Գլուխ 10

   
1․ Խաւսեցաւ Տէր ընդ Մովսիսի` եւ ասէ. Մուտ առ փարաւոն` զի ես խստացուցի զսիրտ նորա եւ զսիրտ ծառայից նորա. զի կարգաւ եկեսցեն նշանքն իմ ի վերայ նոցա:

2․ Որպէս զի պատմիցէք յականջս որդւոց ձերոց, եւ որդւոց որդւոց ձերոց, որչափ խաղացի ես ընդ Եգիպտացիսդ. եւ զնշանս իմ զոր արարի ի նոսա. եւ ծանիջիք` թէ ես եմ Տէր:

3․ Մտին Մովսէս եւ Ահարոն առաջի փարաւոնի, եւ ասեն ցնա. Այսպէս ասէ Տէր Աստուածն Եբրայեցւոց. Մինչչեւ յե՞րբ ոչ կամիցիս ամաչել յինէն, արձակեա զժողովուրդ իմ զի պաշտեսցեն զիս:

4․ Ապա թէ ոչ կամիցիս դու արձակել զժողովուրդ իմ, ահաւասիկ ես ածից ի սոյն ժամու վաղիւ մարախ սաստիկ ի վերայ ամենայն սահմանաց քոց:

5․ Եւ ծածկեսցէ զամենայն երեսս երկրիդ. եւ ոչ կարիցես տեսանել զերկիր: Եւ կերիցէ զամենայն նշխարսն զոր եթող ձեզ կարկուտն. եւ կերիցէ զամենայն փայտ բուսեալ ձեզ ի վերայ երկրի:

6․ Եւ լցցին տունք քո, եւ տունք ծառայից քոց. եւ ամենայն տունք յամենայն երկրիդ Եգիպտացւոց. զոր ոչ երբէք տեսին հարք ձեր, եւ ոչ հաւք նոցա, յորմէ աւրէ եղեն յերկրի մինչչեւ ցայսաւր: Եւ խոյս տուեալ` ել ի փարաւոնէ:

7․ Ասեն ցնա ծառայքն փարաւոնի. Մինչչեւ ե՞րբ իցէ մեզ խոչդ այդ. արձակեա զմարդիկն` զի պաշտեսցեն զՏէր Աստուած իւրեանց. եթէ գիտե՞լ կամիցիս` զի  կորեաւ Եգիպտոս:

8․ Եւ դարձուցին զՄովսէս եւ զԱհարոն առ փարաւոն. եւ ասէ ցնոսա. Երթայք պաշտեցէք զՏէր Աստուած ձեր. բայց ո՞վ եւ ով իցեն որ երթայցեն:

9․ Եւ ասէ Մովսէս. Երիտասարդաւք հանդերձ` եւ ծերովք մերովք երթիցուք. ուստերաւք եւ դստերաւք մերովք. արջառով եւ ոչխարով մերով երթիցուք. զի տաւն է Տեառն Աստուծոյ մերոյ:

10․ Եւ ասէ ցնոսա. Եղիցի այդպէս. Տէր ընդ ձեզ. քանզի արձակեմ զձեզ, միթէ եւ զստացուածս ձեր: Տեսանէ՞ք զի չարիք կան ի ձեզ:

11․ Մի այդպէս. այլ երթիցեն արք եւ եթ, եւ պաշտեսցեն զԱստուած. քանզի զայդ իսկ խնդրէիք դուք: Եւ հանին զնոսա յերեսաց փարաւոնի:

12․ Եւ ասէ Տէր ցՄովսէս. Ձգեա զձեռն քո ի վերայ երկրիդ Եգիպտացւոց, եւ ելցէ մարախ ի վերայ երկրիդ Եգիպտացւոց, եւ կերիցէ զամենայն բանջար երկրիդ. եւ զամենայն պտուղ ծառոց զոր եթող կարկուտն:

13․ Եւ ամբարձ Մովսէս զձեռն իւր յերկինս. եւ ած Տէր հողմ հարաւոյ յերկիր զտիւն ամենայն եւ զգիշերն ամենայն: Իբրեւ առաւաւտ եղեւ, եւ հողմ հարաւոյ առ զմարախն,

14․ եւ եհան յամենայն երկիրն Եգիպտացւոց. եւ դադարեցոյց ի վերայ ամենայն սահմանացն Եգիպտացւոց: Յառաջ քան զայն ոչ եղեւ այնպիսի մարախ. եւ յետ այնորիկ ոչ եղեւ այնպիսի:

15․ Եւ ծածկեաց զամենայն երեսս երկրին. Եւ ապականեցաւ երկիրն. եւ եկեր զամենայն բանջար երկրին. եւ զամենայն պտուղ ծառոց, ուր մնաց ի կարկտէ անտի. եւ ոչ մնաց կանաչ, ոչ ի ծառս եւ ոչ յամենայն բանջար դաշտի յամենայն երկրին Եգիպտացւոց:

16․ Եւ փութացաւ փարաւոն կոչել զՄովսէս եւ զԱհարոն եւ ասէ. Մեղայ առաջի Տեառն Աստուծոյ ձերոյ եւ ձեզ:

17․ Արդ` ներեցէք այսմ եւս յանցանաց իմոց. եւ աղաչեցէք առ Տէր Աստուած ձեր, եւ փարատեսցէ յինէն զմարախս զայս:
18․ Եւ ել Մովսէս ի փարաւոնէ. եւ եկաց յաղաւթս առ Աստուած:

19․ Եւ դարձոյց Տէր հողմ սաստիկ ի ծովէ, եւ առ զմարախն եւ ամաց ի ծովն Կարմիր. եւ ոչ մնաց մարախ յամենայն երկիրն Եգիպտացւոց:

20․ Եւ խստացոյց Տէր զսիրտն փարաւոնի, եւ ոչ արձակեաց զորդիսն Իսրայէլի:

21․ Եւ ասէ Տէր ցՄովսէս. Ձգեա զձեռն քո յերկինս. եւ եղիցի խաւար ի վերայ երկրիդ Եգիպտացւոց. խաւար` շաւշափելի:

22․ Ձգեաց Մովսէս զձեռն իւր յերկինս. եւ եղեւ խաւար եւ մէգ եւ մութ ի վերայ ամենայն երկրին Եգիպտացւոց զերիս աւուրս:

23․ Եւ ոչ ոք տեսանէր զեղբայր իւր զերիս աւուրս: Եւ ոչ ոք յարեաւ յանկողնոյ իւրմէ զերիս աւուրս: Բայց ամենայն որդւոցն Իսրայէլի լոս էր յամենայն բնակութիւնս իւրեանց:

24․ Եւ կոչեաց փարաւոն զՄովսէս եւ զԱհարոն եւ ասէ ցնոսա. Երթայք պաշտեցէք զՏէր Աստուած ձեր, բայց զարջառ եւ զոչխար ձեր աստէն թողէք. եւ այլ աղխդ ձեր` երթիցեն ընդ ձեզ:

25․ Եւ ասէ Մովսէս. Նա եւ դու եւս տացես մեզ ողջակէզս եւ զոհս` զոր առնիցեմք Տեառն Աստուծոյ մերում:

26․ Այլ մեր անասուն իսկ երթիցէ ընդ մեզ, եւ ոչ թողուցումք եւ ոչ կճղակ մի. քանզի ի նոցանէ առնուցումք պաշտել զՏէր Աստուած մեր. եւ մեք ոչ գիտեմք զինչ մատուցանիցեմք Տեառն մերում մինչչեւ անդր հասանիցեմք:

27․ Եւ խստացոյց Տէր զսիրտն փարաւոնի. եւ ոչ կամեցաւ արձակել զնոսա:

28․ Եւ ասէ փարաւոն. Ի բաց գնա յինէն, զգոյշ լեր անձին քում. մի եւս յաւելուցուս տեսանել զերեսս իմ. զի յորում աւուր երեւիս դու ինձ` մեռանիս:

29․ Եւ ասէ Մովսէս. Ասացեր` Ոչ եւս երեւեցայց երեսաց քոց: