Գլուխ 12

   
1․ Եւ խաւսեցաւ Տէր ընդ Մովսիսի եւ ընդ Ահարոնի յերկրին Եգիպտացւոց, եւ ասէ.
2․ Ամիսս այս եղիցի ձեզ սկիզբն ամսոց, առաջին եղիցի ձեզ յամիսս տարւոյ:
3․ Խաւսեաց ընդ ամենայն ժողովրդեան որդւոցն Իսրայէլի եւ ասասցես. Ի տասներորդում ամսեանս այսորիկ առցեն իւրեանց իւրաքանչիւր ոչխար ըստ տունս ազգաց իւրեանց. ոչխար ըստ երդ:
4․ Եւ եթէ սակաւք իցեն ի տանն, որպէս թէ չիցեն բաւական լինել ոչխարին` առցէ ընդ իւր զդրացի իւր եւ զընկեր իւր ըստ մարդաթուի. իւրաքանչիւր ըստ բաւականի իւրում համարեսցի յոչխարն:
5․ Ոչխար կատարեալ` արու, տարեւոր, անարատ լիցի ձեզ: Յաւդեաց եւ յայծեաց առնուցուք.
6․ եւ եղիցի ձեզ պահեալ մինչչեւ ի չորս եւ ի տասն աւուր ամսոյս այսորիկ: Եւ զենցեն զնա ամենայն բազմութիւն ժողովրդեան որդւոցն Իսրայէլի ընդ երեկս:
7․ Եւ առցեն յարենէ անտի եւ դիցեն ի վերայ երկուց սեմոցն եւ բարաւորին տանցն յորս ուտիցեն զնա ի նոսա:
8․ Եւ կերիցեն զմիսն ի գիշերիս յայսմիկ խորովեալ հրով. եւ բաղարջ ընդ եղիգի կերիցեն:
9․ Եւ ոչ ուտիցէք ի նոցանէ հում, եւ ոչ պախ եփեալ ջրով. այլ խորովեալ հրով. զգլուխն ոտիւքն հանդերձ, եւ զփորոտին նորա:
10․ Եւ ոչ թողուցուք ի նմանէ յայգ. եւ ոսկր մի բեկանիցէք ի նմանէ: Եւ որ ինչ մնասցէ ի նմանէ յայգ` հրով այրեսջիք:
11․ Եւ այսպէս ուտիցէք, գաւտիք ձեր ընդ մէջս, եւ կաւշիկք ձեր յոտս, եւ ցուպ ձեր ի ձեռին: Փութանակի ուտիցէք, զի զատիկ Տեառն է:
12․ Եւ անցից ընդ ամենայն երկիրդ Եգիպտացւոց ի գիշերիս յայսմիկ, եւ հարից զամենայն անդրանիկ երկրիդ Եգիպտացւոց ի մարդոյ մինչչեւ յանասուն: Եւ յամենայն դիսն Եգիպտացւոց արարից վրէժխնդրութիւն, զի ես եմ Տէր:
13․ Եւ եղիցի ձեզ արիւնդ նշանակեալ ի վերայ տանց` յորս ուտիցէք դուք անտ: Եւ տեսից զարիւնդ եւ ապրեցուցից զձեզ. եւ ոչ լինիցին ի ձեզ հարուածք ի սատակել` յորժամ հարկանիցեմ զերկրիդ Եգիպտացւոց:
14․ Եւ եղիցի ձեզ արիւնդ այդ ի յիշատակ, եւ տաւնեցէք զդա` տաւն Տեառն յազգս ձեր. աւրէն յաւիտենական տաւնեցէք զդա:
15․ Զեւթն աւր բաղարջ ուտիցէք, յառաջնմէ իսկ աւրէ անտի` անհետ առնիջիք զխմոր ի տանց ձերոց: Ամենայն որ ուտիցէ խմորեալ` սատակեսցի անձնն այն յԻսրայէլէ:
16․ Յառաջնմէ աւրէն մինչչեւ յաւրն եւթներորդ. եւ աւրն եւթներորդ նուիրեալ եղիցի ձեզ սուրբ: Զամենայն գործ սպասու մի գործիցէք ի նմա, բայց այն որ գործիցի ամենայն անձին` այն միայն գործեսցի ձեզ:
17․ Եւ պահեսջիք զպատուիրանս իմ զայս, զի յաւուր յայսմիկ հանից զզաւրութիւն ձեր յերկրէս Եգիպտացւոց. եւ առնիցէք զաւրս զայս յազգս ձեր աւրէն յաւիտենական:
18․ Ի սկսանել չորեքտասաներորդի աւուր ամսոյն առաջնոյ. յերեկորեայ բաղարջ ուտիցէք, մինչչեւ ցքսան եւ մի աւր ամսոյն ցերեկոյ:
19․ Զեւթն աւր մի գտցի խմոր ի տունս ձեր. ամենայն որ ուտիցէ խմորեալ` սատակեսցի անձն այն յԻսրայէլէ: Յեկաց եւ ի բնակաց երկրին
20․ խմորեալ մի ուտիցեն: Յամենայն բնակութեան ձերում ուտիցէք բաղարջ:
21․ Եւ կոչեաց Մովսէս զամենայն ծերակոյտ որդւոցն Իսրայէլի. եւ ասէ ցնոսա. Երթայք առէք ձեզ ոչխար ըստ ազգս ձեր, եւ զենջիք ի զատիկ:
22․ Եւ առնուցուք մշտիկ զոպայի թաթաւեալ յարեան որ առ դրաւքն իցէ, եւ սրսկեսջիք զբարաւորաւն եւ զերկոքումբք սեմովք յարենէ անտի որ առ դրաւքն: Բայց դուք մի ելանիցէք իւրաքանչիւր ընտ դուռն տան իւրոյ մինչչեւ ցառաւաւտ:
23․ Եւ անցցէ Տէր հարկանել զԵգիպտացիսդ: Եւ տեսանիցէ զարիւնն որ ի վերայ բարաւորին եւ ի վերայ երկուց սեմոց, եւ զանց առնիցէ Տէր զդրաւքն. եւ ոչ տայցէ թոյլ սատակչին մտանել ի տունս ձեր եւ հարկանել:
24․ Եւ պահեսջիք զբանս զայս` աւրէն յաւիտենական քեզ եւ որդւոց քոց, մինչչեւ ցյաւիտեան:
25․ Եւ եթէ մտանիցէք յերկիրն զոր տացէ ձեզ Տէր` որպէս եւ խաւսեցաւն, պահեսջիք զպաշտաւնդ զայդ:
26․ Եւ եղիցի եթէ ասիցեն ցձեզ որդիք ձեր. Զի՞նչ է պաշտաւնս այս ձեզ:
27․ Ասասջիք նոցա, եթէ Զոհ զատկի Տեառն է այս. յորժամ պահեաց զտունս որդւոցն Իսրայէլի յԵգիպտոս: Մինչ հարկանէր զԵգիպտացիսն, եւ զտունս մեր ապրեցոյց: Եւ խոնարհեցաւ ժողովուրդն` եւ երկիր եպագ:
28․ Եւ գնացեալ որդիքն Իսրայէլի արարին որպէս պատուիրեաց Տէր Մովսիսի եւ Ահարոնի, նոյնպէս եւ արարին:
29․ Եւ եղեւ ի հասարակ գիշերի` եւ Տէր եհար զամենայն անդրանիկս յերկրին Եգիպտացւոց. յանդրանկանէ անտի փարաւոնի որ նստէր յաթոռ նորա, մինչչեւ յանդրանիկ գերւոյն որ կայր ի վիրապի. եւ զամենայն անդրանիկ անասնոց:
30․ Եւ յարեաւ փարաւոն գիշերայն, ինքն եւ ամենայն ծառայք իւր, եւ ամենայն Եգիպտացիք. եւ եղեւ աղաղակ մեծ յամենայն երկրին Եգիպտացւոց. զի ոչ գոյր տուն յորում ոչ գոյր մեռեալ ի նմա:
31․ Եւ կոչեաց փարաւոն զՄովսէս եւ զԱհարոն գիշերայն, եւ ասէ ցնոսա. Արիք եւ ելէք ի ժողովրդենէ իմմէ. եւ դուք եւ որդիքն Իսրայէլի, երթայք պաշտեցէք զՏէր Աստուած ձեր. որպէս ասացէք:
32․ Եւ զարջառ եւ զոչխար ձեր առեալ գնացէք` որպէս եւ ասացէք: Բայց եւ զիս աւրհնեցէք:
33․ Եւ բռնադատէին Եգիպտացիքն զժողովուրդն փութանակի հանել զնոսա յերկրէ անտի: Քանզի ասէին` թէ Ամենեքեան իսկ մեռանիմք:
34․ Եւ առ ժողովուրդն զհայսն իւրեանց մինչ չեւ խմորեալ էր. եւ զզանգուածս իւրեանց ծրարեալ ի կտաւս իւրեանց` ի վերայ ուսոց իւրեանց:
35․ Եւ որդիքն Իսրայէլի արարին որպէս եւ հրաման ետ նոցա Մովսէս: Եւ խնդրեցին յԵգիպտացւոցն անաւթս ոսկեղէնս եւ անաւթս արծաթեղէնս, եւ հանդերձս:
36․ Եւ ետ Տէր ետ շնորհս ժողովրդեան իւրում առաջի Եգիպտացւոցն, եւ ետուն նոցա ի զարդ` եւ կողոպտեցին զԵգիպտացիսն:
37․ Եւ չուեցին որդիքն Իսրայէլի յՌամեսեայ ի Սոկքովթ, վեց հարիւր հազար այր հետեւակ, թող զայլ աղխ:
38․ Եւ խառնիճաղանճ բազում ել ընդ նոսա. եւ արջառ եւ ոչխար եւ անասուն բազում յոյժ:
39․ Եւ եփեցին զհայսն զոր հանին յԵգիպտոսէ, նկանս բաղարջս, քանզի ոչ խմորեցաւ. զի հանին զնոսա Եգիպտացիքն` եւ ոչ կարէին մնալ, եւ ոչ պաշար արարին իւրեանց ճանապարհին:
40․ Եւ բնակութիւն որդւոցն Իսրայէլի զոր բնակեցին յերկրին Եգիպտացւոց եւ յերկրին Քանանացւոց, ինքեանք
եւ հարք իւրեանց. ամք չորեքհարիւր եւ երեսուն: Եւ եղեւ յետ չորեքհարիւր եւ երեսուն ամի,
41․ յաւուր յայնմիկ ելին ամենայն զաւրութիւնք Տեառն յերկրէն Եգիպտացւոց գիշերի:
42․ Որ էր յառաջապահեստ Տեառն հանել զնոսա յերկրէն Եգիպտացւոց: Այն գիշեր յառաջապահեստ Տեառն լինել ամենայն որդւոցն Իսրայէլի յազգս նոցա:
43․ Խաւսեցաւ Տէր ընդ Մովսիսի եւ ընդ Ահարոնի` եւ ասէ. Այս է աւրէն զատկի: Ամենայն այլազգի մի կերիցէ ի նմանէ:
44․ Եւ զամենայն ծառայ ուրուք եւ զարծաթագին թլփատեսցես, եւ ապա կերիցէ ի նմանէ:
45․ Պանդուխտն եւ վարձկանն մի կերիցէ ի նմանէ:
46․ Ի տան միում կերիցի: Եւ մի հանիցէք ի մսոյ անտի արտաքս քան զտունն: Եւ ոսկր մի բեկանիցէք ի նմանէ:
47․ Ամենայն ժողովուրդ որդւոցն Իսրայէլի առնիցեն զայն:
48․ Ապա թէ մերձանայցէ առ ձեզ եկամուտ` եւ առնիցէ զզատիկն Տեառն, թլփատեսցեն զամենայն արու մանուկ նորա, եւ ապա մերձեսցի առնել զնա եւ եղիցի իբրեւ զբնակ երկրին: Ամենայն անթլփատ մի կերիցէ ի նմանէ:
49․ 0րէն` մի եւ նոյն կացցէ բնակին եւ եկին` որ գայցէ մերձանալ ի ձեզ:
50․ Եւ արարին ամենայն որդիքն Իսրայէլի` որպէս պատուիրեաց Տէր Մովսիսի եւ Ահարոնի, նոյնպէս եւ արարին:
51․ Եւ եղեւ յաւուր յայնմիկ` եհան Տէր զորդիսն Իսրայէլի յերկրէն Եգիպտացւոց հանդերձ զաւրութեամբ իւրեանց: