1․ Դարձեալ պատասխանի ետ Յիսուս, եւ ասէ՛ ցնոսա առակաւք:
2․ Նմանեցաւ արքայութիւն երկնից՝ ա՛ռն թագաւորի, որ արա՛ր հարսանիս որդւոյ իւրում:
3․ Եւ առաքեաց զծառայս իւր կոչե՛լ զհրաւիրեալսն ի հարսանիս: Եւ ո՛չ կամեցան գալ:
4․ Դարձեալ՝ առաքեաց ա՛յլ ծառայս՝ եւ ասէ. Ասացէ՛ք հրաւիրելոցն. Ահաւասիկ զճա՛շ իմ պատրաստեցի. զուարակք իմ եւ պարարակք զենեա՛լ են, եւ ամենայն ինչ պատրա՛ստ եկա՛յք ի հարսանիսս:
5․ Եւ նոքա յուլացեալ՝ գնացին ոմն յագարա՛կ իւր, եւ ոմն ի վաճա՛ռ իւր,
6․ եւ այլք՝ կալան զծառայս նորա, թշնամանեցին, եւ սպանի՛ն:
7․ Իսկ թագաւորն իբրեւ լուաւ՝ բարկացա՛ւ, եւ առաքեաց զզաւրս իւր եւ սատակեաց զսպանաւղսն զայնոսիկ, եւ զքաղաքն նոցա այրեա՛ց:
8․ Յայնժամ ասէ՛ ցծառայս իւր. Հարսանիքս պատրա՛ստ են, եւ հրաւիրեալքն չէի՛ն արժանի:
9․ Արդ՝ երթա՛յք յանցս ճանապարհաց, եւ զորս միանգամ գտանիցէք՝ կոչեցէ՛ք ի հարսանիսս:
10․ Եւ ելեալ ծառայքն ի ճանապարհս ժողովեցին զամենեսեան զոր եւ գտին՝ զչարս եւ զբարիս. եւ լցա՛ն հարսանիքն բազմականաւք:
11․ Եւ մտեալ թագաւորն հայել զբազմականաւքն, ետես անդ ա՛յր մի՝ որ ո՛չ էր զգեցեալ հանդերձ հարսանեաց:
12․ Եւ ասէ ցնա. Ը՛նկեր՝ զիա՞րդ մտեր այսր, զի ո՛չ ունէիր հանդերձ հարսանեաց: Եւ նա պապանձեցա՛ւ:
13․ Յայնժամ ասէ թագաւորն ցսպասաւորսն. Կապեցէ՛ք զդորա զոտս եւ զձեռս՝ եւ հանէ՛ք զդա ի խաւա՛րն արտաքին, ա՛նդ եղիցի լա՛լ եւ կրճել ատամանց:
14․ Զի բազումք են կոչեցեալք՝ եւ սակաւք ընտրեալք: ։
15․ Յայնժամ գնացեալ փարիսեցիքն, առին խորհուրդ զնմանէ, թէ ո՞րպէս դնիցեն նմա որոգա՛յթ բանիւք:
16․ Եւ առաքեն առ նա զաշակերտսն իւրեանց հերովդիանոսա՛ւքն հանդերձ՝ եւ ասեն. Վա՛րդապետ՝ գիտեմք զի ճշմարի՛տ ես, եւ զճանապարհն Աստուծոյ ճշմարտութեամբ ուսուցանես, եւ ո՛չ է քեզ փոյթ զումեքէ, եւ ո՛չ հայիս յերեսս մարդոյ:
17․ Արդ՝ ասա՛ մեզ, զիա՞րդ թուի քեզ, պա՞րտ է հարկս տալ կայսեր՝ թէ ոչ:
18․ Գիտա՛ց Յիսուս զխորամանգութիւնն նոցա, եւ ասէ. Զի՞ փորձէք զիս կե՛ղծաւորք.
19․ ցուցէ՛ք ինձ զդահեկան հարկին: Եւ նոքա մատուցին նմա դահեկան մի:
20․ Եւ ասէ ցնոսա. Ո՞յր է պատկերս այս՝ կամ գիր:
21․ Ասեն՝ կայսեր: Յայնժամ ասէ ցնոսա. Երթա՛յք՝ տո՛ւք զկայսեր՝ կայսեր, եւ զԱստուծոյ՝ Աստուծոյ:
22․ Իբրեւ լուան՝ զարմացա՛ն. եւ թողի՛ն զնա եւ գնացին:
23․ Յայնմ աւուր մատեա՛ն առ նա Սադուկեցիքն, որ ասէին՝ թէ չի՛ք յարութիւն. հարցի՛ն ցնա՝
24․ եւ ասեն. Վա՛րդապետ՝ Մովսէս ասաց. Եթէ ոք մեռցի անորդի, արասցէ զկին նորա եղբայր իւր, եւ յարուսցէ զաւա՛կ եղբաւր իւրում:
25․ Եի՛ն առ մեզ եղբա՛րք եւթն. առաջինն՝ արա՛ր կին՝ եւ մեռա՛ւ. եւ զի ո՛չ ունէր զաւակ, եթող զկինն իւր՝ եղբաւր իւրում:
26․ Նոյնպէս եւ երկրո՛րդն՝ եւ երրո՛րդն, մինչեւ ցե՛ւթներորդն:
27․ Յետ ամենեցուն՝ մեռա՛ւ եւ կինն:
28․ Արդ՝ ի յարութեանն ո՞յր յիւթանցն եղիցի՝ նա՛ կին. զի ամենեքի՛ն կալան զնա կին:
29․ Պատասխանի՛ ետ նոցա Յիսուս՝ եւ ասէ. Մո՛լորեալք՝ ո՛չ գիտէք զգիրս եւ ո՛չ զզաւրութիւն Աստուծոյ:
30․ Զի ի յարութեանն ո՛չ կանայս առնեն՝ եւ ո՛չ արանց լինին, այլ են իբրեւ զհրեշտա՛կս յերկինս:
31․ Բայց վասն յարութեան մեռելոց չիցէ՞ ընթերցեալ զասացեալն ձեզ յԱստուծոյ:
32․ Ե՛ս եմ Աստուած Աբրահամու, Աստուած Իսահակայ եւ Աստուած Յակովբայ. եւ չէ՛ Աստուած՝ Աստուած մեռելոց՝ այլ կենդանեա՛ց:
33․ Իբրեւ լուան ժողովուրդքն, զարմանայի՛ն ընդ վարդապետութիւն նորա:
34․ Իսկ փարիսեցիքն իբրեւ լուան՝ եթէ պապանծեցոյց զսադուկեցիսն, ժողովեցա՛ն ի միասին:
35․ Եւ եհա՛րց մի ոմն ի նոցանէ զնա՝ փորձելով, եւ ասէ.
36․ Վա՛րդապետ՝ ո՞ր պատուիրան մեծ է յաւրէնս:
37․ Եւ Յիսուս ասէ ցնա. Սիրեսցե՛ս զՏէր Աստուած քո յամենայն սրտէ քումմէ, եւ յամենայն անձնէ՛ քումմէ, եւ յամենայն մտաց քոց:
38․ Ա՛յս է մեծն եւ առաջին պատուիրան:
39․ Եւ երկրորդն՝ նմա՛ն սմին. Սիրեցե՛ս զընկեր քո՝ իբրեւ զանձն քո:
40․ Յա՛յս երկուս պատուիրանս ամենայն աւրէնք եւ մարգարէք՝ կախեալ կան:
41․ Եւ ի ժողովել փարիսեցւոցն, եհա՛րց ցնոսա Յիսուս՝ եւ ասէ:
42․ Զիա՞րդ թուի ձեզ վասն Քրիստոսի, ո՞յր որդի է: Ասեն ցնա, Դաւթի՛:
43․ Ասէ ցնոսա Յիսուս. Իսկ զիա՞րդ Դաւիթ հոգւո՛վն կոչէ զնա Տէր, եւ ասէ:
44․ Ասաց Տէր ցՏէր իմ. Նիստ ընդ աջմէ իմմէ, մնչեւ եդից զթշնամիս քո պատուանդա՛ն ոտից քոց:
45․ Իսկ եթէ Դաւիթ՝ զնա Տէր կոչէ, զիա՞րդ որդի նորա իցէ:
46․ Եւ ո՛չոք կարէր տալ նմա պատասխանի բան մի. եւ ո՛չ իշխէր ոք յայնմ աւրէ հարցանել զնա եւ ո՛չ ինչ:
Հաղորդում կայքում սխալի վերաբերյալ
Տվյալ հատվածում առկա է սխալ: