1․ Եւ եղեւ իբրեւ կատարեա՛ց Յիսուս զպատուէր երկոտասանից աշակերտացն իւրոց, գնա՛ց անտի քարոզե՛լ եւ ուսուցանե՛լ ի քաղաքս նոցա:
2․ Իսկ Յովհաննէս իբրեւ լուաւ ի բանտին զգործսն Քրիստոսի, առաքեաց ի ձեռն աշակերտաց իւրոց,
3․ եւ ասէ ցնա. Դո՞ւ ես որ գալոցն ես, եթէ այլում ակն կալցուք:
4․ Պատասխանի ետ Յիսուս՝ եւ ասէ ցնոսա. Գնացէ՛ք պատմեցէ՛ք Յովհաննու, զոր լուայք եւ տեսէք:
5․ Կոյրք՝ տեսանե՛ն, կաղք՝ գնա՛ն, բորոտք՝ սրբի՛ն, եւ խուլք լսե՛ն, եւ մեռեալք յառնե՛ն, եւ աղքատք՝ աւետարանի՛ն:
6․ Եւ երանեալ է՝ որ ոչ գայթագղեսցի յիս:
7․ Եւ իբրեւ նոքա գնացին, սկսաւ Յիսուս ասել ցժողովուրդսն զՅովհաննէ: Զի՞նչ ելէք տեսանել յանապատին, եղէ՞գն շարժո՛ւն ի հողմոյ:
8․ Այլ զի՞նչ ելէք տեսանել, մա՞րդ ի հանդերձս փափկութեան զարդարեալ: Ահաւանիկ որ զփափուկսն զգեցեալ են ի տունս թագաւորա՛ց են:
9․ Այլ զի՞նչ ելէք տեսանել. մարգարէ՞. այո՛՝ ասեմ ձեզ, եւ առաւե՛լ եւս քան զմարգարէ:
10․ Զի նա՛ է՝ վասն որոյ գրեալն Ահա ես առաքեցից զհրեշտա՛կ իմ առաջի երեսաց քոց, որ պատրաստեսցէ զճանապարհս քո առաջի քոյ:
11․ Ամէն ասե՛մ ձեզ, չէ՛ յարուցեալ ի ծնունդս կանանց մեծ քան զՅովհա՛ննէս մկրտիչ: Բայց փոքրիկն յարքայութեան երկնից մե՛ծ է քան զնա:
12․ Բայց յաւուրցն Յովհաննու մկրտչի մինչեւ ցայժմ՝ արքայութիւն երկնից բռնադատի, եւ բռո՛ւնք յափշտակեն զնա:
13․ Քանզի ամենայն աւրէնք եւ մարգարէք մինչեւ ցՅովհան մարգարէացան:
14․ Եւ եթէ կամիք ընդունել՝ նա՛ է Եղիա՝ որ գալոցն է:
15․ Որ ունիցի ականջս լսելոյ՝ լուիցէ՛:
16․ Ո՞ւմ նմանեցուցից զազգս զայս. նմա՛ն է մանկտւոյ՝ որ նստիցին ի հրապարակս, կարդայցեն զընկերս իւրեանց,
17․ եւ ասիցեն. Փողս հարաք ձեզ՝ եւ ո՛չ կաքաւեցէք, ողբացաք ձեզ՝ եւ ո՛չ կոծեցարուք:
18․ Եկն Յովհա՛ննէս, ո՛չ ուտէր եւ ո՛չ ըմպէր. եւ ասեն՝ դե՛ւ գոյ ի նմա:
19․ Եկն որդի մարդոյ՝ ուտէ՛ եւ ըմպէ. եւ ասեն, ահա այր կերաւղ եւ արբեցաւղ, բարեկամ մաքսաւորա՛ց եւ մեղաւորաց: Եւ արդարացա՛ւ իմաստութիւն յորդւոց իւրոց:
20․ Յայնժամ սկսաւ նախատել զքաղաքսն՝ յորս եղեն բազում զաւրութիւնք նորա, եւ ո՛չ ապաշխարեցին:
21․ Վա՞յ քեզ Քո՛րազին, վա՛յ քեզ Բեթսայիդա. զի եթէ ի Տիւրոս եւ ի Սիդովն եղեա՛լ էին զաւրութիւնքն՝ որ ի ձեզ եղեն, վաղո՛ւ եւս արդեւք խորգո՛վ եւ մոխրով ապաշխարեալ էր:
22․ Բայց ասե՛մ դիւրագո՛յն լիցի երկրին Տիւրոսի եւ Սիդովնի յաւուրն դատաստանի՝ քան ձեզ:
23․ Եւ դու Կա՛փառնաում, մի՛ մինչեւ յերկինս բարձրասցիս. այլ մինչեւ ի դժո՛խս իջցես: Զի եթէ ի Սոդոմ եղեալ էին զաւրութիւնքն՝ որ եղեն ի քեզ, ապաքէն կային եւս մինչեւ ցայսաւր:
24․ Բայց ասեմ ձեզ՝ եթէ երկրին Սոդովմացւոց դիւրագո՛յն լիցի յաւուրն դատաստանի՝ քան քեզ:
25․ Յայնմ ժամանակի պատասխանի ետ Յիսուս՝ եւ ասէ. Գոհանամ զքէն հա՛յր՝ տէր երկնի՛ եւ երկրի. զի ծածկեցեր զայս յիմաստնոց եւ ի գիտնոց, եւ յայտնեցե՛ր տղայոց:
26․ Այո՛ հայր. զի ա՛յսպէս հաճոյ եղեւ առաջի քոյ:
27․ Ամենայն ինչ տուա՛ւ ինձ ի հաւրէ իմմէ: Եւ ոչ ոք ճանաչէ զորդի՝ եթէ ոչ հայր. եւ ո՛չ զհայր ոք ճանաչէ՝ եթէ ոչ որդի, եւ ում որդին կամիցի յայտնել:
28․ Եկա՛յք առ իս ամենայն վաստակեալք եւ բեռնաւորք, եւ ես հանգուցից զձեզ:
29․ Առէ՛ք զլուծ իմ ի ձեզ, եւ ուսարո՛ւք յինէն՝ զի հե՛զ եմ եւ խոնա՛րհ սրտիւ. եւ գտջիք հանգի՛ստ անձանց ձերոց:
30․ Զի լուծ իմ քա՛ղցր եւ բեռն իմ թեթև՛:
Հաղորդում կայքում սխալի վերաբերյալ
Տվյալ հատվածում առկա է սխալ: