1․ Եւ կոչեցեալ առ ինքն զերկոտասանեսի՛ն աշակերտսն իւր, ե՛տ նոցա իշխանութիւն այսոց պղծոց հանել զնոսա, եւ բժշկե՛լ զամենայն ցաւս եւ զամենայն հիւանդութիւնս:
2․ Եւ առաքելոցն երկոտասանից՝ էին անուանք ա՛յսոքիկ: Առաջին, Սի՛մովն՝ անուանեալն Պե՛տրոս, եւ Անդրէ՛աս եղբայր նորա:
3․ Յա՛կովբոս Զեբեդեայ, եւ Յովհա՛ննէս եղբայր նորա. Փիլի՛պպոս, եւ Բարթողովմէ՛ոս, Թո՛վմաս, եւ Մատթէ՛ոս մաքսաւոր. Յա՛կովբոս Ալփեայ, եւ Զաբէ՛ոս՝ որ անուանեցաւն Թադէ՛ոս:
4․ Սի՛մովն կաննանացի, եւ Յո՛ւդա սկարիովտացի՝ որ եւ մատնեացն զնա:
5․ Զնոսա երկոտասանեսին առաքեաց Յիսուս, պատուիրեա՛ց նոցա եւ ասէ. Ի ճանապարհ հեթանոսաց մի՛ երթայցէք, եւ ի քաղաք սամարացւոց մի՛ մտանիցէք:
6․ Այլ երթա՛յք առաւել առ ոչխա՛րսն կորուսեալս տան Իսրայէլի:
7․ Եւ իբրեւ երթայցէք՝ քարոզեցէ՛ք եւ ասացէ՛ք, թէ մերձեա՛լ է արքայութիւն երկնից:
8․ Զհիւանդս բժշկեցէ՛ք, զբորոտս սրբեցէ՛ք, զդեւս հանէ՛ք. ձրի՛ առէք՝ եւ ձրի՛ տուք:
9․ Մի՛ ստանայք ոսկի, եւ մի՛ արծաթ, եւ մի պղինձ ի գաւտիս ձեր:
10․ Մի՛ պարկ ի ճանապարհ. եւ մի՛ երկուս հանդերձս. մի՛ կաւշիկս. մի՛ ցուպ: Զի արժանի՛ է մշակն կերակրոյ իւրում:
11․ Յոր քաղա՛ք մտանիցէք կամ ի գեղ հարցանիցէ՛ք թէ ո՞ է ի նմա արժանի. եւ ա՛նդ լինիջիք մինչեւ ելանիցէք անտի:
12․ Եւ իբրեւ մտանիցէք ի տունն, ողջո՛յն տաջիք նմա՝ եւ ասասջի՛ք. Ողջո՛յն տանս այսմիկ:
13․ Եթէ իցէ տունն արժանի, եկեսցէ՛ ողջոյնն ձեր ի վերայ նորա. ապա թէ ո՛չ իցէ արժանի, ողջոյնն ձեր առ ձե՛զ դարձցի:
14․ Եւ որ ո՛չ ընկալցի զձեզ՝ եւ ո՛չ լուիցէ բանից ձերոց, իբրեւ ելանիցէք ի քաղաքէն յայնմանէ, թաւթափեսջիք զփոշին յոտից ձերոց:
15․ Ամէն ասեմ ձեզ՝ դիւրագո՛յն լիցի երկրին սոդովմացւոց եւ գոմորացւոց յաւուրն դատաստանի, քան քաղաքին այնմիկ:
16․ Ահաւասիկ ես առաքեմ զձեզ իբրեւ զոչխա՛րս ի մէջ գայլոց. եղերո՛ւք այսուհետեւ խորագէտք իբրեւ զաւձս, եւ միամիտք իբրեւ զաղաւնիս:
17․ Զգո՛յշ լինիջիք ի մարդկանէ. զի մատնեսցեն զձեզ յատեանս, եւ ի ժողովուրդս իւրեանց տանջեսցեն զձեզ:
18․ Եւ առաջի դատաւորաց եւ թագաւորաց տանիցին զձեզ վասն իմ, ի վկայութիւն նոցա եւ հեթանոսաց:
19․ Այլ յորժամ մատնիցեն զձեզ, մի՛ հոգայցէք՝ թէ ո՞րպէս կամ զինչ խաւսիցիք. զի տացի ձեզ ի ժամուն յայնմիկ զինչ խաւսիցիք:
20․ Զի ո՛չ եթէ դուք իցէք որ խաւսիցիքն, այլ Հոգին Հաւր ձերոյ որ խաւսիցի ի ձեզ:
21․ Մատնեսցէ եղբայր զեղբայր ի մա՛հ, եւ հայր՝ զորդի՛: Եւ յառնիցեն որդիք ի վերայ հարց՝ եւ սպանանիցե՛ն զնոսա:
22․ Եւ եղիջիք ատեցեա՛լք յամենեցունց վասն անուան իմոյ. իսկ որ համբերեսցէ ի սպառ, նա կեցցէ՛:
23․ Եւ յորժամ հալածիցեն զձեզ ի քաղաքիս յայսմիկ՝ փախիջի՛ք յայլ. եւ եթէ յայնմանէ հալածիցեն զձեզ՝ փախիջի՛ք ի մե՛ւսն: Ամէն ասե՛մ ձեզ, ո՛չ սպառեսջիք զքաղաքս Իսրայէլի՝ մինչեւ եկեսցէ՛ որդի մարդոյ:
24․ Ո՛չ է աշակերտ առաւել քան զվարդապետ, եւ ո՛չ ծառայ քան զտէր իւր:
25․ Շատ իցէ աշակերտին՝ եթէ եղիցի իբրեւ զվարդապետ իւր, եւ ծառային՝ իբրեւ զտէ՛ր իւր: Եթէ զտանուտէրն բէեղզեբուղ կոչեցին, ո՛րչափ եւս առաւել զընտանիս նորա:
26․ Մի՛ այսուհետեւ երկնչիցիք ի նոցանէ: ղբ. Զի ո՛չ ինչ է ի ծածուկ՝ որ ոչ յայտնեսցի, եւ գաղտնի՝ որ ոչ ծանիցի:
27․ Զոր ասեմ ձեզ ի խաւարի՝ ասացէ՛ք ի լո՛յս. եւ զոր լսիցէք յունկանէ՝ քարոզեցէ՛ք ի վերայ տանեա՛ց:
28․ Եւ մի՛ երկնչիք յայնցանէ՝ որ սպանանեն զմարմին, եւ զոգի ո՛չ կարեն սպանանել: Այլ երկերո՛ւք դուք առաւել յայնմանէ՝ որ կարաւղն է զոգի՛ եւ զմարմին կորուսանել ի գեհենի:
29․ Ո՞չ ապաքէն երկու ճնճղուկք դանգի՛ միոջ վաճառին, եւ մի ի նոցանէ յերկիր ո՛չ անկցի առանց հա՛ւր ձերոյ:
30․ Այլ ձեր եւ ամենայն իսկ հե՛ր գլխոյ թուեալ է:
31․ Եւ արդ՝ մի՛ երկնչիցիք՝ զի լա՛ւ էք քան զբազում ճնճղուկս:
32․ Ամենայն որ խոստովանեսցի յիս առաջի մարդկան, խոստովանեցից եւ ես զնմանէ առաջի հաւր իմոյ որ յերկինսն է:
33․ Եւ որ ուրասցի զիս առաջի մարդկան, ուրացա՛յց եւ ե՛ս զնա առաջի հաւր իմոյ՝ որ յերկինս է:
34․ Մի՛ համարիք եթէ եկի արկանել խաղաղութիւն յերկիր. ո՛չ եկի արկանել խաղաղութիւն, այլ սո՛ւր:
35․ Քանզի եկի քակե՛լ զայր՝ ի հաւրէ իւրմէ, եւ զդուստր ի մաւրէ, եւ զհարսն ի սկեսրէ՛ իւրմէ:
36․ Եւ թշնամի՛ք առն՝ ընտանիք իւր:
37․ Որ սիրէ զհայր կամ զմայր առաւել քան զիս, ո՛չ է ինձ արժանի: Եւ որ սիրէ զուստր կամ զդուստր առաւել քան զիս, չէ՛ ինձ արժանի:
38․ Եւ որ ո՛չ առնու զխա՛չ իւր՝ եւ գայ զկնի իմ, չէ՛ ինձ արժանի:
39․ Որ գտանէ զանձն իւր՝ կորուսցէ՛ զնա, եւ որ կորոյս զանձն իւր վասն իմ, գտցէ՛ զնա:
40․ Որ ընդունի զձեզ՝ զիս ընդունի, եւ որ զիս ընդունի՝ ընդունի զառաքի՛չն իմ:
41․ Որ ընդունի զմարգարէ յանուն մարգարէի, զվա՛րձս մարգարէի առցէ: Եւ որ ընդունի զարդար յանուն արդարոյ՝ զվա՛րձս արդարոյ առցէ:
42․ Եւ որ արբուսցէ միում ի փոքրկանցս յայսցանէ բաժա՛կ մի ջո՛ւր ցուրտ միայն յանուն աշակերտի, ամէն ասե՛մ ձեզ, ո՛չ կորուսցէ զվարձս իւր:
Հաղորդում կայքում սխալի վերաբերյալ
Տվյալ հատվածում առկա է սխալ: