1․ Աղաչեմ զձեզ ե՛ղբարք գթութեամբքն Աստուծոյ՝ պատրաստել զմարմինս ձեր պատարագ կենդանի, սուրբ, հաճո՛յ Աստուծոյ, զխաւսո՛ւն պաշտաւնդ ձեր:
2․ Եւ մի՛ կերպարանիք կերպարանաւք աշխարհիս այսորիկ. այլ նորոգեցարո՛ւք ի նորոգութիւն մտաց ձերոց, առ ի քննել ձեզ զլա՛ւն, եւ եթէ զինչ են կամքն Աստուծոյ, բարին եւ հաճոյն եւ կատարեալ:
3․ Զայս ասեմ շնորհա՛ւքն Աստուծոյ որ տուեալ են ինձ՝ ամենայնի որ է ի ձեզ, մի՛ առաւել ինչ խորհել քան զարժանն խորհելոյ. այլ ի խորհելն զգաստանա՛լ իւրաքանչիւր, որպէս բաժանեաց Աստուած չա՛փ հաւատոց:
4․ Որպէս ի միում մարմնի անդամս բազումս ունիմք. եւ անդա՛մքն ամենայն ո՛չ զնոյն գործ ունին: 5 Նո՛յնպէս եւ բազումքս մի մարմին եմք ի Քրիստոս. այլ իւրաքանչիւր միմեա՛նց անդամք եմք:
6․ Բայց ունիմք մեք շնո՛րհս ըստ շնորհացն, որ տուեալ են մեզ ազգս ազգս. եթէ մարգարէութիւն ըստ չափո՛յն հաւատոց,
7․ եթէ պաշտաւն՝ ըստ պաշտամանն, եթէ որ ուսուցանէն՝ ըստ վարդապետութեանն.
8․ եթէ որ մխիթարէն՝ ըստ մխիթարութեանն. որ առա՛տն է՝ զուարթութեամբ, որ վերակացո՛ւն է՝ փութով, որ ողորմին՝ լրջմտութեամբ:
9․ Սէր՝ առա՛նց կեղծաւորութեան, ատեա՛լ զչար, զհե՛տ երթալ բարեա՛ց.
10․ յեղբայրսիրութեան առ միմեա՛նս գթա՛ծք. ի պատիւ զմիմեա՛մբք ելանել:
11․ Ի փոյթ՝ մի՛ վեհերոտք. հոգւո՛վ եռացէ՛ք, Տեառն ծառայեցէ՛ք:
12․ Յուսով խնդացէ՛ք, նեղութեան համբերեցէ՛ք, աղաւթից ստէ՛պ կացէք,
13․ ի պէտս սրբոց հաղորդեցարո՛ւք. զհիւրասիրութեան զհե՛տ երթայք:
14․ Աւրհնեցէ՛ք զանիծիչս ձեր, աւրհնեցէ՛ք եւ մի՛ անիծանէք:
15․ Խնդալ ընդ խնդացա՛ւղս, լա՛լ ընդ լացաւղս.
16․ զնո՛յն միմեանց խորհիջի՛ք. մի՛ ամբարտաւանէք՝ այլ ընդ խոնա՛րհս զիջանիցի՛ք:
17․ Մի՛ լինիք իմաստունք յանձինս ձեր. մի՛ ումեք չարի չար հատուցանէք: Խորհեցարո՛ւք զբարի՛ս առաջի ամենայն մարդկան:
18․ Եթէ հնար ինչ իցէ ձեզ՝ ընդ ամենայն մարդկան զխաղաղութիւն կալջիք:
19․ Մի՛ զանձանց վրէժխնդրէք սի՛րելիք, այլ տո՛ւք տեղի՛ բարկութեան: Քանզի գրեա՛լ ի՛մ է վրէժխնդրութիւն, եւ ես հատուցից՝ ասէ Տէր:
20․ Այլ եթէ քաղցեալ է թշնամին քո, հա՛ց տուր նմա, եւ եթէ ծարաւի, ջո՛ւր տուր նմա. զայս արարեալ՝ կայծակո՛ւնս հրոյ կուտեսցես ի գլուխ նորա:
21․ Մի՛ յաղթիր ի չարէ. այլ յաղթեա՛ բարեա՛ւն չարին:
Հաղորդում կայքում սխալի վերաբերյալ
Տվյալ հատվածում առկա է սխալ: