Գլուխ 15

   
1․ Յայնժամ երգեաց Մովսէս` եւ որդիքն Իսրայէլի զաւրհնութիւնս զայս Աստուծոյ, եւ ասեն. 0րհնեսցուք զՏէր զի փառաւք է փառաւորեալ. Զերիվարս եւ զհեծեալս նոցա ընկէց ի ծով.

2․ աւգնական ընդունելի իմ Տէր, եւ եղեւ Ինձ ի փրկութիւն: Սա է իմ Աստուած եւ փառաւոր արարից զսա: Աստուած Հաւր իմոյ` եւ բարձր արարից զսա:

3․ Տէր խորտակէ զպատերազմունս, Տէր անուն նորա:

4․ Զկառս փարաւոնի` եւ զզաւրութիւն նորա ընկէց ի ծով. զընտիրս հեծելոց եւ զսպառազէնս. ընկղմեցան ի ծով Կարմիր:

5․ Խորք ծածկեցին զնոսա. ընկլան յանդունդս իբրեւ զվէմս:

6․ Աջ քո Տէր փառաւորեալ է զաւրութեամբ իւրով, աջ քո Տէր խորտակեաց զթշնամին:

7․ Եւ բազմութեամբ փառաց քոց մանրեցեր զհակառակորդս, առաքեցեր զբարկութիւն քո, եւ եկեր զնոսա իբրեւ զեղէգն:

8․ Եւ հողմով սրտմտութեամբ քով պատառեցան ջուրք. պաղեցան որպէս պարիսպ ջուրք. պաղեցան ալիք ի մէջ ծովուն:

9․ Ասաց թշնամին, Հալածեցից եւ հասից,ն բաժանեցից զաւարն, եւ լցուցից ի նոցանէ զանձն իմ: Սատակեցից սրով իմով. տիրեսցէ նոցա ձեռն իմ:

10․ Առաքեցեր զհողմն քո, եւ ծածկեաց զնոսա ծով. ընկղմեցան որպէս կապար ի ջուրս սաստիկս:

11․ Ո՞վ իցէ նման քեզ յաստուածս Տէր. եւ կամ ո՞վ նմանիցէ քեզ փառաւորեալդ ի սուրբս: Սքանչելի փառաւք` որ առնես զնշանս.

12․ ձգեցեր զաջ քո` եւ եկուլ զնոսա երկիր:

13․ Առաջնորդեցեր արդարութեամբ ժողովրդեան քում, այսմ զոր փրկեցեր: Մխիթարեցեր զաւրութեամբ քով ի բանակետղ սրբութեան քոյ.

14․ լուան ազգք եւ բարկացան, եւ երկունք կալան զբնակիչս Քանանացւոց:

15․ Յայնժամ տագնապեցան դատաւորք Եդովմայ, իշխանք Մովաբացւոց: Կալաւ զնոսա դողումն, հալեցան ամենայն բնակիչք Քանանացւոց:

16․ Անկցի ի վերայ նոցա ահ եւ երկիւղ. մեծութեամբ բազկի քոյ քարասցին: Մինչչեւ անցցէ ժողովուրդ քո Տէր. մինչչեւ անցցէ ժողովուրդ քո այս զոր ստացար:

17․ Տարեալ տնկեսցես զնոսա ի լեառն ժառանգութեան քոյ, ի պատրաստութիւն բնակութեան քոյ: Զոր արարեր Տէր սրբութիւն. Տէր զոր պատրաստեցին ձեռք քո.

18․ Տէր թագաւոր յաւիտեան. եւ յաւիտեանս եւ եւս:

19․ Զի մտին երիվարք փարաւոնի կառաւք եւ հեծելովք նորա ի ծով. եւ ած ի վերայ նոցա Տէր զջուրս ծովուն. եւ որդիքն Իսրայէլի գնացին ընդ ցամաք ի մէջ ծովուն:

20․ Եւ առ Մարիամ մարգարէ քոյրն Ահարոնի զթմբուկն ի ձեռին իւր. Եւ ելին ամենայն կանայք զհետ նորա թմբկաւք եւ պարուք:

21․ Եւ յառաջէր Մարիամ եւ ասէր. 0րհնեսցուք զՏէր, զի փառաւք փառաւորեալ է. Զերիվարս եւ զհեծեալս ընկէց ի ծով:

22․ Եւ խաղացոյց Մովսէս զորդիսն Իսրայէլի ի Կարմիր ծովէ անտի. եւ ած զնոսա յանապատն ի սուր: Եւ գնացին երեքաւրեայ ճանապարհ յանապատի անդ. եւ ոչ գտանէին ջուր ըմպելոյ:

23․ Եկին ի Մեռա, եւ ոչ կարէին ըմպել ջուր ի Մեռայն. քանզի դառն էր. վասն այնորիկ անուանեաց զանուն տեղւոյն այնորիկ` Դառնութիւն:

24․ Եւ տրտնջեաց ժողովուրդն զՄովսիսէ եւ ասեն. Զի՞նչ արբցուք:

25․ Աղաղակեաց Մովսէս առ Տէր: Եւ եցոյց նմա Տէր փայտ: Եւ արկ զայն ի ջուրն, եւ քաղցրացաւ ջուրն: Եւ անդ եդ նմա իրաւունս եւ դատաստանս. եւ անդ փորձեաց զնա,

26․ եւ ասէ. Եթէ լսելով լուիցես ձայնի Տեառն Աստուծոյ քում, եւ զհաճոյս առաջի նորա արասցես, եւ ունկնդիր լիցիս պատուիրանաց նորա. եւ պահեսցես զամենայն իրաւունս նորա. զամենայն զախտն զոր ածի ի վերայ Եգիպտացւոցն, ոչ ածից ի վերայ քո. զի ես եմ Տէր որ բժշկեմ զքեզ:

27․ Եւ եկին յԱղիմ. եւ էին անդ երկոտասան աղբեւր ջուրց, եւ եւթանասուն ծառ արմաւենեաց. եւ անդ բանակեցան առ ջրովն: