Գլուխ 7

   
1․ Եւ ասէ Տէր ցՄովսէս. Ահա ետու զքեզ Աստուած փարաւոնի. եւ Ահարոն եղբայր քո եղիցի քեզ մարգարէ:

2․ Դու խաւսեսցիս ընդ նմա զամենայն ինչ` զոր պատուիրեմ քեզ: Եւ Ահարոն եղբայր քո խաւսեսցի ընդ փարաւոնի, արձակել զորդիսն Իսրայէլի յերկրէ իւրմէ:

3․ Եւ ես խստացուցից զսիրտն փարաւոնի. զի յաճախեցից զնշանս իմ եւ զարուեստս յերկրիդ Եգիպտացւոց.

4․ եւ ոչ լուիցէ ձեզ փարաւոն: Եւ արկից զձեռն իմ յԵգիպտոս. եւ հանից հանդերձ զաւրութեամբ իմով զժողովուրդ իմ, զորդիսն Իսրայէլի յերկրէդ Եգիպտացւոց, մեծաւ վրէժխնդրութեամբ:

5․ Եւ ծանիցեն Եգիպտացիքն, թէ ես եմ Տէր. եւ ձգեցից զձեռն իմ յԵգիպտոս, եւ հանից զորդիսն Իսրայէլի ի միջոյ նոցա:

6․ Եւ արարին Մովսէս եւ Ահարոն. որպէս պատուիրեաց նոցա Տէր, նոյնպէս եւ արարին:

7․ Եւ Մովսէս էր ամաց ութսնից. եւ Ահարոն էր որդի ամաց ութսուն եւ երից, յորժամ խաւսեցան ընդ փարաւոնի:

8․ Եւ խաւսեցաւ Տէր ընդ Մովսիսի եւ ընդ Ահարոնի` եւ ասէ.

9․ Եթէ խաւսիսցի ընդ ձեզ փարաւոն` եւ ասասցէ. Տուք մեզ նշան կամ արուեստ, ասասցես ցԱհարոն եղբայր քո. Առ դու զգաւազանդ, եւ ընկեա զդա ի գետին առաջի փարաւոնի եւ ծառայից նորա, եւ եղիցի վիշապ:

10․ Մտին Մովսէս եւ Ահարոն առաջի փարաւոնի, եւ արարին այնպէս, որպէս պատուիրեաց նոցա Տէր: Եւ ընկէց Ահարոն զգաւազանն առաջի փարաւոնի եւ առաջի ծառայից նորա, եւ եղեւ վիշապ:

11․ Եւ կոչեաց փարաւոն զիմաստունս Եգիպտացւոց եւ զկախարդս. եւ արարին գէտքն Եգիպտացւոց կախարդութեամբ իւրեանց նոյնպէս:

12․ Եւ ընկէց իւրաքանչիւր ոք զգաւազան իւր եւ եղեն վիշապք: Եւ եկուլ գաւազանն Ահարոնի զգաւազանս նոցա:

13․ Եւ կարծրացաւ սիրտն փարաւոնի, եւ ոչ լուաւ նոցա` որպէս խաւսեցաւ Տէր:

14․ Եւ ասէ Տէր ցՄովսէս. Կարծրացեալ է սիրտն փարաւոնի չարձակել զժորովուրդն:

15․ Երթ առ փարաւոն ընդ առաւաւտն. ահա նա ելանէ ի ջուրն, եւ կացցես հանդէպ նորա առ եզերբ գետոյն. Եւ զգաւազանն որ դարձաւ յաւձ` առցես ի ձեռին քում:

16․ Եւ ասասցես ցնա. Տէր Աստուած Եբրայեցւոց առաքեաց զիս առ քեզ` եւ ասէ. Արձակեա զժողովուրդ իմ զի պաշտեսցեն զիս յանապատի. եւ ահա ոչ լուար ինձ մինչչեւ ցայժմ:

17․ Այսպէս ասէ Տէր. Այլ դու գիտասցես` թէ ես եմ Տէր: Ահաւասիկ ես հարկանեմ գաւազանաւս որ ի ձեռին իմում է` զջուր գետոյդ, եւ դարձցի յարիւն:

18․ Եւ ձկունք որ ի գետ այդր են, սատակեսցին, եւ նեխեսցի գետդ. եւ ոչ կարասցեն Եգիպտացիք ըմպել ջուր ի գետոյ այտի:

19․ Եւ ասէ Տէր ցՄովսէս. Ասա ցԱհարոն. Առ զգաւազանդ եւ ձգեա զձեռն քո ի վերայ ջուրցդ Եգիպտոսի, եւ ի վերայ գետոց նոցա. եւ ի վերայ լճաց նոցա, եւ ի վերայ խաղից նոցա, եւ ի վերայ ջրակուտաց նոցա. եւ եղիցի արիւն: Եւ եղեւ արիւն յամենայն երկրին Եգիպտացւոց, ի փայտս եւ ի քարինս:

20․ Եւ արարին Մովսէս եւ Ահարոն` որպէս եւ պատուիրեաց նոցա Տէր. եւ վերացուցեալ զգաւազանն իւր` եհար զջուր գետոյն առաջի փարաւոնի եւ առաջի ծառայից նորա: Եւ դարձոյց զամենայն ջուրս գետոյն յարիւն:

21․ Եւ ձկունք որ ի գետ ի անդ էին` սատակեցան, եւ նեխեցաւ գետն. եւ ոչ կարէին Եգիպտացիքն ըմպել ջուր ի գետոյ անտի: Եւ էր արիւն յամենայն երկիրն Եգիպտացւոց:

22․ Եւ արարին այնպէս եւ գէտքն Եգիպտացւոց կախարդութեամբ իւրեանց: Եւ խստացաւ սիրտն փարաւոնի, եւ ոչ լուաւ նոցա` որպէս ասաց Տէր:

23․ Դարձաւ փարաւոն եւ եմուտ ի տուն իւր եւ ոչ հաստատեաց զմիտս իւր եւ ոչ այնու եւս:

24․ Եւ փորեցին ամենայն Եգիպտացիքն շուրջ զգետով ջուր ըմպելոյ. եւ ոչ կարէին ըմպել ջուր ի գետոյն:

25․ Եւ լցան աւուրք եւթն յետ հարկանելոյ Տեառն զգետն: