1․ Եւ դու մատուսցես առ քեզ զԱհարոն զեղբայր քո. եւ զորդիս նորա ընդ նմա` յորդւոցն Իսրայէլի, քահանայանալ ինձ. զԱհարոն, եւ զՆաբադ, եւ զԱբիուդ, եւ զԵղիազար, եւ զԻթամար զորդիս Ահարոնի:
2․ Եւ արասցես պատմուճան սուրբ` Ահարոնի եղբաւր քում, ի պատիւ եւ ի փառս:
3․ Եւ դու խաւսեսցիս ընդ ամենայն իմաստունս մտաւք, զորս լցուցից հոգւով իմաստութեան: Եւ արասցեն պատմուճան սուրբ` Ահարոնի ի սրբութիւն, որովք քահանայանայցէ ինձ:
4․ Եւ այս աւրինակ պատմուճանացն` զոր առնիցեն. զպճղնաւորն, եւ զվակաս` զուսովք եւ զլանջաւք. եւ զպատմուճանն բեհեզեայ. եւ խոյր. եւ կամար: Եւ արասցեն պատմուճան սուրբ Ահարոնի եղբաւր քում, եւ որդւոց նորա ի քահանայանալ ինձ:
5․ Եւ առցեն նոքա ոսկի, եւ կապուտակ, եւ ծիրանի, եւ կարմիր մանեալ, եւ բեհեզ:
6․ Եւ արասցեն զվակասն յոսկւոյ սրբոյ, եւ ի կապուտակէ եւ ի ծիրանւոյ, եւ ի կարմրոյ մանելոյ, եւ ի բեհեզոյ նիւթելոյ. գործ ոստայնի նկարակերպ:
7․ Երկու վակասք ընդ միմեանս խառնեալք, եղիցին ի վերայ երկոցունց կողմանց նորա հաստատեալք:
8․ Եւ գործ վակասին` որ իցէ ի վերայ նորա. ըստ նմին աւրինակի գործ անդստին ի նմանէ լինիցի. յոսկւոյ սրբոյ եւ ի կապուտակէ, եւ ի ծիրանւոյ, եւ ի կարմրոյ մանելոյ, եւ ի բեհեզոյ նիւթելոյ:
9․ Եւ առցես երկուս ականս զմրուխտս, եւ դրեսցես ի նոսա զանուանս որդւոցն Իսրայէլի.
10․ զվեց անուն նոցա ի միում ական. եւ զայլն եւս վեց` յերկրորդում ականն. ըստ ազգի իւրեանց.
11․ գործ ճարտարութեան ակնագործաց. քանդակ կնքոյ քանդակեսցես զերկոսին ականսն. ըստ անուանց որդւոցն Իսրայէլի: Տպաւորեալս եւ քանդակեալս ոսկւով արասցես զնոսա:
12․ Եւ դիցես զերկուս ականսն ի վերայ ուսոց վակասին. զի լինիցին ականքն յիշատակ որդւոցն Իսրայէլի: Եւ բառնայցէ Ահարոն զանուանս որդւոցն Իսրայէլի առաջի Տեառն, ի վերայ երկուց ուսոց իւրոց` յիշատակ վասն նոցա:
13․ Եւ արասցես վահանակս յոսկւոյ սրբոյ:
14․ Եւ արասցես երկուս վերջս յոսկւոյ սրբոյ. մանուածոյս ծաղկեալս` գործ հիւսկէն. եւ դիցես զվերջսն մանուածոյս ի վերայ երկոցուն վահանակացն
15․ առ վտաւակաւքն նոցա առաջոյ կողմանէ: Եւ արասցես զտախտակն դատաստանաց գործ նկարակերպ. ըստ ձեւոյ վակասին արասցես զնա. յոսկւոյ, եւ ի կապուտակէ, եւ ի ծիրանւոյ, եւ ի կարմրոյ մանելոյ, եւ ի բեհեզոյ նիւթելոյ:
16․ Եւ արասցես զնա չորեքանկիւնի, թզաւ յերկայնութիւն, եւ թզաւ ի լայնութիւն:
17․ Եւ ընդելուզցես ի նմա ընդելուզածս, ըստ չորեքկարգեան ականց: Կարգս ականց, առաջին` զըմրուխտ, եւ սարդիոն, եւ տպազիոն. կարգ մի:
18․ Եւ կարգն երկրորդ` կարկեհան, եւ շափիղա, եւ յասպիս:
19․ Եւ կարգն երրորդ` գոճազմ, եւ ակատ, եւ սուտակ:
20․ Եւ կարգն չորրորդ` յակինթ, եւ բիւրեղ, եւ եղունգն: Ընդելուզեալ, յոսկի կապեալ` յիւրաքանչիւր կարգս կայցեն:
21․ Եւ եղիցին ականքն յանուանց որդւոցն Իսրայէլի երկոտասան. ըստ անուանց նոցա գրեալք քանդակաւ իւրաքանչիւր ըստ անուան իւրում լինիցին. ըստ ազգացն երկոտասանից:
22․ Եւ արասցես տախտակ մի հիւսկէն վերջիւք. գործ շղթայագործ յոսկւոյ սրբոյ:
23․ Եւ արասցես ի վերայ տախտակին երկուս աւղս ոսկիս. եւ դիցես զերկուս աւղսն ի վերայ երկուց ծայրից տախտակին:
24․ Եւ դիցես զերկու շղթայագործսն ոսկիս ի վերայ երկոցուն աւղոցն առ ծայրիւք տախտակին:
25․ Եւ զերկուս ծայրս երկուց շղթայագործիցն տացես ի վերայ երկոցունց մած. եւ դիցես ի վերայ թիկանց վակասին ի ճակատ երեսաց նորա:
26․ Եւ արասցես երկուս աւղս ոսկիս, եւ տացես զնոսա ի վերայ ծայրից տախտակին, առ եզերբն որ իցէ հանդէպ վակասին ի ներքոյ կողմանէ:
27․ Եւ արասցես երկուս աւղս ոսկիս, եւ տացես զնոսա ի վերայ երկուց ուսոց վակասին ի ներքոյ կողմանէ` յանդիման միմեանց միաբան. եւ զաղխս նորա ի վերայ մեքենայից վակասին:
28․ Եւ պինդ ունիցին զտախտակն յաւղոց նորա` մինչչեւ ցաւղս վակասին, ի նիւթոյ կապուտակէ. զի իցէ ի վերայ մեքենայից վակասին. եւ մի զերծանիցի տախտակն ի վակասէ անտի:
29․ Եւ առցէ Ահարոն զանուն որդւոցն Իսրայէլի ի վերայ տախտակի դատաստանին` ի լանջս իւր, ի մտանել իւրում ի սրբութիւնն ի յիշատակ հանապազորդ առաջի Աստուծոյ:
30․ Եւ դիցես ի վերայ տախտակին դատաստանի զվերջսն շղթայագործս` յերկոցունց կողմանց տախտակին դիցես: Եւ զերկուս վահանակսն դիցես ի վերայ երկուց ուսոց վակասին յերեսաց կողմանէ ի ներքուստ: Եւ դիցես ի վերայ տախտակին դատաստանի զյանդիմանութիւն եւ զճշմարտութիւն. եւ եղիցի ի վերայ լանջացն Ահարոնի յորժամ մտանիցէ ի սրբութիւնսն առաջի Տեառն: Եւ տարցի Ահարոն զդատաստանս որդւոցն Իսրայէլի ի վերայ լանջաց իւրոց առաջի Տեառն հանապազ:
31․ Եւ արասցես վտաւակս պճղնաւորս համակ կապուտակ.
32․ եւ զաւձիսն գրապանաւ արարեալ, բոլորակ ձեւեսցես շուրջանակի` գործ անդուածոյ: Եւ զխառնուածսն անկեալ անդստին ի նմանէ. զի մի արատիցի:
33․ Եւ արասցես առ ստորոտով` վտաւակացն ի ներքոյ կողմանէ` իբրեւ նռնաձեւս ծաղկեալս, ի կապուտակէ եւ ի ծիրանւոյ, եւ ի կարմրոյ մանելոյ, եւ ի բեհեզոյ նիւթելոյ առ ստորոտով վտաւակացն շուրջանակի. եւ տեսիլ նորա նռնաձեւ, եւ զանգակս ոսկիս ի մէջ նոցա շուրջանակի:
34․ Զանգակս ոսկի եւ նռնաձեւ` ծաղկեալ առ ստորով վտաւակացն շուրջանակի:
35․ Եւ եղիցի ի վերայ Ահարոնի յորժամ պաշտիցէ` հնչիւն բարբառոյ ի մտանել իւրում ի սրբութիւնն առաջի Տեառն, եւ յելանել նորա` զի մի մեռանիցի:
36․ Եւ արասցես թիթեղն յոսկւոյ սրբոյ. եւ քանդակեսցես ի նմա քանդակ կնքոյ` սրբութիւն Տեառն:
37․ Եւ դիցես զնա ի վերայ կապուտակին մանելոյ. եւ եղիցի ի խուրին յերեսաց կողմանէ
38․ ի վերայ ճակատուն Ահարոնի: Եւ բարձցէ Ահարոն զմեղս նուիրացն, որչափ ինչ նուիրիցեն որդիքն Իսրայէլի, ըստ ամենայն տրոց սրբութեանցն իւրեանց. եւ եղիցի ի վերայ ճակատուն Ահարոնի հանապազ յընդունելութիւն նոցա առաջի Տեառն:
39․ Եւ զպճղնաւոր պատմուճանն ի բեհեզոյ: Եւ արասցես ապարաւշս բեհեզեղէնս. եւ կամար` գործ նկարակերպ:
40․ Եւ որդւոցն Ահարոնի արասցես պատմուճանս, եւ կամարս, եւ խոյրս. ի պատիւ եւ ի փառս:
41․ Եւ զգեցուսցես զայն Ահարոնի եղբաւր քում, եւ որդւոց նորա ընդ նմա: Եւ աւծցես զնոսա. եւ լցցես զձեռս նոցա. եւ սրբեսցես զնոսա` զի քահանայասցին ինձ:
42․ Եւ արասցես նոցա անդրավարտիս կտաւեայս. ծածկել զառականս մարմնոց իւրոց, միջովք չափ եւ բարձիւք չափ:
43․ Եւ ունիցի զայն Ահարոն եւ որդիք նորա, յորժամ մտանիցեն ի խորանն վկայութեան. կամ յորժամ մերձենայցեն ի սեղանն սրբութեան պաշտել: Եւ մի ածիցեն ի վերայ իւրեանց մեղս` զի մի մեռանիցին: 0րէն յաւիտենական նմա եւ զաւակի իւրում յետ նորա:
Հաղորդում կայքում սխալի վերաբերյալ
Տվյալ հատվածում առկա է սխալ: