1․ Եւ ասէ Տէր ցՄովսէս. Այլ մեւս եւս հարուածս ածից ի վերայ փարաւոնի եւ ի վերայ Եգիպտոսի. Եւ ապա արձակեսցէ զձեզ աստի. այլ յորժամ արձակեսցէ զձեզ, ամենեւին հանցէ զձեզ աստի:
2․ Արդ` խաւսեաց գաղտ յականջս ժողովրդեանն, եւ խնդրեսցեն իւրաքանչիւր ոք յընկերէ իւրմէ, եւ կին ի դրացւոյ իւրմէ անաւթս ոսկեղէնս եւ անաւթս արծաթեղէնս եւ հանդերձս:
3․ Եւ ետ Տէր շնորհս ժողովրդեան իւրում առաջի Եգիպտացւոցն. եւ ետուն նոցա զարդ: Եւ այրն Մովսէս մեծարոյ եղեւ յոյժ առաջի Եգիպտացւոցն, եւ առաջի փարաւոնի, եւ առաջի ամենայն ծառայից նորա. եւ յաչս ժողովրդեանն:
4․ Եւ ասէ Մովսէս. Այսպէս ասէ Տէր. Զհասարակ գիշերաւ ես մտից ի մէջ Եգիպտոսի:
5․ Եւ սատակեցից զամենայն անդրանիկ յերկրէդ Եգիպտացւոց, յանդրանկէ անտի փարաւոնի որ նստի յաթոռ նորա, մինչչեւ ցանդրանիկ աղախնոյն որ կայցէ առ երկանս, եւ մինչչեւ ցանդրանիկ ամենայն անասնոց:
6․ Եւ եղիցի աղաղակ մեծ յամենայն երկրիդ Եգիպտացւոց. որպիսի ոչ եղեւ եւ ոչ եւս յաւելուցու լինել նոյնպիսի:
7․ Եւ ի մէջ ամենայն որդւոցն Իսրայէլի ոչ կռնչեսցէ եւ ոչ շուն մի լեզուաւ իւրով, եւ ոչ ի մարդոյ մինչչեւ յանասուն. զի գիտասցես ո՞րչափ ինչ սքանչելիս արասցէ Տէր ի մէջ Եգիպտացւոցդ` եւ ի մէջ Իսրայէլի:
8․ Եւ իջցեն ամենայն ծառայքս քո այսոքիկ առ իս. եւ երկիր պագցեն ինձ եւ ասասցեն. Ել դու եւ ամենայն ժողովուրդ քո, որում դուդ առաջնորդես. եւ ապա ելից:
9․ Եւ ել Մովսէս ի փարաւոնէ լի բարկութեամբ: Եւ ասէ Տէր ցՄովսէս. Ոչ լուիցէ ձեզ փարաւոն, զի յաճախեցից զնշանս իմ եւ զարուեստս յերկրիդ Եգիպտացւոց:
10․ Եւ Մովսէս եւ Ահարոն արարին զամենայն նշանս եւ զարուեստս զայսոսիկ յերկրին Եգիպտացւոց առաջի փարաւոնի: Եւ խստացոյց Տէր զսիրտն փարաւոնի, եւ ոչ կամեցաւ արձակել զորդիսն Իսրայէլի յերկրէն Եգիպտացւոց:
Հաղորդում կայքում սխալի վերաբերյալ
Տվյալ հատվածում առկա է սխալ: