1․ Ի ժամանակին յայնմիկ առաքեաց Մարովդաք Բաղդան որդի Բաղդանայ` արքայի բաբելացւոց, հրեշտակս հրովարտակաւք` եւ պատարագս Եզեկիայ. քանզի լուաւ թէ հիւանդացաւ մերձ ի մահ` եւ յարեաւ:
2․ Եւ ուրախ եղեւ Եզեկիա ի նոսա, եւ եցոյց նոցա զտունս գանձուց, եւ զխնկոց, եւ զիւղոց, եւ զոսկւոյ, եւ զարծաթոյ. եւ զամենայն տունս անաւթոյ գանձու, եւ զամենայն ինչ որ էր ի գանձս իւր. եւ ոչ ինչ էր զոր ոչ եցոյց նոցա Եզեկիա ի տան իւրում, յամենայն իշխանութեան իւրում:
3․ Եւ եկն Եսայի մարգարէ առ արքայն Եզեկիա եւ ասէ ցնա. զի՞նչ ասեն արքդ այդոքիկ, եւ ուստի՞ եկեալ են առ քեզ: եւ ասէ Եզեկիա, յերկրէ հեռաստանէ եկին առ իս ի Բաբելոնէ:
4․ Եւ ասէ Եսայի. զի՞նչ տեսին ի տան քում: եւ ասէ Եզեկիա. զամենայն ինչ որ ի տան իմում էր` տեսին, եւ ոչ ինչ էր ի տան իմում զոր ոչ տեսին. այլեւ զգանձս եւս զիմ:
5․ Եւ ասէ ցնա Եսայի. արդ` լուր զպատգամս Տեառն զաւրութեանց:
6․ ահա եկեսցեն աւուրք, եւ առնուցուն զամենայն ինչ` որ ի տան քում է, եւ զոր ինչ միանգամ ժողովեցին հարքն քո մինչչեւ ցայսաւր. տարցին ի Բաբելովն, եւ մի ինչ ամենեւին թողուցուն:
7․ Այլ ասաց Աստուած, թէ եւ յորդւոց քոց որ ելանիցեն ի քէն` զորս դուն ծնանիցիս, տարցին եւ արասցեն ներքինիս ի տան թագաւորին բաբելացւոց:
8․ Եւ ասէ Եզեկիա ցԵսայի. բարի է բանդ Տեառն զոր խաւսեցաւ. եղիցի արդարութիւն եւ խաղաղութիւն յաւուրս իմ:
Հաղորդում կայքում սխալի վերաբերյալ
Տվյալ հատվածում առկա է սխալ: