1․ Խաւսեցաւ Տէր ընդ Մովսիսի եւ ասէ.
2․ Ահաւադիկ յանուանէ կոչեցեալ է իմ զԲեսէլիէլ զՈւրիան, զորդի Ովրայ յազգէ Յուդայ:
3․ Եւ լցուցից զնա աստուածեղէն հոգւով իմաստութեան, եւ հանճարոյ եւ գիտութեան ամենայն գործոյ,
4․ խելամուտ լինել, եւ ճարտարապետել: Գործել զոսկին եւ զարծաթ եւ զպղինձ:
5․ Զկապուտակն, եւ զծիրանին, եւ զկարմիրն մանեալ. եւ զականակապն ի լրութիւն գործոյն. եւ զհիւսնութիւն փայտից, գործել ըստ ամենայն գործոյ:
6․ Եւ ես ահա ետու զնա, եւ զԵղիաբ զԱքիսամայ յազգէ Դանայ. եւ ի սիրտ ամենայն իմաստնոյ ետու զիմաստութիւն, եւ արասցեն զամենայն զոր միանգամ պատուիրեցի քեզ:
7․ Զխորանն վկայութեան. եւ զտապանակ կտակարանաց. եւ զքաւութիւնն որ ի վերայ նորա. եւ զամենայն սպաս խորանին. եւ զզոհանոցսն.
8․ եւ զսեղանն եւ զամենայն զկահ նորա. եւ զաշտանակն սուրբ եւ զամենայն զկահ նորա. եւ զսեղան խնկոցն.
9․ եւ զսեղան ողջակիզացն եւ զամենայն զկահ նորա. զաւազանն եւ զխարիսխ նորա.
10․ եւ զպատմուճանս պաշտամանն. եւ զհանդերձս սրբութեանն զԱհարոնի քահանայի. եւ զպատմուճանս որդւոց նորա քահանայանալ ինձ:
11․ Եւ զեւղն աւծութեան եւ զխունկս հանդերձանաց սրբութեանն: Եւ զամենայն զոր միանգամ պատուիրեցի քեզ`
արասցես:
12․ Խաւսեցաւ Տէր ընդ Մովսէիի եւ ասէ.
13․ Եւ դու խաւսեաց ընդ որդիսն Իսրայէլի` եւ ասասցես. Զգոյշ կացէք պահելոյ զշաբաթս իմ. զի նշանակ է ընդ իս եւ ընդ ձեզ յազգս ձեր. զի ծանիջիք թէ ես եմ Տէր որ սրբեմ զձեզ.
14․ եւ պահեսջիք զշաբաթս, զի սրբութիւն է այն Տեառն, եւ ձեզ: Որ պղծեսցէ զնա` մահու մեռցի. ամենայն որ գործիցէ ի նմա գործ, սատակեսցի անձնն այն ի միջոյ ժողովրդեան իւրոյ:
15․ Զվեց աւր գործեսցես գործ. եւ յաւուրն եւթներորդի շաբաթ հանգստեան սրբութիւն Տեառն. ամենայն որ գործեսցէ գործ յաւուր շաբաթու` մահու մեռցի:
16․ Եւ պահեսցեն որդիքն Իսրայէլի զշաբաթս, առնել զնոսա յազգս ձեր. ուխտ յաւիտենական
17․ ընդ իս եւ ընդ որդիսն Իսրայէլի: Նշանակ իմ է յաւիտենական. զի զվեց աւր արար Աստուած զերկինս եւ զերկիր, եւ յաւուրն եւթներորդի դադարեաց եւ հանգեաւ:
18․ Եւ ետ Մովսիսի` իբրեւ դադարեաց ինքն ի խաւսից իւրոց ի լերինն Սինա, զերկուս տախտակսն վկայութեան, տախտակս քարեղէնս գրեալս մատամբն Աստուծոյ:
Հաղորդում կայքում սխալի վերաբերյալ
Տվյալ հատվածում առկա է սխալ: