Գլուխ 25

   
1․ Եւ խաւսեցաւ Տէր ընդ Մովսիսի եւ ասէ.

2․ Ասասցես ցորդիսն Իսրայէլի. եւ առէք ինձ պտուղ ի նոցանէ, որոց հաճոյ թուեսցի ի սիրտս իւրեանց եւ առնուցուք զպտուղս իմ:

3․ Եւ այս է պտուղն զոր առնուցուք ի նոցանէ. ոսկի, եւ արծաթ, եւ պղինձ,

4․ եւ կապուտակ, եւ ծիրանի. եւ կարմիր կրկին, եւ բեհէզ մանեալ. եւ մազ այծեաց.

5․ եւ մորթս խոյոց կարմիր ներկեալ. եւ մորթս կապուտակեալս. եւ փայտս անփուտս:

6․ Եւ եւղ լուսոյ եւ խունկս յեւղ աւծման` եւ ի հանդերձանս խնկոց:

7․ Եւ ականս սարդիոնս. Եւ ականս գրոյ ի գործ վակասին. եւ զպճղնաւորն:

8․ Եւ արասցես ինձ սրբութիւն, եւ երեւեցայց ձեզ:

9․ Եւ արասցես ինձ ըստ ամենայնի զոր ցուցից քեզ ի լերինն. աւրինակ խորանի` եւ աւրինակ ամենայն սպասուց նորա:

10․ Եւ այսպէս արասցես: Արասցես տապանակ վկայութեան յանփուտ փայտից: Յերկուց կանգնոց եւ ի կիսոյ զերկայնութիւն նորա, եւ ի կանգնոյ եւ ի կիսոյ զլայնութիւն նորա, եւ ի կանգնոյ եւ կիսոյ զբարձրութիւն նորա:

11․ Եւ պատեսցես զնա ոսկւով սրբով ներքոյ, եւ արտաքոյ աւծցես զնա: Եւ արասցես նմա ծնաւտս ոսկիս շուրջ շրջանակաւ:

12․ Եւ ձուլեսցես նմա չորս աւղամանեակս ոսկիս. եւ դիցես ի չորեցունց կողմանց նորա երկուս աւղամանեակս ի միոջէ կողմանէ. եւ երկուս աւղամանեակս ի միւսմէ կողմանէ:

13․ Եւ արասցես լծակս յանփուտ փայտից. եւ պատեսցես զնոսա ոսկւով:

14․ Եւ ագուսցես զլծակսն` յաւղամանեակսն ի կողմանս տապանակին, բառնալ նոքաւք զտապանակն:

15․ Զի յաւղամանեակս տապանակի կտակարանացն կայցեն լծակքն, անշարժք անդստին ի նմանէ:

16․ Եւ դիցես ի տապանակին զվկայութիւնսն զոր ես տաց քեզ:

17․ Եւ արասցես զքաւութիւնն խնկակալ յոսկւոյ սրբոյ: Յերկուց կանգնոց եւ ի կիսոյ զերկայնութիւն նորա, եւ ի կանգնոյ եւ ի կիսոյ զլայնութիւն նորա:

18․ Եւ արասցես երկուս քրոբէս ոսկիս ճախարակեայս եւ դիցես զնոսա ի վերայ երկոցունց կողմանց քաւութեանն:

19․ Եւ լինիցին քրոբէքն` մի ի միոջէ կողմանէ, եւ մի ի միւսմէ կողմանէ քաւութեանն:

20․ Եւ արասցես երկուս քրոբէս ի վերայ երկոցունց կողմանց նորա: Եւ իցէ քրոբէիցն տարածեալ զթեւս իւրեանց ի վերուստ. եւ հովանի ունիցին թեւաւք իւրեանց ի վերայ քաւութեանն. եւ երեսք նոցա յանդիման միմեանց, զի ի քաւութիւնն հայեսցին երեսք քրոբէիցն: Եւ դիցես զքաւութիւնն ի վերայ տապանակին ի վերուստ կողմանէ:

21․ Եւ դիցես ի տապանակի անդ զվկայութիւնսն զոր ես տաց քեզ:

22․ Եւ յայտնեցայց քեզ անտի. եւ խաւսեցայց ընդ քեզ ի վերուստ ի քաւութենէ անտի. ի միջոյ երկուց քրոբէիցն, որ իցեն ի վերայ տապանակին վկայութեան, ըստ ամենայնի զոր պատուիրեցի քեզ առ որդիսն Իսրայէլի:

23․ Եւ արասցես սեղան յանփուտ փայտից. յերկուց կանգնոց զերկայնութիւն նորա, եւ ի կանգնոյ զլայնութիւն նորա, եւ ի կանգնոյ եւ ի կիսոյ զբարձրութիւն նորա:

24․ Եւ պատեսցես զնա ոսկւով սրբով. Եւ արասցես նմա ծնաւտս ոսկիս շուրջանակաւ շուրջանակի:

25․ Եւ արասցես նմա պսակ ուղկեան շուրջանակի: Եւ արասցես պսակին ծնաւտս շուրջանակաւ շուրջանակի:

26․ Եւ արասցես նմա չորս աւղամանեակս ոսկիս. եւ դիցես զաւղամանեակսն ի չորեսին կողմանսն, որ իցեն չորեցունց ոտից նորա,

27․ ի ներքոյ պսակին. եւ եղիցին աւղամանեակքն լամբք լծակացն, բառնալ նոքաւք զսեղանն:

28․ Եւ արասցես զլծակսն յանփուտ փայտից, եւ պատեսցես զնոսա ոսկւով սրբով. եւ բարձցի նոքաւք սեղանն:

29․ Եւ արասցես զխնկաղացսն եւ զտուփս նորա, եւ զճաշակս, եւ զնուիրանոցս, որովք նուիրեսցես. յոսկւոյ սրբոյ արասցես զայն:

30․ Եւ դիցես ի վերայ սեղանոյ` հացին երեսաց յանդիման իմ հանապազորդ:

31․ Եւ արասցես աշտանակ յոսկւոյ սրբոյ. ճախարակեայ գործեսցես զաշտանակն. զի բունն, եւ ստեղունքն, եւ սկահքն, եւ գնդակքն, եւ շուշանքն` անդստին ի նմանէ իցէ:

32․ Վեց ստեղունք արձակեալք ի կողմանց նորա. երեք ստեղունք աշտանակին ի միոջէ կողմանէ. եւ երեք ստեղունք աշտանակին ի միւսմէ կողմանէ:

33․ Եւ երեք սկահաձեւք ընկուզազարդք յաւրինեալք ի միում ստեղանն. եւ գնդակ եւ շուշան. եւ երեք սկահաձեւք ընկուզազարդք յաւրինեալք ի միւսում ստեղանն. եւ գնդակ եւ շուշան. նոյնպէս վեցեցունց ստեղանցն արձակելոց յաշտանակէ անտի:

34․ Եւ յաշտանակի անդ չորք սկահաձեւք ընկուզազարդք յարդարեալք. եւ գնդակք եւ շուշանք նորա:

35․ Գնդակ ի ներքոյ երկուց ստեղանցն անդստին ի նմանէ, եւ գնդակ ի ներքոյ երկուց եւս ստեղանցն անդստին ի նմանէ. նոյնպէս արասցես վեցեցունց ստեղանցն արձակելոց յաշտանակէ անտի:

36․ Զի գնդակք նոցա եւ ստեղունք անդստին ի նմանէ իցեն. համակ ճախարակեայ ի միոջէ ոսկւոյ սրբոյ:

37․ Եւ արասցես նմա ճրագարանս եւթն. եւ դիցես զճրագարանսն ի վերայ աշտանակին. եւ տայցեն լոյս ի միոջէ կողմանէ երեսաց նորա:

38․ Եւ զբազմակալս նորա, եւ զնեցուկսն արասցես յոսկւոյ սրբոյ:

39․ Ի տաղանդէ միոյ յոսկւոյ սրբոյ արասցես զայն ամենայն սպաս:

40․ Զգոյշ լեր որպէս ցուցաւ քեզ աւրինակ ի լերինն` արասցես: