Գլուխ 6

   
1․ Եւ ասէ Տէր ցՄովսէս. Այժմ տեսցես զինչ արարից ընդ փարաւոն. զի հզաւր ձեռամբ արձակեսցէ ըզդոսա, եւ բարձրացեալ բազկաւ հանցէ զդոսա յերկրէ իւրմէ:

2․ Խաւսեցաւ Աստուած ընդ Մովսիսի, եւ ասէ ցնա. Ես եմ Տէր.

3․ եւ երեւեցայ Աբրաամու, Սահակայ եւ Յակոբայ. Աստուած նոցա եմ, եւ անուն իմ Տէր. եւ ոչ յայտնեցի նոցա:

4․ Եւ հաստատեցից զուխտ իմ առ նոսա. տալ նոցա զերկիրն Քանանացւոց` ուր պանդխտեցանն:

5․ Եւ ես լուայ հեծութեան որդւոցն Իսրայէլի զոր Եգիպտացիքդ ծառայեցուցանեն. եւ յիշեցի զուխտն ձեր:

6․ Երթ խաւսեաց ընդ որդիսն Իսրայէլի, եւ ասասցես. Ես եմ Տէր. եւ հանից զձեզ ի բռնութենէ Եգիպտացւոցդ, եւ փրկեցից զձեզ ի ծառայութենէ դոցա, եւ ապրեցուցից զձեզ բարձր բազկաւ եւ մեծամեծ դատաստանաւք:

7․ Եւ առից զձեզ ինձ ի ժողովուրդ. եւ եղէց ձեր Աստուած. եւ ծանիջիք թէ ես եմ Տէր Աստուած ձեր, որ հանեմ զձեզ յերկրէ Եգիպտացւոցդ:

8․ եւ տարայց զձեզ յերկիրն` յոր ձգեցի զձեռն իմ տալ զնա Աբրաամու Սահակայ եւ Յակոբայ. եւ տաց զնա ձեզ վիճակաւ, զի ես եմ Տէր:

9․ Խաւսեցաւ Մովսէս այնպէս ընդ որդիսն Իսրայէլի, եւ ոչ անսացին նմա ի կարճմտութենէ, եւ ի խիստ գործոյն:

10․ Խաւսեցաւ Տէր ընդ Մովսիսի` եւ ասէ.

11․ Մուտ խաւսեաց ընդ փարաւոնի արքային Եգիպտացւոց. զի արձակեսցէ զորդիսն Իսրայէլի յերկրէն Եգիպտացւոց:

12․ Խաւսեցաւ Մովսէս առաջի Տեառն եւ ասէ. Ահա որդիքն Իսրայէլի ոչ լուան ինձ. եւ զիա՞րդ լսիցէ ինձ փարաւոն. եւ ես չեմ խաւսաւղ ոք:

13․ Եւ խաւսեցաւ Տէր ընդ Մովսիսի եւ ընդ Ահարոնի. եւ ետ նոցա հրաման առ որդիսն Իսրայէլի, եւ առ փարաւոն արքայ Եգիպտացւոց. հանել զորդիսն Իսրայէլի յերկրէն Եգիպտացւոց:

14․ Եւ այս են նահապետք տանց ազգաց նոցա. որդիք Ռուբինի անդրանկանն Իսրայէլի. Ենոք, եւ Փաղղուս, Ասրոն, եւ Քարմի: Այս ցեղ` Ռուբինի:

15․ Եւ որդիք Շմաւոնի. Յամուէլ, եւ Յամին, եւ Ահովդ, եւ Յաքին, եւ Սահառ, եւ Սաւուղ որ ի Փիւնիկեցւոյ անտի էր: Այս ցեղք են որդւոցն Շմաւոնի:

16․ Եւ այս անուանք են որդւոցն Ղեւեայ, ըստ ազգս իւրեանց. Գեթսովն, Կահաթ, եւ Մերարի: Եւ ամք կենաց Ղեւեայ հարիւր երեսուն եւ եւթն ամ:

17․ Եւ այս են որդիք Գեթսոնի. Ղոբենի, եւ Սեմէի. տունք նահապետաց նոցա:

18․ Եւ որդիք Կահաթու. Ամրամ, եւ Սահառ, եւ Քեբրոն, եւ Ոզիէլ. եւ ամք կենաց Կահաթու, հարիւր եւ երեսուն եւ երեք ամ:

19․ Եւ որդիք Մերարեայ. Մոովղի եւ Մովսի. այս են տունք նահապետաց Ղեւեայ ըստ ազգաց իւրեանց:

20․ Եւ առ Ամրամ զՅովքաբեթ դուստր եղբաւր հաւր իւրոյ իւր ի կնութեան: Եւ ծնաւ նմա զԱհարոն, եւ զՄովսէս, եւ զՄարիամ քոյր նոցա. եւ ամք Ամրամայ հարիւր եւ երեսուն եւ եւթն ամ:

21․ Եւ որդիք Սահառայ. Կորխ, եւ Նագեբ, եւ Զեքրի:

22․ Եւ որդիք Ոզիէլայ. Միսայէլ, եւ Եղիսափան, եւ Սեթրի:

23․ Եւ առ Ահարոն զԵղիսաբեթ` դուստր Ամինադաբայ զքոյր Նաասոնի իւր կնութեան. եւ ծնաւ նմա զՆաբադ, եւ զԱբիուդ, եւ զԵղիազար, եւ Զիթամար:

24․ Եւ որդիք Կորխայ. Ասիր, եւ Եղկանայ, եւ Բիասափ. սոքա են ազգք Կորխայ:

25․ Եւ Եղիազար Ահարոնեան առ ի դստերաց անտի Փուտիէլի իւր կնութեան, եւ ծնաւ նմա զՓենէէս: Այս են իշխանք նահապետաց Ղեւտացւոցն ըստ ազգս իւրեանց:

26․ Եւ այս են Ահարոն եւ Մովսէս, ցորս ասաց Աստուած` հանել զորդիսն Իսրայէլի յերկրէն Եգիպտացւոց հանդերձ զաւրութեամբ իւրեանց:

27․ Եւ սոքա են որ վիճէին ընդ փարաւոնի արքային Եգիպտացւոց, հանել զորդիսն Իսրայէլի յԵգիպտոսէ: Այս է Մովսէս եւ Ահարոն.

28․ յաւուր յորում խաւսեցաւ Տէր ընդ Մովսիսի յերկրին Եգիպտացւոց:

29․ Եւ խաւսեցաւ Տէր ընդ Մովսիսի` եւ ասէ. Ես եմ Տէր: Խաւսեաց ընդ փարաւոնի արքային Եգիպտացւոց զամենայն ինչ զոր ասեմ քեզ:

30․ Եւ ասէ Մովսէս առաջի Տեառն. Ահաւասիկ ես նրբաձայն եմ. եւ զիա՞րդ լսիցէ ինձ փարաւոն: