1. Ստուգութեա՛մբ ասեմ ի Քրիստոս՝ եւ ո՛չ ստեմ, վկայեն ինձ մի՛տք իմ ի հոգի սուրբ.
2. զի տրտմութի՛ւն է ինձ յոյժ, եւ անպակա՛ս ցաւք սրտի իմոյ:
3. Զի ուխտի՛ւք խնդրէի, ե՛ս ինքնին նզո՛վ լինել ի Քրիստոսէ, վասն եղբարց եւ ազգականաց իմոց ըստ մարմնոյ,
4. որ են Իսրայէլացիք. որոց որդէգրութիւնն, եւ փառքն, եւ կտակարա՛նքն, եւ աւրէնսդրութիւնն, եւ պաշտաւնն, եւ աւետիքն:
5. Որոց հա՛րքն, յորոց եւ Քրիստոս ըստ մարմնոյն, որ է ի վերայ ամենեցուն Աստուած աւրհնեա՛լ յաւիտեանս. ա՛մէն.
6. Ո՛չինչ է մարթ՝ եթէ անկա՛ծ լինիցի բանն Աստուծոյ. զի ո՛չ ամենեքեան որ յԻսրայելէ՛ն են, նոքա Իսրայէլեա՛նք իցեն.
7. եւ ո՛չ որ զաւակն Աբրահամու են, ամենեքեան որդի՛ք իցեն. այլ Իսահակա՛ւ կոչեսցի քեզ զաւակ:
8. Ա՛յս ինքն՝ թէ ո՛չ որ որդիք մարմնոյն են, են որդի՛ք Աստուծոյ. այլ որդիք աւետեա՛ցն համարեսցին ի զաւակ:
9. Քանզի աւետեա՛ց իսկ է բանս այս, թէ ի ժամանակի յայսմիկ եկից, եւ եղիցի որդի՛ Սառայի:
10. Եւ ո՛չ այնչափ միայն, այլ եւ ի Հռեբեկայ ի միոջէ՛ անկողնոյ Սահակայ հաւր մերոյ:
11. Զի մինչ չե՛ւ ծնեալ էին, եւ մինչ չե՛ւ բարի ինչ՝ կամ չա՛ր գործեալ էր: Զի ըստ ընտրութեանն յառաջադրութիւնն Աստուծոյ հաստատեսցի՛.
12. ո՛չ ի գործոց, այլ յա՛յնմանէ որ կոչեա՛ցն, ասացաւ նմա.
13. թէ երէցն կրսերո՛յն ծառայեսցէ. որպէս եւ գրեա՛լ թէ զՅակոբ սիրեցի՛, եւ զԻսա՛ւ ատեցի:
14. Իսկ արդ՝ զի՞նչ ասեմք. միթէ անիրաւութի՞ւն իցէ յԱստուծոյ. քա՛ւ լիցի:
15. Զի Մովսիսի՛ ասէ. Ողորմեցայց՝ որում ողորմեցա՛յցն, եւ գթացայց՝ յոր գթացայցն:
16. Ապա ո՛չ ըստ այնմ ինչ է՝ որ կամիցին, եւ ո՛չ ըստ այնմ՝ որ ընթանայցէ. այլ ըստ Աստուծոյ՝ որ ողորմի:
17. Քանզի ասէ գիր ցՓարաւովն. թէ վասն այնորիկ գրգռեցի զքեզ, զի ի քե՛զ ցուցից զզաւրութիւն իմ, եւ պատմեսցի՛ անուն իմ ընդ ամենայն երկիր:
18. Ապա ուրեմն՝ ում կամի ողորմի, եւ ում կամի՝ խստանա՛յ:
19. Իսկ արդ՝ ասիցե՞ս թէ մե՛զ եւս զի՛ դնէ՝ զի կամաց նորա ո՛չոք կայ հակառակ:
20. Իսկ արդ՝ դու ո՞վ ես մարդ՝ որ պատասխանի տաս Աստուծոյ: Միթէ ասիցէ՞ ստեղծուածն ցստեղծ1իչն՝ թէ ընդէ՞ր այդպէս արարեր զիս:
21. Եթէ ո՞չ ունիցի իշխանութիւն բրուտն կաւոյն՝ ի նմի՛ն զանգուածոյ առնել անաւթ զոմն ի պատիւ եւ զոմն յանարգանս:
22. Ապա թէ կամէր Աստուած ցուցանե՛լ զբարկութիւն, եւ յայտնի՛ առնել զզաւրութիւն իւր, զոր համբերն բազո՛ւմ երկայնմտութեամբ անաւթոցն բարկութեան՝ պատրաստելո՛ցն ի կորուստ:
23. Զի յայտնի՛ արասցէ զմեծութիւն փառաց իւրոց ի վերայ անաւթոցն ողորմութեան, զոր պատրաստեաց ի փառս:
24. Զորս եւ կոչեաց զմեզ ո՛չ միայն ի հրէից՝ այլ եւ ի հեթանոսա՛ց:
25. Որպէս եւ Յովսեէ՛ ասէ. Կոչեցից զոր ո՛չ ժողովուրդն իմ, ժողովուրդ ինձ. եւ զչսիրեցեալն՝ սիրեցեալ:
26. Եւ եղիցի ի տեղւոջ յորում ասացաւ նոցա, թէ ո՛չ ժողովուրդ իմ դուք, անդ կոչեսցին նոքա որդիք Աստուծոյ կենդանւոյ:
27. Եսայի աղաղակէ վասն Իսրայէլի. եթէ իցէ թի՛ւ որդւոցն Իսրայէլի իբրեւ զաւազ ծովու, սակա՛ւ ինչ մնացորդք մնասցեն:
28. Զի բան մի հակի՛րճ եւ համառաւտ արդարութեամբ. զբանն հակիրճ արասցէ Տէր ի վերայ երկրի:
29. Եւ որպէս ասէ Եսայի. եթէ ոչ Տեառն զաւրութեանց թողեալ էր մեզ զաւակ, իբրեւ զՍոդոմ լինէաք՝ եւ Գոմորո՛յ նմանէաք:
30. Իսկ արդ՝ զի՞նչ ասիցեմք, զի թէ հեթանոսք՝ որ ո՛չ երթային զհետ արդարութեան, հասի՛ն արդարութեան. ա՛յնմ արդարութեան որ ի հաւատո՛ց անտի:
31. Այլ Իսրայէլ երթայր զհետ աւրինա՛ցն արդարութեան, եւ յաւրէնս արդարութեանն ո՛չ ժամանեաց:
32. Ընդէ՞ր. զի ո՛չ ի հաւատոց, այլ իբրեւ ի գործո՛ց աւրինաց: Քանզի գթեցին նոքա առ վիմին գայթագղութեան.
33. Որպէս եւ գրեալ Ահաւասիկ դնեմ ի Սիովն քա՛ր գայթագղութեան եւ վէ՛մ գլորման. եւ ամենայն որ հաւատասցէ ի նա՝ մի՛ ամաչեսցէ:
Հաղորդում կայքում սխալի վերաբերյալ
Տվյալ հատվածում առկա է սխալ: