Գլուխ 37

   
1․ Եւ արար Բեսելիէլ զտապանակն յանփուտ փայտից. յերկուց կանգնոց եւ ի կիսոյ զերկայնութիւն նորա. եւ ի կանգնոյ եւ ի կիսոյ զլայնութիւն նորա. եւ ի կանգնոյ եւ ի կիսոյ զբարձրութիւն նորա: Եւ պատեաց զնա ոսկւով սրբով ներքոյ եւ արտաքոյ:

2․ Եւ արար նմա ծնաւտս ոսկիս շուրջանակի:

3․ Եւ ձուլեաց նմա չորս աւղամանեակս ոսկիս ի չորեցունց կողմանց նորա. երկուս աւղամանեակս ի միոջէ կողմանէ, եւ երկուս աւղամանեակս ի միւսմէ կողմանէ, եւ ագոյց լծակացն:

4․ Եւ արար լծակս յանփուտ փայտից, եւ պատեաց զնոսա ոսկւով:

5․ Եւ ագուցին զլծակսն յաւղամանեակսն ի կողմանց տապանակին, բառնալ զնա նոքաւք:

6․ Եւ արարին զքաւութիւն ի վերուստ տապանակին յոսկւոյ սրբոյ. յերկուց կանգնոց եւ ի կիսոյ զերկայնութիւն նորա, եւ ի կանգնոյ եւ ի կիսոյ զլայնութիւն նորա:

7․ Եւ արար երկուս քերովբէս ոսկիս, ճախարակեայս գործեաց զնոսա` յերկուց կողմանց քաւութեանն:

8․ Քերոբ մի ի վերայ միոյ գլխոյ քաւութեանն. եւ քերոբ մի ի վերայ երկրորդի գլխոյ քաւութեանն, անդստին ի քաւութենէ անտի արար զերկոսին քերոբսն, յերկոցունց ծայրից նորա:

9․ Եւ էր քերովբէիցն տարածեալ զթեւս իւրեանց ի վերուստ. եւ հովանի ունէին թեւաւք իւրեանց ի վերայ քաւութեանն. եւ երեսք քերոբէիցն հանդէպ միմեանց ի վերայ քաւութեանն:

10․ Եւ արար զսեղանն զառաջաւոր յոսկւոյ սրբոյ. եւ ձուլեաց նմա չորս աւղամանեակս ոսկիս. երկուս ի միոջէ կողմանէ, եւ երկուս յերկրորդ կողմանէ. եւ ագոյցս, բառնալ զնա ագուցիւքն: Եւ զագոյցս տապանակին եւ զսեղանոյն արար յանփուտ փայտից. եւ պատեաց զնոսա ոսկւով. յերկուց կանգնոց զերկայնութիւն նորա, եւ ի կանգնոյ եւ ի կիսոյ զլայնութիւն նորա. եւ ի կանգնոյ եւ ի կիսոյ զբարձրութիւն նորա:

11․ Եւ պատեաց զնա ոսկւով սրբով. եւ արար նմա ծնաւտս ոսկիս շուրջանակի:

12․ Եւ արար նմա պսակ ուղկեան շուրջանակի. եւ արար ծնաւտս ոսկիս պսակին նորա շուրջանակի:

13․ Եւ արար նմա չորս աւղամանկեակս ոսկիս. եւ եդ զաւղամանեակս ի չորս կողմանս, որ էին չորեցունց ոտից նորա.

14․ ի  ներքոյ պսակին. եւ եղեն աւղամանեակքն ագոյցք լծակացն առ ի բառնալոյ զսեղանն:

15․ Եւ արար երկուս լծակս յանփուտ փայտից. եւ պատեաց զնոսա ոսկւով առ ի բառնալ զսեղանն:

16․ Եւ արար զկահ սեղանոյն. զխնկաղացս նորա, եւ զարիւնակալս նորա, եւ զճաշակս նորա, եւ զնուիրանոցսն` որովք նուիրիցեն` յոսկւոյ սրբոյ:

17․ Եւ արար զաշտանակն լուսոյ` ձոյլ ոսկի, զբունն. եւ զստեղունսն յերկոցունց կողմանց նորա. եւ ի ստեղանցն շառաւիղք ընտրեալք առ միմեանս երեք ի միոջէն, եւ երեք ի միւսմէն հաւասարք միմեանց: Եւ զլուսակալս նոցա` որ են ի ծայրսն ընկուզազարդս անստին ընտրեալս: Եւ զբազմակալսն ի նոսա. զի եղիցին ճրագարանքն ի վերայ նոցա. եւ զբազմակալն զեւթներորդ` որ ի գլուխ լուսակալին. որ ի վերայ բուն իսկ գլխոյն ի վերուստ ձողլ` համակ ոսկի: Եւ զեւթն ճրագարանսն որ ի վերայ նորա ոսկիս. եւ զունելիս նորա ոսեկիս. եւ զյարդարիչս նորա ոսկիս յոսկւոյ սրբոյ. ճախարակեայ գործեաց զաշտանակն, զբունն, եւ զսեղունս նորա. եւ զսկահաձեւսն եւ զգնդակսն եւ զշուշանսն անդստին ի նմանէ:

18․ Վեց ստեղունք արձակեալք ի կողմանց նորա. երեք ստեղունք արձակեալք ի միոջէ կողմանէ աշտանակին. եւ երեք ստեղունք յերկրորդ կողմանէ աշտանակին:

19․ Եւ երեք սկահաձեւք ընկուզազարդք յաւրինեալք ի միում ստեղան, եւ գնդակ եւ շուշան: Եւ երեք սկահաձեւք ընկուզազարդք յաւրինեալք ի միում եւս ստեղան, եւ գնդակ եւ շուշան: Այսպէս վեցոցունց ստեղանցն արձակելոց յաշտանակէ անտի:

20․ Եւ ի բուն աշտանակին չորք սկահաձեւք ընկուզազարդք յաւրինեալք. եւ գնդակք նորին եւ շուշանք:

21․ Եւ գնդակ մի ընդ երկու ստեղամբքն. անդստին ի նմին. վեցեցունց ստեղանցն արձակելոց ի նմանէ:

22․ Գնդակք նոցա եւ ստեղունք իւրեանց անդստին ի նմին, բովանդակ ճախարակեայ ի միոջէ յոսկւոյ սրբոյ:

23․ Եւ արար զճրագարանս նորա եւթն. եւ զունելիս, եւ զյարդարիչս նորա յոսկւոյ սրբոյ:

24․ Ի տաղանդէ միոյ ոսկւոյ սրբոյ արար զնա` եւ զամենայն զկահ նորա:

25․ Սա արար զսեղանն ոսկիապատ յանփուտ փայտից, ի հինգ կանգնոյ զերկայնութիւն նորա, եւ ի հինգ կանգնոյ զլայնութիւն նորա, չորեքկուսի. եւ յերից կանգնոց զբարձրութիւն նորա, եւ զեղջեւրս նորա անդստին ի նմանէ:

26․ Եւ պատեաց զնա ոսկւով սրբով. եւ զյարկս նորա, եւ զկողմանս նորա շուրջանակի, եւ զեղջեւրս նորա:

27․ Եւ արար նմա ծնաւտս ոսկիս շուրջանակի. եւ երկուս աւղամանեակս ոսկիս ընդ ծնաւտիւք նորա առ ի կողմանէ ընդ երկոքումբք կողմամբք նորա` յագոյցս լծակացն, առ ի բառնալոյ զնա նոքաւք:

28․ Եւ արար զլծակսն յանփուտ փայտից, եւ պատեաց զնոսա ոսկւով:

29․ Սա արար զեւղն աւծութեան զսուրբ, եւ զհանդերձանս խնկոցն. գործ մաքուր իւղագործաց: