Գլուխ 14

   
1․ Եւ խաւսեցաւ Տէր ընդ Մովսիսի եւ ասէ.

2․ Խաւսեաց ընդ որդիսն Իսրայէլի, եւ դարձցին բանակեսցին դէմ յանդիման հանգրուանին. ընդ Մագդովղ եւ ընդ ծովն. հանդէպ Բէեղսեպփոնեայ. յանդիման նոցա բանակեսցիս առ ծովեզերբ:

3․ Եւ ասասցէ փարաւոն զորդւոցդ Իսրայէլի թէ Մոլորեալ են յերկրին, քանզի պատեաց զնոսա անապատն:

4․ Եւ ես խստացուցից զսիրտն փարաւոնի եւ պնդեսցի զհետ դոցա:

5․ Եւ փառաւորեցայց ի փարաւոն եւ յամենայն զաւրս նորա: Եւ ծանիցեն ամենայ Եգիպտացիքն թէ ես եմ Տէր: Եւ արարին այնպէս:

6․ Եւ ազդ եղեւ արքային Եգիպտացւոց եթէ փախեաւ ժողովուրդն: Եւ շրջեցաւ սիրտն փարաւոնի` եւ ծառայից իւրոց ի վերայ ժողովրդեանն, եւ ասեն. Զի՞նչ գործեցաք զայն զի արձակեցաք զորդիսն Իսրայէլի, զի մի ծառայեսցեն մեզ:

7․ Եւ հանդերձեաց փարաւոն զկառս իւր. եւ տարաւ ընդ իւր զամենայն ժողովուրդս իւր. եւ առ վեց հարիւր կառս ընդիրս, եւ զամենայն երիվարս Եգիպտացւոց, եւ սպառազէնս ի վերայ ամենեցուն:

8․ Եւ խստացոյց Տէր զսիրտն փարաւոնի արքային Եգիպտացւոց, եւ պնդեցաւ զհետ որդւոցն Իսրայէլի: Եւ որդիքն Իսրայէլի ելանէին բարձրացեալ ձեռամբ:

9․ Եւ պնդեցան Եգիպտացիքն զհետ նոցա, եւ գտին զնոսա բանակեալս առ ծովեզերբն. եւ ամենայն երիվարք` եւ կառք փարաւոնի, եւ հեծեալք նորա եւ զաւրք նորա յանդիման հանգրուանին. հանդէպ Բեէղսեպփոնայ:

10․ Եւ եհաս մաւտ փարաւոն: Եւ համբարձեալ որդւոցն Իսրայէլի զաչս իւրեանց տեսանէին` զի բանակեցան Եգիպտացիքն ի թիկանց նոցա, եւ երկեան յոյժ:

11․ Եւ բողոքեցին որդիքն Իսրայէլի առ Տէր: Եւ ասեն ցՄովսէս. Իբրեւ թէ ո՞չ գոյին գերեզմանք յերկրին Եգիպտացւոց. հաներ զմեզ սպանանե՞լ յանապատի աստ: Զի՞նչ գործեցեր զայս ընդ մեզ, զի հաներ զմեզ յԵգիպտոսէ:

12․ Ո՞չ այս բանք են` զոր խաւսեցաք ընդ քեզ յերկրին Եգիպտացւոց, թէ թոյլ տուր մեզ զի ծառայեսցուք Եգիպտացւոցն: Զի լաւ էր մեզ ծառայել Եգիպտացւոցն, քան մեռանել յայսմ անապատի:

13․ Եւ ասէ Մովսէս ցժողովուրդն. Քաջալերեցարուք, պինդ կացէք. եւ տեսանիցէք զփրկութիւն ի Տեառնէ զոր արասցէ ձեզ այսաւր: Զի զորաւրինակ տեսէք զԵգիպտացիսն այսաւր, ոչ եւս յաւելուցուք տեսանել զնոսա յաւիտեանս ժամանակաց:

14․ Տէր տայ պատերազմ ընդ ձեր, եւ դուք լռեցէք:

15․ Եւ ասէ Տէր ցՄովսէս. Զի՞ գոչես առ իս: Խաւսեաց ընդ որդիսդ Իսրայէլի` եւ չուեսցեն:

16․ Եւ դու առ զգաւազանդ քո. եւ ձգեա զձեռն քո ի վերայ ծովուն եւ պատառեա զնա: Եւ մտցեն որդիքն Իսրայէլի ի մէջ ծովուն ընդ ցամաք:

17․ Եւ ահա ես խստացուցից զսիրտն փարաւոնի, եւ զԵգիպտացւոցն ամենեցուն, եւ մտցեն զկնի դոցա: Եւ փառաւորեցայց ես ի փարաւոն եւ յամենայն զաւրս նորա, եւ ի կառս նորա եւ յերիվարս նորա:

18․ Եւ ծանիցեն ամենայն Եգիպտացիքն` թէ ես եմ Տէր. ի փառաւորել իմում ի փարաւոն եւ ի կառս նորա եւ յերիվարս նորա:

19․ Եւ ամբարձաւ հրեշտակն Աստուծոյ որ երթայր առաջի բանակի որդւոցն Իսրայէլի. եւ չոգաւ զկնի նոցա. եւ վերացաւ սիւն ամպոյն յերեսաց նոցա, եւ եկաց ի թիկանց նոցա:

20․ Եւ եմուտ ի մէջ բանակի Եգիպտացւոցն, եւ ի մէջ բանակի Իսրայէլացւոցն. եւ եղեւ խաւար եւ մէգ: Եւ անց գիշերն. եւ ոչ խառնեցան ընդ միմեանս զամենայն գիշերն:

21․ Եւ ձգեաց Մովսէս զձեռն իւր ի վերայ ծովուն. եւ դարձոյց անդրէն զծովն բռնութեամբ հողմոյ հարաւոյ զամենայն գիշերն: Եւ արար զծովն ցամաք. եւ պատառեցաւ ջուրն:

22․ Եւ մտին որդիքն Իսրայէլի ի մէջ ծովուն ընդ ցամաք: Եւ եղեւ ջուրն պարիսպ ընդ աջմէ նոցա, եւ ընդ ահեկէ իւրեանց

23․ Պնդեցան Եգիպտացիքն` եւ մտին զկնի նոցա, ամենայն երիվարք փարաւոնի, եւ կառք նորա, եւ հեծեալք նորա ի մէջ ծովուն:

24․ Եւ եղեւ յառաւաւտին պահուն, հայեցաւ Տէր ի բանակն Եգիպտացւոց սեամբ հրոյ եւ ամպոյ. եւ խռովեաց զբանակն Եգիպտացւոցն.

25․ եւ կապեաց զանիւս կառաց նոցա, եւ վարէր զնոսա բռնութեամբ: Ասեն Եգիպտացիքն. Փախիցուք յերեսաց Իսրայէլի, զի Տէր պատերազմի վասն նոցա ընդ Եգիպտացիսն:

26․ Եւ ասէ Տէր ցՄովսէս. Ձգեա զձեռն քո ի վերայ ծովուդ, եւ կարկատեսցի անդրէն ջուրդ. եւ ծածկեսցէ զԵգիպտացիսդ, եւ զկառս դոցա եւ զհեծեալս իւրեանց:

27․ Եւ ձգեաց Մովսէս զձեռն իւր ի վերայ ծովուն, եւ դարձաւ ջուրն ընդ առաւաւտն ի տեղի իւր: Եւ Եգիպտացիքն փախեան յերեսաց ջրոյն: Եւ թաւթափեաց Տէր զԵգիպտացիսն ի մէջ ծովուն:

28․ Եւ դարձուցեալ զջուրսն, ծածկեաց զկառս եւ զհեծեալս, եւ զամենայն զաւրութիւն փարաւոնի. որ մտեալ էին զհետ նոցա ի ծով անդր. եւ ոչ մնաց ի նոցանէ եւ ոչ մի:

29․ Եւ որդիքն Իսրայէլի գնացին ընդ ցամաք ի մէջ ծովուն. եւ ջուրն պարիսպ էր ընդ աջմէ նոցա եւ ընդ ահեկէ իւրեանց:

30․ Եւ ապրեցոյց Տէր զԻսրայէլ յաւուր յայնմիկ ի ձեռաց Եգիպտացւոցն:

31․ Եւ ետես Իսրայէլ զԵգիպտացիսն մեռեալս առ ափն ծովուն: Եւ ետես Իսրայէլ զձեռն մեծ զոր արար Տէր ընդ Եգիպտացիսն. եւ երկեաւ ժողովուրդն ի Տեառնէ. եւ հաւատացին յԱստուած` եւ ի Մովսէս ծառայ նորա: