Գլուխ 8

   
1․ Եւ ժողովեցան ամենայն ժողովուրդքն իբրեւ զայր մի ի հրապարակն առաջի դրան ջուրցն. եւ ասացին ցԵզրա գրիչ աւրինացն Տեառն, զի բերցէ զաւրէնսն Մովսիսի զոր հրամայեալ է տեառն Աստուծոյ Իսրայէլի:

2․ Եւ եբեր Եզրա քահանայ զաւրէնսն առաջի եկեղեցւոյն, ուր ժողովեալ էին արք եւ կանայք, եւ ամենեքեան որք կամէին լսել յամսամտին եւթներորդ ամսոյն:

3․ Եւ սկսաւ կարդալ զնա յառաւաւտէ յորժամ ծագէր արեգակն մինչչեւ ցաւր հասարակ առաջի արանց եւ կանանց. եւ իմանային ամենեքեան` եւ դնէին ունկն ամենայն ժողովուրդն ի լսել ամենայն գրելոց աւրինացն:

4․ Եւ կայր Եզրա քահանայ եւ գրիչ ի վերայ բեմի փայտեղինի. եւ կային առ նմա Մատաթիաս, եւ Սամեաս, եւ Անանիաս, եւ Ուրիաս, եւ Քեղկիա, եւ Մասիա` ընդ աջմէ նորա: եւ ընդ ահեկէ նորա` Փադիաս, եւ Միսայէլ, եւ Մեղքիաս, եւ Ասամ, եւ Սարդանա, եւ Զաքարիա, եւ Մոսողամ:

5․ Եւ յորժամ եբաց Եզրա զգիրսն առաջի ամենայն ժողովրդեանն, վասն զի նա էր վերակացու ամենայն ժողովրդեանն. եւ եղեւ ի բանալ նորա զգիրսն, կայր ժողովուրդն առաջի նորա:

6․ եւ աւրհնեաց Եզրա զտէր Աստուած մեծ. եւ ասեն ամենայն ժողովուրդն. Ամէն: եւ համբարձին զձեռս իւրեանց, եւ խոնարհեալ երկրպագեցին տեառն Աստուծոյ ի վերայ երեսաց իւրեանց յերկիր:

7․ Եւ Յեսուս, եւ Բանեաս, եւ Սարարիաս էին որ իմացուցանէին զաւրէնսն ժողովրդեանն: եւ ժողովուրդքն կային ըստ կարգի իւրեանց:

9․ Եւ ասէ Նեեմի` որ է Աթերսասթա` եւ Եզրա քահանայ եւ գրիչ, եւ ղեւտացիքն որ իմացուցանէին ժողովրդեանն.

10․ եւ ասեն ամենայն ժողովրդեանն. Աւրս այս` աւր սուրբ է տեառն Աստուծոյ մերոյ, մի սգայք եւ մի լայք: քանզի լային ժողովուրդքն յորժամ լուան զբանս աւրինացն: եւ ասեն ցնոսա. Երթայք կերայք եւ արբէք զպարարտս եւ զքաղցունս, եւ առաքեցէք մասն որոց ոչ գուցէ, վասն զի աւր սուրբ է տեառն Աստուծոյ մերոյ. արդ` զաւրացարուք եւ մի տրտմեցուցանէք զսա:

11․ Եւ ղեւտացիքն լռեցուցանէին զժողովուրդն` եւ ասէին. Լուռ լերուք եւ մի տրտմիք, վասն զի աւր սուրբ է սա:

12․ Եւ գնաց ժողովուրդն յուտել եւ յըմպել եւ առաքեցին մասն որոց ոչ գոյր. եւ առնէին ուրախութիւն մեծ, վասն զի իմացան զբանս աւրինացն զոր կարդաց նոցա:

13․ Եւ յաւուրն երկրորդի ժողովեցան իշխանքն հայրապետաց ամենայն ժողովրդեանն` եւ քահանայք եւ ղեւտացիք առ Եզրաս գրիչ աւրինացն. զի տեղեկասցին եւ ուսցին ի նմանէ զամենայն բանս աւրինացն:

14․ Եւ գտին գրեալ յաւրէնսն` զի էր հրամայեալ տեառն Աստուծոյ Մովսիսի. որպէս արժան է որդւոցն Իսրայէլի բնակել ի տաղաւարս ի տաւնի եւթներորդ ամսոյն.

15․ եւ որպէս նշանակել փողով յամենայն քաղաքս իւրեանց եւ յԵրուսաղէմ: Եւ ասէ Եզրա. Ելէք ի լեառն եւ բերէք տերեւս ձիթենեաց, եւ տերեւս ի ծառոց սաւսեաց, եւ տերեւս մրտոց` խնկենեաց, եւ տերեւս արմաւենեաց, եւ տերեւս ի թաւ ոստոց ծառոց. եւ արարէք ձեզ տաղաւարս ըստ գրեցելոցն:

16․ Եւ ելին ժողովուրդքն եւ բերին, եւ արարին իւրեանց տաղաւարս, այր ի տանիս իւրում, եւ այր ի սրահի իւրում, եւ ի սրահի տանն Աստուծոյ, եւ ի հրապարակս քաղաքին մինչչեւ ի դրունս Եփրեմայ:

17․ Եւ արարին տաղաւարս ամենայն ժողովք եկեղեցւոյն որք դարձեալ էին ի գերութենէն, եւ նստան ի տաղաւարս. քանզի ոչ երբէք արարին որդիքն Իսրայէլի յաւուրցն Յեսուայ որդւոյ Նաւեայ այնպէս մինչչեւ յաւրն յայն. եւ եղեւ ուրախութիւն մեծ յոյժ:

18․ Եւ կարդայր զգիրս աւրինացն աւր ըստ աւրէ` յաւրէն յառաջնմէ մինչչեւ յաւրն եւթներորդ. եւ արարին զտաւնն զեւթն աւր, եւ յաւուրն ութերորդի եղեւ կատարումն ըստ աւրինացն: