Գլուխ 9

   
1․ Լուր Իսրայէլ. դու անցանես այսաւր ընդ Յորդանան մտանել եւ ժառանգել զազգսն մեծամեծս եւ զաւրագոյնս քան զձեզ. եւ քաղաքս պարսպաւորս եւ մեծամեծս.

2․ զժողովուրդն մեծ եւ զբազում եւ զյաղթանդամ, զորդիսն Ենակայ զոր դու իսկ գիտես. եւ լուար էթէ ով կայցէ ընդ դէմ որդւոցն Ենակայ:

3․ Եւ ծանիցես այսաւր` զի տէր Աստուած քո նա է: նա ինքնին երթիցէ առաջի քո, որ Հուրն ծախիչ է. նա սատակեսցէ զնոսա. եւ նա կործանեսցէ զնոսա առաջի երեսաց քոց. եւ սատակեսցէ զնոսա եւ կորուսցէ զնոսա վաղվաղակի. որպէս եւ ասաց քեզ Տէր:

4․ Մի ասիցես ի սրտի քում ի ծախել զնոսա տեառն Աստուծոյ քո` յառաջոյ քումմէ, թէ վասն արդարութեան իմոյ ած զիս Տէր ժառանգել զերկիրս զայս բարի` այլ վասն ամպարշտութեան ազգացն այնոցիկ սատակեսցէ զնոսա Տէր` յառաջոյ քումմէ:

5․ Քանզի ոչ վասն արդարութեան քո, եւ ոչ վասն ամբծութեան սրտի քո մտանես ժառանգել զերկիրն նոցա, այլ վասն անաւրէնութեան ազգացն այնոցիկ տէր Աստուած քո սատակեաց զնոսա յերեսաց քոց. եւ զի հաստատեսցէ զուխտն զոր երդուաւ Տէր հարցն մերոց Աբրահամու եւ Սահակայ եւ Յակովբա:

6․ Եւ ծանիցես այսաւր զի ոչ վասն արդարութեան քո տէր Աստուած քո տացէ քեզ զերկիրն բարի ժառանգել. զի ժողովուրդ խստապարանոց ես:

7․ Յիշեայ մի մոռանայցես ո՞րչափ բարկացուցեր զտէր Աստուած քո յանապատին. յաւրէ յորմէ ելէք յերկրէն Եգիպտացւոց, մինչչեւ եկիք ի տեղիս յայս, խեռութեամբ վարէիք ի Տեառն կողմն կոյս:

8․ Եւ ի Քորէբ` բարկացուցէք զՏէր, եւ բարկացաւ Տէր սատակել զձեզ.

9․ յելանել իմում ի լեառնն առնուլ զտախտակսն քարեղէնս, զտախտակս ուխտին զոր ուխտեաց Տէր ընդ ձեզ: Եւ եղէ ի  լերինն զքառասուն տիւ եւ զքառասուն գիշեր. հաց ոչ կերայ եւ ջուր ոչ արբի.

10․ եւ ետ ինձ Աստուած զերկոսին տախտակս քարեղէնս, գրեալ մատամբն Աստուծոյ. եւ ի նոսա գրեալ էին ամենայն պատգամքն` զոր խաւսեցաւ Տէր ընդ ձեզ ի լերինն յաւուրն եկեղեցւոյ:

11․ Եւ եղեւ յետ քառասուն տունջեան եւ քառասուն գիշերոյ, ետ ինձ Տէր զերկուս տախտակսն քարեղէնս, տախտակս ուխտի.

12․ եւ ասէ ցիս Տէր. Արի էջ վաղվաղակի աստի, զի անաւրինեցաւ ժողովուրդն քո զոր հաներ յերկրէն Եգիպտացւոց. անցին արդէն զճանապարհաւն զոր պատուիրեցեր նոցա, եւ արարին իւրեանց ձուլածոյ:

13․ Եւ ասէ ցիս Տէր. Խաւսեցայ ընդ քեզ միանգամ եւ երկիցս` եւ ասեմ. տեսի զժողովուրդդ զայդ, եւ ահա ժողովուրդ խստապարանոց է.

14․ Թոյլ տուր ինձ սատակել զդոսա, եւ ջնջեցից զանուն դոցա ի ներքոյ երկնից. եւարարից զքեզ յազգ մեծ եւ ի բազուկ հզաւր` եւ ի բազում, առաւել քան զայդ:

15․ Եւ դարձեալ իջի ի լեռնէ անտի, եւ լեառն բորբոքէր հրով, եւ երկու տախտակքն յերկոսին ձեռս իմում:

16․ Եւ տեսեալ էթէ մեղայք առաջի տեառն Աստուծոյ մերոյ, եւ արարէք ձուլածոյս, եւ անցէք զճանապարհաւն զոր պատուիրեաց Տէր:

17․ առեալ զերկոսին տախտակսն ի ձեռաց իմոց, խորտակեցի յանդիման ձեր:

18․ Եւ աղաչեցի առաջի Տեառն կրկին անգամ իբրեւ զառաջինն, զքառասուն տիւ եւ զքառասուն գիշեր. հաց ոչ կերայ` եւ ջուր ոչ արբի. վասն ամենայն մեղացն զոր մեղայք, առաջի տեառն Աստուծոյ ձերոյ. բարկացուցանել զնա:

19․ եւ զահի հարեալ եմ վասն բարկութեանն եւ սրտմտութեանն. զի բարկացաւ Տէր ի վեր ձերայ սատակել զձեզ: եւ լուաւ ինձ Տէր ի ժամանակի յայնմիկ:

20․ Եւ Ահարովնի բարկացաւ Տէր յոյժ սատակել զնա. եւ արարի աղաւթս վասն Ահարովնի ի ժամանակին յայնմիկ:

21․ եւ զմեղս ձեր զոր արարէք զորթն, առի եւ այրեցի զնա հրով. եւ կոտորեցի եւ խորտակեցի զնա յոյժ, մինչչեւ եղեւ մանր իբրեւ զփոշի, եւ ընկեցի զփոշին ի վտակն որ իջանէր ի լեռնէ անտի:

22․ Եւ ի հրայրեացսն, եւ ի փորձութեանն, եւ ի գերեզմանսն ցանկութեանն բարկացուցէք զտէր Աստուած ձեր:

23․ Եւ յորժամ առաքեաց զձեզ Տէր ի Կադէսբառնեայ, ասէ. Ելէք ժառանգեցէք զերկիրն զոր տալոց եմ ձեզ. հեստեցէք բանի տեառն Աստուծոյ ձերում, եւ ոչ հաւատացէք նմա, եւ ոչ լուարուք ձայնի Տեառն:

24․ զի հեստեալ կայիք ի տեառնակողմն կոյս, յաւրէ յորմէ ծանուցաւ ձեզ:

25․ Եւ աղաչեցի առաջի Տեառն զքառասուն տիւ եւ զքառասուն գիշեր, զորս աղաչեցի. քանզի ասաց Տէր սատակել զձեզ.

26․ եւ կացի յաղաւթս առ Տէր` եւ ասեմ. Տէր Տէր, թագաւոր աստուածոց. մի սատակեր զժողովուրդ քո եւ զբաժին քո` զոր փրկեցեր զաւրութեամբ քո մեծաւ. զորս հաներ յԵգիպտոսէ զաւրութեամբ քով մեծաւ, եւ կարող ձեռամբ, եւ բարձր բազկաւ:

27․ Յիշեա դու զԱբրահամ եւ զԻսահակ եւ զՅակովբ` զծառայս քո, որոց երդուար քեւ: մի հայիր ի խստութիւն ժողովրդեանդ այդորիկ, եւ յամպարշտութիւն եւ ի մեղս դոցա:

28․ Գուցէ խաւսիցին բնակիչք երկրին ուստի հաներ զմեզ, եւ ասիցեն. Առ չկարելոյ Տեառն տանել զնոսա յերկիրն զոր խոստացաւ նոցա, եւ առ ատեալ էհան զնոսա կոտորել զնոսա յանապատին:

29․ Եւ սոքա ժողովուրդ քո եւ ժառանգութիւն քո` զոր հաներ յերկրէն Եգիպտացւոց զաւրութեամբ քով մեծաւ` եւ բարձր բազկաւ: