Գլուխ 2

   
1․ Եւ ի տաւնին մեծի որ է սուրբն յեւթներորդ շաբաթուն, արարին ինձ ճաշ մեծ. եւ բազմեցայ ուտել եւ ըմպել:

2․ եւ տեսի ես առաջի իմ խորտիկս բազմապատիկս, եւ ասեմ ես ցորդին իմ. Երթ ած դու յեղբարցն մերոց յաղքատաց զորս եւ գտանես, եւ ես մնամ քեզ:

3․ Եւ եկն` եւ ասէ. Հայր, մի ոմն յազգէս մերմէ` որոյ թափեալ են ոտք նորա, եւ անկեալ պճղունք նորա. եւ կայ ի հրապարակի անդ մեռեալ:

4․ եւ իմ մինչչեւ էր ճաշակեալ` չոգայ առի զնա եւ բերի ի տուն իմ մինչչեւ եմուտ արեգակն.

5․ եւ ընդ երեկս լուացայ եւ ուտէի զհացն իմ տրտմութեամբ:

6․ Եւ յիշեցի ես զմարգարէութիւնն Ամովսայ` որպէս եւ ասացն. Դարձցին տարեկանքն ձեր ի սուգ, եւ ամենայն ուրախութիւնք ձեր ի տրտմութիւն: եւ լացի յոյժ:

7․ եւ յորժամ եմուտ արեգակն, փորեցի եւ թաղեցի զնա:

8․ Եւ մերձաւորքն իմ այպն առնէին` եւ ասէին. Արդ ո՞չ եւս երկնչի մեռանել վասն իրացս այսոցիկ. զի վասն որոյ հալածեցաւն. դարձեալ եկեալ թաղէ՞ զդիակունսն:

9․ Եւ ի նմին գիշերի դարձայ իբրեւ թաղեցին.

10․ եւ ննջեցի ես պղծեալ առ որմոյ գաւթին եւ զերեսս իմ ոչ ծածկեցի:

18․ Եւ ոչ գիտէի թէ ճնճղուկք նստէին յառաստաղս անդ. եւ աչաւք բացաւք ի վեր հայէի, եւ ծրտէին ձագքն ջերմաջերմ յաչս իմ: եւ երթեալ իմ առ բժիշկս ոչ ինչ աւգնէին ինձ: եւ Աքիաքարոս դարմանէր զիս ռոճկաւք իւրովք, մինչչեւ չոգայ ես յԵղմայիդայ:

19․ Եւ կինն իմ մանէր եւ գործէր ձեռաւք իւրովք` եւ տայր տերանցն:

20․ եւ նոքա տային զվարձս նորա. եւ յաւելին եւ ետուն նմա ուլ մեւս եւս:

21․ եւ յորժամ եկն նա առ իս, սկսաւ կագել ընդ իս. եւ ասեմ ես ցնա. Ուստի՞ բերեր դու զուլդ զայդ, մի՞թէ գողունի է, տուր անդր ցտեարս իւր. զի ոչ են ինձ աւրէն ուտել զգողունի:

22․ եւ ասէ կինն իմ. Պատիւ ետուն ինձ վասն վարձուց իմոց: եւ ես անհաւատացի նմա, այլ ստիպէի տալ ցտեարս իւր. եւ ես իբրեւ զամաւթի հարկանէի ի նմանէ: եւ նա ասէ ցիս. Ո՞ւր են արդ ողորմութիւնքն քո եւ արդարութիւնքն. զի ահաւասիկ յայտնի եղեն քեզ: