Գլուխ 18

   
1․ Եւ լուաւ Յոթոր քուրմ Մադիամու աներ Մովսիսի զամենայն զոր արար Տէր ընդ Մովսիսի, եւ յԻսրայէլի ժողովրդեան իւրում. զի եհան Տէր զԻսրայէլ յԵգիպտոսէ:

2․ Եւ առ Յոթոր աներն Մովսիսի, զՍեպփովրա զկին Մովսիսի` յետ թողլոյ զնա:

3․ Եւ զերկուս որդիս նորա. յորոց միումն անուն էր` Գերսամ, ասէ` պանդուխտ էի յաւտար երկրի:

4․ Եւ անուն երկրորդին` Եղիազար. ասէ` Աստուած հաւր իմոյ աւգնական իմ, եւ ապրեցոյց զիս ի ձեռաց փարաւոնի:

5․ Եւ եկն Յոթոր` աներ Մովսիսի եւ որդիք նորա եւ կին նորա առ Մովսէս յանապատն, ուր բնակեալ էր ի լերինն Աստուծոյ:

6․ Ազդ եղեւ Մովսիսի եւ ասեն. Թէ Ահա աներ քո Յոթոր` գայ առ քեզ, եւ կին քո եւ երկու որդիք քո ընդ նմա:

7․ Ել Մովսէս ընդառաջ աներոյն իւրոյ, եւ երկիր եպագ նմա եւ համբուրեաց զնա: Եւ ողջոյն ետուն միմեանց ի խաղաղութիւն. եւ տարաւ զնոսա ի խորանն:

8․ Եւ պատմեաց Մովսէս աներոյն իւրոյ զամենայն զոր արար Տէր ընդ փարաւոն եւ ընդ Եգիպտացիսն վասն Իսրայէլի, եւ զամենայն աշխատութիւնս որ եղեւ նոցա ի ճանապարհի, եւ զի ապրեցոյց զնոսա Տէր:

9․ Եւ զարմացաւ Յոթոր ի վերայ ամենայն բարեացն զոր արար նոցա Տէր. եւ զի ապրեցոյց զնոսա ի ձեռաց Եգիպտացւոցն եւ ի ձեռաց փարաւոնի:

10․ Եւ ասէ Յոթոր. 0րհնեալ է Տէր` որ ապրեցոյց զդոսա ի ձեռաց Եգիպտացւոցն` եւ ի ձեռաց փարաւոնի. աւրհնեալ է Տէր զի փրկեաց զժողովուրդդ ի ներքուստ ձեռինն Եգիպտացւոց:

11․ Արդ` գիտեմ թէ մեծ է Տէր քան զամենայն աստուածս: Վասն այնորիկ զի բռնանային ի վերայ դոցա:

12․ Եւ առ Յոթոր աներն Մովսիսի ողջակէզս եւ զոհս Աստուծոյ: Եւ գնացին Մովսէս եւ Ահարոն եւ ամենայն ծերքն Իսրայէլի` ուտել հաց ընդ աներոյն Մովսիսի առաջի Տեառն:

13․ Եւ եղեւ ի վաղիւ անդր, նստաւ Մովսէս դատել զժողովուրդն. եւ կայր ամենայն ժողովուրդն  շուրջ զՄովսիսիւ, յայգուէ մինչչեւ ցերեկոյ:

14․ Եւ տեսեալ Յոթորայ զամենայն ինչ զոր առներ ժողովրդեանն. Եւ ասէ. Զի՞նչ է բանդ այդ զոր առնես ժողովրդեանդ. ընդ է՞ր դու նստիս միայն, եւ ամենայն ժողովուրդդ կայ շուրջ զքեւ յառաւաւտէ մինչչեւ յերեկոյ:

15․ Եւ ասէ Մովսէս ցաներն իւր. Քանզի գայ ժողովուրդդ առ իս, խնդրել իրաւունս յԱստուծոյ:

16․ Յորժամ լինիցի ինչ դոցա հակառակութիւն, գան առ իս. եւ ես ընտրեմ ի մէջ իւրաքանչիւր ուրուք. եւ իմացուցանեմ դոցա զհրամանն Աստուծոյ եւ զաւրէնս նորա:

17․ Եւ ասէ ցնա աներն Մովսիսի. Ոչ է ուղիղ բանդ զոր առնես:

18․ Անհնարին տանջանաւք տանջիս դու` եւ ամենայն ժողովուրդդ որ է ընդ քեզ: Ծանր է քեզ բանդ այդ. ոչ կարես միայն առնել:

19․ Բայց արդ` լուր ինձ, եւ տաց քեզ խրատ. եւ եղիցի Աստուած ընդ քեզ: Լեր դու ժողովրդեանդ առ ի յԱստուծոյ, եւ տարցիս զբանս դոցա առ Աստուած:

20․ Եւ դիցես դոցա վկայութիւն զհրամանացն Աստուծոյ եւ զաւրինաց նորա. եւ ցուցցես դոցա ճանապարհս յորս գնայցեն, եւ զգործս զոր գործիցեն:

21․ Եւ դու տես քեզ յամենայն ժողովրդենէդ արս զաւրաւորս` աստուածապաշտս. արս արդարակորովս, որ ատիցեն զհպարտութիւն. եւ կացուսցես զնոսա ի վերայ դոցա հազարապետս, եւ հարիւրապետս, եւ յիսնապետս, եւ տասնապետս:

22․ Եւ դատեսցին զժողովուրդդ յամենայն ժամ. եւ զբան ինչ մեծ, առ քեզ հասուցանիցեն. եւ զփոքր ինչ դատաստան` ինքեանք դատեսցին. եւ թեթեւացուսցես ի քէն, եւ եղիցին քեզ աւգնականք:

23․ Եթէ զայս բան արասցես, զաւրացուսցէ զքեզ Աստուած. եւ կարասցես տոկալ. եւ ամենայն ժողովուրդդ երթիցէ ի տեղի իւր խաղաղութեամբ:

24․ Եւ լուաւ Մովսէս ձայնի աներոյն իւրոյ. եւ արար զամենայն որ միանգամ ասաց նմա:

25․ Եւ ընտրեաց Մովսէս յամենայն Իսրայէլէ արս զաւրաւորս. եւ արար զնոսա ի վերայ նոցա հազարապետս, եւ հարիւրապետս, եւ յիսնապետս, եւ տասնապետս.

26․ եւ դատէին զժողովուրդն յամենայն ժամ: Բայց զբան ինչ մեծ հասուցանէին առ Մովսէս. եւ զամենայն բան թեթեւ` ինքեանք դատէին:

27․ Եւ արձակեաց Մովսէս զաներն իւր, եւ գնաց յերկիր իւր: