Գլուխ 2

   

1․ Եւ ի ծնանելն Յիսուսի ի Բեթղեհէմ Հրէաստանի յաւուրս Հերովդի՛ արքայի: Ահա մոգք յարեւելից եկին յԵրուսաղէմ,

2․ եւ ասեն. Ո՞ւր է որ ծնաւ արքայն Հրէից. զի տեսաք զաստղն նորա յարեւելս, եւ եկաք երկի՛ր պագանել նմա:

3․ Եւ իբրեւ լուաւ արքայ Հերովդէս՝ խռովցաւ, եւ ամենայն Երուսաղէմ ընդ նմա:

4․ Եւ ժողովեալ զամենայն զքահանայապետսն եւ զդպիրս ժողովրդեանն, հարցանէր ի նոցանէ՝ թէ ո՞ւր ծնանիցի Քրիստոսն:

5․ Եւ նոքա ասեն ցնա. Ի Բեթղեհէմ Հրէաստանի: Զի այսպէս գրեալ է ի ձեռն մարգարէին.

6․ Եւ դու Բեթղեհէմ երկի՛ր Յուդայ՝ ո՛չինչ կրտսե՛ր ես յիշխանս Յուդայ. ի քէն ելցէ ինձ իշխան, որ հովուեսցէ զժողովո՛ւրդ իմ զԻսրայէլ:

7․ Յայնժամ Հերովդէս գա՛ղտ կոչեաց զմոգսն, եւ ստուգեա՛ց ի նոցանէ զժամանակն աստեղն երեւելոյ,

8․ եւ արձակեալ զնոսա ի Բեթղահէմ, ասէ. Գնացէք ստուգեցէք վասն մանկանն, եւ յորժամ գտանիցէք՝ ա՛զդ արասջիք ինձ, զի եւ ե՛ս եկեալ երկի՛ր պագից նմա:

9․ Եւ նոքա իբրեւ լուան ի թագաւորէն՝ գնացին: Եւ ահա աստղն զոր տեսին յարեւելս՝ առաջնորդեաց նոցա, մինչեւ եկեալ եկաց ի վերայ՝ ուր է՛ր մանուկն:

10․ Իբրեւ տեսին զաստղն, խնդացի՛ն յոյժ ուրախութիւն մեծ:

11․ Եւ իբրեւ մտին ի տուն, տեսի՛ն զմանուկն հանդերձ Մարեմաւ մա՛րբն իւրով, եւ անկեալ երկի՛ր պագանէին նմա, եւ բացեալ զգանձս իւրեանց՝ մատուցին նմա պատարագս՝ ոսկի՛, եւ կնդրո՛ւկ, եւ զմուռս:

12․ Եւ հրաման առեալ ի տեսլեան, չդառնալ անդրէն առ Հերովդէս, ընդ այլ ճանապարհ գնացին յաշխարհն իւրեանց:

13․ Եւ իբրեւ գնացին նոքա անտի, ահա հրեշտակ Տեառն երեւէր ՚ի տեսլեան Յովսեփու, եւ ասէր. Արի՚ առ զմանուկդ՝ եւ զմայր իւր՝ եւ փախիր յԵգիպտոս, եւ ա՛նդ լինիջիր՝ ցորժամ ասացից քեզ, քանզի ՚ի խնդիր է Հերովդէս կորուսանել զմանուկդ:

14․ Եւ նա յարուցեալ ա՛ռ զմանուկն եւ զմայր իւր ի գիշերի՝ եւ գնա՛ց յԵգիպտոս, եւ ա՛նդ էր մինչեւ ցվախճան Հերովդի:

15․ Զի լցցի ասացեալն ի Տեառնէ ի ձեռն մարգարէին որ ասէ. յԵգիպտոսէ կոչեցից զորդի իմ:

16․ Յայնժամ իբրեւ ետես Հերովդէս թէ խաբեցաւ ի մոգուց անտի, բարկացա՚ւ յոյժ, եւ առաքեաց կոտորեա՛ց զամենայն մանկունս որ էին ի Բեթղեհէմ եւ յամենայն սահմանս նորա՝ յերկեմե՛նից եւ ի խոնարհ, ըստ ժամանակին զոր ստուգեա՛ց ի մոգուցն:

17․ Յայնժամ կատարեցաւ ասացեալն ի ձեռն Երեմիայ մարգարէի՝ որ ասէ.

18․ Ձայն գուժեաց ի Հռամայ, ողբումն եւ լալումն եւ աշխարումն յոյժ, Հռաքէլ լա՛յր զորդիս իւր, եւ ո՛չ կամէր մխիթարել՝ զի ո՛չ էին:

19․ Եւ ի վախճանելն Հերովդի, ահա հրեշտակ Տեառն ի տեսլեան երեւէր Յովսեփայ յԵգիպտոս,

20․ եւ ասէր. Արի ա՛ռ զմանուկդ եւ զմա՛յր իւր, եւ գնա՛ յերկիրն Իսրայէլի, զի մեռա՛ն որ խնդրէին զանձն մանկանդ:

21․ Եւ նա յարուցեալ առ զմանուկն եւ զմայր նորա, եւ ե՛կն յերկիրն Իսրայէլի:

22․ Եւ իբրեւ լուաւ եթէ Արքեղաոս թագաւորեաց Հրէաստանի փոխանակ Հերովդի հօրն իւրոյ, երկեա՛ւ երթալ անդր. եւ հրամա՛ն առեալ յարուցեալ առ ի տեսլեան, գնաց ի կողմանս Գալիլեացւոց:

23․ Եւ եկեալ բնակեցաւ ի քաղաքին՝ որ կոչէր Նազարեթ. զի լցցի՛ բան մարգարէին, թէ Նազովրեցի կոչեսցի: