1. Այլ զտկարացեալն ի հաւատս՝ ընկալարո՛ւք, մի՛ խղճիւ երկմտութեանց:
2. Ոմն հաւատայ ուտե՛լ զամենայն. եւ որ հիւանդն է՝ բանջա՛ր կերիցէ:
3. Որ ուտէն, զայն որ ո՛չն ուտէ, մի՛ անգոսնեսցէ. եւ որ ո՛չն ուտէ. զայն որ ուտէն, մի՛ դատեսցի. քանզի Աստուած զնա ընկալաւ:
4. Դու ո՞վ ես որ դատիս զայլոյ ծառայ. իւրո՛ւմ Տեառն կայ կամ անկանի. բայց կացցէ, զի կարաւղ է Տէրն հաստատել զնա:
5. Ոմն պահէ ա՛ւր ըստ աւրէ, եւ ոմն պահէ զա՛ւր հանապազ. իւրաքանչիւր ոք զի՛ւր միտս հաճեսցէ:
6. Որ խորհի զաւրն, Տեառն խորհի. եւ որ ո՛չն խորհի զաւրն, Տեառն չխորհի. եւ որ ուտէ, Տեառն ուտէ, եւ գոհանայ զԱստուծոյ. եւ որ ո՛չն ուտէ, Տեառն չուտէ, եւ գոհանա՛յ զԱստուծոյ:
7. Զի ո՛չ ոք ի մէնջ անձամբ կեայ, եւ ո՛չ անձամբ մեռանի:
8. Եթէ կեամք՝ Տեառն կեամք, եւ եթէ մեռանիմք՝ Տեառն մեռանիմք. եւ արդ՝ եթէ կեամք եւ եթէ մեռանիմք՝ Տեառն եմք:
9. Քանզի ի նոյն իսկ եւ Քրիստոս մեռաւ՝ եւ եկեաց, զի մեռելո՛ց եւ կենդանեաց առ հասարակ տիրեսցէ:
10. Դու զի՞ դատիս զեղբայր քո. կամ ընդէ՞ր անգոսնես զեղբայր քո: Քանզի ամենեքին կալոց եմք առաջի ատենին Քրիստոսի:
11. Զի գրեալ կենդանի՛ եմ ես՝ ասէ Տէր. զի ինձ կրկնեսցի ամենայն ծունր, եւ ամենայն լեզու խոստովան լիցի Աստուծոյ:
12. Ապա ուրեմն իւրաքանչիւր ոք ի մէնջ ընդ անձին համարս տացէ Աստուծոյ:
13. Այսուհետեւ մի՛ զմիմեանս դատեսցուք. այլ առաւել զայս դիք ի մտի, չդնել գայթագղութիւն եղբաւրն:
14. Զայս գիտեմ եւ հաստատեա՛լ եմ ի Քրիստոս Յիսուս, զի ո՛չինչ է պիղծ նովաւ. բայց այնմ որ համարիցի ոք ինչ պիղծ, նմա՛ է պիղծ:
15. Զի եթէ վասն կերակրոյ եղբայրն քո տրտմի, ո՛չ եւս սիրով գնացեր. մի՛ կերակրովն քո զնա կորուսաներ, վասն որոյ Քրիստոսն մեռաւ:
16. Մի՛ հայհոյեսցի բարին ձեր:
17. Զի ո՛չ է արքայութիւնն Աստուծոյ կերակուր եւ ըմպելի, այլ արդարութիւն, եւ խաղաղութիւն, եւ խնդութիւն ի հոգին սուրբ:
18. Զի որ յայսմ ծառայէ Քրիստոսի, հաճոյ է Աստուծոյ՝ եւ ընտի՛ր մարդկան:
19. Ապա այսուհետեւ զհե՛տ երթիցուք խաղաղութեան, եւ զշինութեան որ առ միմեանս:
20. Մի՛ վասն կերակրոյ քակեր զգործ Աստուծոյ: Ամենայն ինչ սուրբ է: Այլ չար այնմ մարդոյ է, որ խղճի՛ւն ուտիցէ:
21. Լա՛ւ է ո՛չ ուտել միս, եւ ո՛չ ըմպել գինի. եւ ո՛չ որով եղբայրն քո գայթագղի, կամ գթէ, կամ տկարանայ:
22. Դու՝ ապաքէն հաւատս ունիս, կա՛լ առանձինն առաջի Աստուծոյ. երանի՛ որ ոչ դատեսցի զանձն, որով զընկերն փորձիցէ:
23. Բայց որ խղճէն, թէպէտ եւ ուտիցէ՝ դատապարտեալ զի ո՛չ ըստ հաւատոց. զի ամենայն ինչ որ ո՛չ ի հաւատոց է՝ մեղք են:
24. Այլ այնմ որ կարաւղն է հաստատել զձեզ ըստ աւետարանիս իմում, եւ ըստ քարոզութեանն Յիսուսի Քրիստոսի, ըստ յայտնութեան խորհրդոյն, ժամանակաւքն յաւիտենից լռեցելոյ,
25. եւ յայտնելոյ այժմիկ ի ձեռն գրոց մարգարէականաց, ըստ հրամանի մշտնջենաւորին Աստուծոյ, ի հնազանդութիւն հաւատոց, յամենայն հեթանոսս ծանուցելոյ, միայնոյ իմաստնոյն Աստուծոյ, ի ձեռն Յիսուսի Քրիստոսի, որում փա՛ռք յաւիտեանս. ամէն:
Հաղորդում կայքում սխալի վերաբերյալ
Տվյալ հատվածում առկա է սխալ: