1․ Եւ արասցես խորան տասնփեղկեան: Ի բեհեզոյ մանելոյ, եւ ի կապուտակէ, եւ ի ծիրանւոյ, եւ ի կարմրոյ կրկնելոյ: Քերոբ` գործ անկուածոյ գործեսցես զնոսա:
2․ Երկայնութիւն միոյ փեղկին ի քսանեւյութ կանգնոյ, եւ լայնութիւն ի չորից կանգնոց փեղկի միոյ լինիցի: Չափ` նոյն եղիցի ամենայն փեղկիցն:
3․ Հինգ փեղկ ընդ միմեանս կցեալ. եւ հինգ եւս այլ ընդ միմեանս խառնեալ:
4․ Եւ արասցես ճարմանդս կապուտակեայս առ եզերբ միոյ փեղկին ի միոջէ կողմանէ խառնուածսն: Նոյնպէս արասցես եւ առ եզերբ արտաքնոյ փեղկին, երկրորդի խառնուածոյն:
5․ Յիսուն ճարմանդ արասցես միում փեղկի. եւ յիսուն ճարմանդ արասցես ի կողմանէ փեղկին ըստ երկրորդի խառնուածոյն. դէմ ընդդէմ միմեանց խառնիցն իւրաքանչիւր ճարմանդքն:
6․ Եւ արասցես յիսուն աւղս ոսկիս` եւ խառնեսցես զփեղկսն ընդ միմեանս աղխիւքն. եւ եղիցի խորան մի:
7․ Եւ արասցես վերնափեղկս մազեղէնս նուարտան խորանին, մետասան փեղկ գործեսցես զնոսա:
8․ Երկայնութիւն միոյ փեղկի` լինիցի յերեսուն կանգնոյ. եւ լայնութիւն միոյ փեղկի` ի չորից կանգնոց: Չափ` նոյն եղիցի մետասանեցունց փեղկիցն:
9․ Եւ խառնեսցես ընդ միմեանս զհինգ փեղկն ի միասին, եւ զվեց փեղկն ի միասին: Եւ կրկնեսցես զվեցերորդ փեղկն առաջոյ կողմանէ խորանին:
10․ Եւ արասցես ճարմանդս յիսունս առ եզերբ միոյ փեղկին ի մէջ խառնածոյն: Եւ յիսուն ճարմանդ արասցես առ եզերբ փեղկին երկրորդի խառնուածոյն:
11․ Եւ արասցես աւղս պղնձիս յիսուն, եւ խառնեսցես զաւղսն ընդ ճարմանդսն. եւ կցեսցես զփեղկսն` եւ եղիցին մի:
12․ Եւ դիցես զաւելորդ փեղկին ի ներքոյ խորանին. կիսով փեղկիւն աւելորդաւ մնացելով ծածկեսցես զապարումս փեղկից խորանին յետոյ կողմանէ,
13․ կանգնաւ` յայսմ կողմանէ, եւ կանգնաւ` յայնմ կողմանէ. յաւելորդէ երկայնութեան փեղկից խորանին. եւ եղիցի ծածկել զապարումս խորանին աստի անտի:
14․ Եւ արասցես զվիժակս խորանին ի շեկակարմիր մորթոց խոյոց: Եւ ծածկելիս ի կապուտակ մորթոյ ի վերուստ:
15․ Եւ արասցես զսիւնակս խորանին յանփուտ փայտից
16․ կանգնաւորս. ի տասն կանգնոյ զերկայնութիւն միոյ սիւնակին առնիցես: Եւ ի միոջէ կանգնոյ եւ ի կիսոյ
17․ զթանձրութիւն եւ զլայնութիւն միոյ սիւնակին: Եւ երկուս սփռիչս միում սիւնակի, ագուցեալ ընդ միմեանս. այնպէս արասցես ամենայն սիւնակաց խորանին:
18․ Եւ արասցես քսան սիւնակս խորանին ի հիւսւսոյ կողմանէ:
19․ Եւ քառասուն խարիսխս արծաթիս արասցես քսանեցունց սեանց: Երկու խարիսխք առ մի սիւն յերկոցունց կողմանց. եւ երկու խարիսխք առ մի սիւն յերկոցունց կողմանց խորանին:
20․ Եւ յերկրորդէ կողմանէ խորանին ընդ հարաւ քսան սիւն:
21․ Եւ քառասուն խարիսխք նոցա արծաթիք. երկու խարիսխք առ մի սիւն յերկոցունց կողմանց:
22․ Եւ յետուստ խորանին ի ծովակողմն կուսէ արասցես վեց սիւն:
23․ Եւ երկու սիւնս արասցես յանկիւնս խորանին ի թիկանց կողմանէ:
24․ Եւ եղիցին հասարակ ի ներքուստ: Եւ ըստ նմին աւրինակի լինիցին զոյգք խոյակաց նորա ի մի խառնուած: Նոյնպէս արասցես երկոցունց անկեանցն կանգնաւորս:
25․ Եւ եղիցի ութ սիւն. եւ խարիսխք նոցա արծաթիք` վեշտասան խարիսխք: Երկու խարիսխք առ մի սիւն յերկոցունց կողմանց նորա. եւ երկու խարիսխք առ մեւս եւս սիւն:
26․ Եւ արասցես նիգս յանփուտ փայտից. հինգ նիգ առ մի սիւն ի միոջէ կողմանէ խորանին,
27․ եւ հինգ նիգ առ մեւս եւս սիւն յերկրորդ կողմանէ խորանին. եւ հինգ նիգ առ մի սիւն ի թիկանց խորանին ընդ ծովակողմն:
28․ Եւ նիգ մի ի մէջ սեանցն թափանցանց` ի միոջէ կողմանէ ի միւս կողմն:
29․ Եւ զսիւնսն պատեսցես ոսկւով. եւ արասցես աւղս ոսկիս` յորս ագուցանիցես զնիգսն: Եւ պատեսցես զնիգսն ոսկւով:
30․ Եւ կանգնեսցես զխորանն վկայութեան` ըստ աւրինակին որ ցուցաւ քեզ ի լերինն:
31․ Եւ արասցես վարագոյր ի կապուտակէ, եւ ի ծիրանւոյ, եւ ի կարմրոյ մանելոյ, եւ ի բեհեզոյ նիւթելոյ. գործ անկուածոյ գործեսցես զնա քերաւբ:
32․ Եւ դիցես զնա ի վերայ չորեցունց անփուտ եւ ոսկիապատ սեանցն. եւ խոյակք նոցա ոսկիք. եւ խարիսխք նոցա արծաթիք:
33․ Եւ ձգեսցես զվարագոյրն սիւնէ ի սիւն: Եւ տարցիս ի ներքս քան զվարագոյրն զտապանակ վկայութեանն. եւ անջրպետիցէ ձեզ վարագոյրն ի մէջ սրբութեան, եւ ի մէջ սրբութեան սրբութեանցն:
34․ Եւ ծածկեսցես վարագուրաւն զտապանակ վկայութեանն ի սրբութիւն սրբութեանցն:
35․ Եւ դիցես զսեղանն արտաքոյ վարագուրին: Եւ զաշտանակն յանդիման սեղանոյն, ի կողմանէ խորանին ընդ հարաւ: Եւ զսեղանն դիցես ի կողմանէ խորանին ընդ հիւսւսի:
36․ Եւ արասցես սրահակ դրան խորանին. ի կապուտակէ, եւ ի ծիրանւոյ, եւ ի կարմրոյ մանելոյ, եւ ի բեհեզոյ նիւթելոյ. գործ նկարակերպ:
37․ Եւ արասցես վարագուրին հինգ սիւնակ յանփուտ փայտից. եւ աւծցես զնոսա ոսկւով: Եւ խոյակք նորա ոսկիք. եւ ձուլեսցես նոցա հինգ խարիսխ պղնձի:
Հաղորդում կայքում սխալի վերաբերյալ
Տվյալ հատվածում առկա է սխալ: