1. Լաւ է այր յանդիմանիչ` քան զայր խստապարանոց. զի յանկարծակի հուր հարեալ զնովաւ` չլինիցի բժշկութիւն:
2. Ի գովութեան արդարոց` ուրախ եղիցին ժողովուրդք. ընդ իշխանութիւնս ամպարշտաց` հեծեն արդարք:
3. Առն իմաստասիրի` ուրախ առնի հայր իւր. իսկ որ զբոզս արածէ, կորուսանէ զմեծութիւն:
4. Թագաւոր արդար` կանգնէ զաշխարհ. եւ այր անաւրէն կործանէ: 5 Որ կազմէ կռիւս յերեսս բարեկամի իւրոյ, պատահեսցէ հաղբս զոտիւք իւրովք:
6. Առն մեղաւորի որոգայթ սաստիկ դիցի. իսկ արդարն` յուրախութեան եւ ի խնդութեան եղիցի:
7. Գիտէ արդար դատել զտնանկս. իսկ ամպարիշտն գիտութեան ոչ խելամտէ: եւ աղքատի` ոչ գտանին միտք իրաւախոհք:
8. Արք անաւրէնք հուր հարին զքաղաքէ. եւ իմաստունք դարձուցին զբարկութիւն:
9. Այր իմաստուն դատի զազգս. եւ այր անզգամ ի բարկանալ իւրում ծաղր լինի` եւ ոչ ակնածէ:
10. Արք արեանց` ատեան զարդար. իսկ ուղիղք փափաքեսցեն յանձն նորա:
11. Զամենայն բարկութիւն իւր միանգամայն թափէ անզգամ. իսկ իմաստունն մեղմով համբերէ:
12. Թագաւոր` որ ունկնդիր է բանից անիրաւութեան, ամենեքեան որ ընդ նովաւ են` անաւրէնք են:
13. Փոխատուի եւ փոխառուի ի մի վայր հասելոց, երկոցունց հանդէս առնէ Տէր:
14. Թագաւոր յորժամ ճշմարտութեամբ դատիցի զտնանկս, աթոռ նորա ի վկայութիւն հաստատեսցի:
15. Գանք եւ կշտամբանք տան զիմաստութիւն. մանուկ մոլորեալ` յամաւթ առնէ զծնաւղս իւր:
16. Ի բազմանալ ամպարշտաց` յաճախեն մեղք. իսկ արդարք ի նոցա կործանելն` զահի հարկանին:
17. Խրատեա զորդի քո` եւ հանգուսցէ զքեզ, եւ տացէ զարդ անձին քում:
18. Ոչ գտցի առաջնորդ ազգի անաւրինի. իսկ որ պահէ զաւրէնս` երանելի է:
19. Բանիւք ոչ խրատի ծառայ խիստ. թէպէտ եւ իմանայցէ չդնէ յունկան:
20. Յորժամ տեսանիցես զայր յանդուգն բանիւք, գիտասջիր զի յոյս գոյ յանզգամին քան ի նմա:
21. Որ փափկասուն լինի ի մանկութենէ, ի ծառայութիւն մատնեսցի. եւ յետոյ մորմոքեսցի յանձն իւր:
22. Այր անզգամ փորէ զհակառակութիւն: այր հեզ` դարձոյց զմեղս. եւ այր բարկացաւղ փորեաց զմեղս:
23. Ամբարտաւանութիւն զայր նկուն առնէ. իսկ զխոնարհս փառաւոր առնէ Տէր:
24. Որ բաժանակից լինի գողոց` ատեայ զանձն, որք յորժամ երդումն առաջի դիցի` լուեալ եւ ոչ պատմիցեն,
25. եւ առ երկիւղի եւ ամաւթոյ մարդկան յայտնիցեն եւ կործանեսցին. իսկ որ յուսացեալ է ի Տէր ուրախ լիցի: Ամպարշտութիւն առն ածէ գայթագղութիւն, եւ որ յուսայ ի Տէր` ապրեսցի:
26. Բազումք ողոքեն զերեսս իշխանաց. բայց ի Տեառնէ ելանեն իրաւունք առն:
27. Պիղծ է արդարոյ այր անաւրէն, եւ պիղծ է անաւրինի` ուղիղ ճանապարհ:
Հաղորդում կայքում սխալի վերաբերյալ
Տվյալ հատվածում առկա է սխալ: