատերազմել: եւ աղաղակեաց Յովսափատ:
33. եւ եղեւ իբրեւ տեսին կառապետքն եթէ չէ նա արքայն Իսրայէլի` դարձան ի նմանէ:
34. եւ ձգեաց մի ոմն կորովութեամբ զաղեղն իւր, եւ եհար զարքայն Իսրայէլի ընդ զրահսն եւ ընդ թոքառաջսն: Եւ ասէ ցկառապետն իւր. Դարձո զձեռն քո եւ հան զիս ի պատերազմէս զի խոցեալ եմ:
35. Եւ սաստկացաւ պատերազմն յաւուր յայնմիկ: եւ արքայ կայր ի վերայ կառացն ընդդէմ ասորւոցն յայգուէ մինչչեւ ցերեկոյ. եւ հոսէր արիւնն ի վիրէ անտի, եւ լնոյր զծոց կառացն. եւ իբրեւ ընդ երեկս եղեւ` ել ոգին:
36. Եւ եկաց քարոզ զաւրուն ի բանակին` ընդ մտանել արեւուն` եւ ասէ. Իւրաքանչիւր ի քաղաք իւր` եւ յերկիր իւր,
37. զի մեռաւ արքայ: Եւ եկն ի Սամարիա, եւ թաղեցին զարքայ ի Սամարիա:
38. եւ լուացին զկառսն յաւազանս Սամարեայ. եւ լիզէին խոզք եւ շունք զարիւն նորա. եւ բոզք լուացան յարեանն, ըստ բանին Տեառն զոր խաւսեցաւ:
39. Եւ մնացորդք բանիցն Աքաաբու, եւ ամենայն ինչ զոր արար. եւ տունն փղոսկրեայ զոր շինեաց, եւ ամենայն քաղաքքն զորս արար. ահաւանիկ գրեալ է ի գիրս բանից աւուրց թագաւորացն Իսրայէլի:
40. Եւ ննջեաց Աքաաբ ընդ հարս իւր, եւ թագաւորեաց Ոքոզիա որդի նորա ընդ նորա:
41. Եւ Յովսափատ որդի Ասայի թագաւորեաց ի վերայ Յուդայ: Յամին չորրորդի Աքաաբու արքայի Իսրայէլի.
42. թագաւորեաց Յովսափատ: որդի երեսուն եւ հինգ ամաց էր ի թագաւորել իւրում. եւ քսան եւ հինգ ամ թագաւորեաց յԵրուսաղէմ եւ անուն մաւր նորա Ասուբա դուստր Սաղաղայ:
43. Եւ գնաց յամենայն ճանապարհս Ասայի հաւր իւրոյ, եւ ոչ խոտորեցաւ ի նմանէ առնել ուղղութիւն առաջի Տեառն.
44. բաց ի բարձանցն զի ոչ եբարձ` քանզի տակաւին զոհէր ժողովուրդն, եւ արկանէր խունկս ի վերայ բարձանց:
45. եւ խաղաղութեամբ էր Յովսափատ ընդ արքային Իսրայէլի:
46. Եւ մնացորդք բանիցն Յովսափատու, եւ զաւրութիւնք զոր արար, եւ որչափ պատերազմեցաւ. ո՞չ աւանիկ գրեալ են ի գիրս բանից աւուրց թագաւորացն Յուդայ:
47. Եւ զաւելորդս նուիրելոցն որ մնացին յաւուրս հաւր նորա` քաղեաց յերկրէն:
48. Եւ թագաւոր ոչ գոյր յԵդոմ հաստատեալ:
49. Եւ արքայ Յովսափատ արար նաւսս Թարսսացիս, երթալ յՈվփիր զոսկւոյ, եւ ոչ գնացին` քանզի խորտակեցան նաւքն ի Գասիոնգաբեր:
50. Յայնժամ ասէ Ոքոզիա որդի Աքաաբու ցՅովսափատ. Երթիցեն ծառայք քո ընդ ծառայս իմ, եւ նաւք քո ընդ նաւս իմ. եւ ոչ կամեցաւ Յովսափատ:
51. Եւ ննջեաց Յովսափատ ընդ հարս իւր, եւ թաղեցաւ առ հարս իւր ի քաղաք Դաւթի հաւր իւրոյ. եւ թագաւորեաց Յովրամ որդի նորա ընդ նորա:
52. Եւ Ոքոզիա որդի Աքաաբու թագաւորեաց ի վերայ Իսրայէլի ի Սամարիա. յամին եւթնուտասներորդի Յովսափատայ արքայի Յուդայ. եւ թագաւորեաց Իսրայէլի ամս երկուս:
53. եւ արար չար առաջի Տեառն. եւ գնաց զճանապարհս Աքաաբու հաւր իւրոյ, եւ զճանապարհս Յեզաբելայ մաւր իւրոյ, եւ ի մեղս տանն Յերոբովամայ որդւոյ Նաբատայ որ յանցոյցն զԻսրայէլ:
54. եւ ծառայեաց Բահաղիմացն, եւ երկիր եպագ նոցա. եւ բարկացոյց զտէր Աստուած Իսրայէլի ըստ ամենայնի եղելոցն յառաջ քան զնա: Կատարեցաւ թագաւորութեանց երրորդ:
Հաղորդում կայքում սխալի վերաբերյալ
Տվյալ հատվածում առկա է սխալ: