Գլուխ 28

   
1․ Եւ յերեկոյի՛ շաբաթուն՝ յորում լուսանա՛յր միաշաբաթին, ե՛կն Մարիամ Մագդաղենացի, եւ մե՛ւս Մարիամն՝ տեսանե՛լ զգերեզմանն:

2․ Եւ ահա շաժո՛ւմն մեծ եղեւ. զի հրեշտակ Տեառն իջեալ յերկնից, մատուցեալ ի բա՛ց թաւալեցոյց զվէմն ի դրա՛ց անտի՝ եւ նստէ՛ր ի վերայ նորա:

3․ Եւ էր տեսի՛լ նորա իբրեւ զփայլակն, եւ հանդերձ նորա սպիտա՛կ իբրեւ զձիւն:

4․ Եւ յահէ՛ անտի նորա խռովեցա՛ն պահապանքն, եւ եղեն իբրեւ զմեռեալ:

5․ Պատասխանի՛ ետ հրեշտակն՝ եւ ասէ ցկանայսն. Մի՛ երկնչիք դուք, գիտեմ զի զՅիսուս զխաչ ելեա՛լն խնդրէք:

6․ Չէ՛ աստ. քանզի յարեա՛ւ՝ որպէս ասացն: Եկա՛յք տեսէ՛ք զտեղին ուր կայր:

7․ Եւ վաղվաղակի երթա՛յք ասացէ՛ք աշակերտացն նորա թէ յարեա՛ւ: Եւ ահա՝ յառաջանա՛յ քան զձեզ ի Գալիլեա. ա՛նդ տեսանիցէք զնա. ահա՝ ասացի՛ ձեզ:

8․ Եւ ելեալ վաղվաղակի՛ ի գերեզմանէ անտի ահիւ եւ խնդութեամբ բազմաւ՝ ընթանային պատմե՛լ աշակերտացն:

9․ Եւ ահա՝ պատահեա՛ց նոցա Յիսուս՝ եւ ասէ. Ո՛ղջ էք: Եւ նոքա մատուցեալ կալան զոտս նորա, եւ երկի՛ր պագին նմա:

10․ Յայնժամ ասէ ցնոսա Յիսուս. Մի՛ երկնչիք, երթա՛յք ասացէք եղբարցն իմոց՝ զի երթիցեն ի Գալիլեա՝ եւ ա՛նդ տեսցեն զիս:

11․ Իբրեւ նոքա գնացին, ահա՝ ոմանք ի զաւրականացն եկին ի քաղաքն, եւ պատմեցին քահանայապետիցն զամենայն որ ինչ եղեւն:

12․ Եւ նոքա ժողովեալ հանդերձ ծերովքն, խորհո՛ւրդ առեալ՝ արծա՛թ յոյժ ետուն զաւրականացն՝

13․ եւ ասեն. Ասասջի՛ք՝ եթէ աշակերտքն նորա եկեա՛լ գիշերի գողացան զնա՝ մինչ մեք ի քո՛ւն էաք:

14․ Եւ եթէ լո՛ւր լիցի այդ՝ առ դատաւորն, մե՛ք հաճեսցուք զնա, եւ զձեզ անհո՛գս արասցուք:

15․ Եւ նոցա առեալ զարծաթն, արարի՛ն որպէս ուսանն. եւ ել համբաւս այս ի հրէից՝ մինչեւ ցայսաւր:

16․ Իսկ մետասան աշակերտքն՝ գնացին ի Գալիլեա ի լեառնն՝ ուր ժամադի՛ր եղեւ նոցա Յիսուս:

17․ Իբրեւ տեսին զնա՝ երկի՛ր պագին նմա. եւ ոմանք յերկուացա՛ն:

18․ Եւ մատուցեալ Յիսուս խաւսեցա՛ւ ընդ նոսա՝ եւ ասէ. Տուա՛ւ ինձ ամենայն իշխանութիւն յերկինս եւ յերկրի. որպէս առաքեաց զի՛ս հայր, եւ ե՛ս առաքեմ զձեզ:

19․ Գնացէ՛ք այսուհետեւ՝ աշակերտեցէ՛ք զամենայն հեթանոսս. մկրտեցէ՛ք զնոսա յանուն Հաւր՝ եւ Որդւոյ՝ եւ Հոգւոյ սրբոյ:

20․ Ուսուցէ՛ք նոցա պահե՛լ զամենայն՝ որ ինչ պատուիրեցի ձեզ: Եւ ահաւասիկ ես ընդ ձե՛զ եմ զամենայն աւուրս՝ մինչեւ ի կատարած աշխարհի: