Գլուխ 6

   

1. Զգո՛յշ լերուք ողորմութեան ձերում՝ մի՛ առնել առաջի մարդկան. որպէս թէ ի ցոյց ինչ նոցա. գուցէ՛ եւ վարձս ո՛չ ընդունիցիք ի Հաւրէն ձերմէ՝ որ յերկինսն է:

2. Այլ յորժամ առնիցես ողորմութիւն, մի՛ հարկաներ փո՛ղ առաջի քո, որպէս կեղծաւորքն առնեն ի ժողովուրդս եւ ի հրապարակս, որպէս զի փառաւորեսցին ի մարդկանէ: Ամէն ասեմ ձեզ՝ ա՛յն իսկ են վարձք նոցա:

3. Այլ դու յորժամ ողորմութիւն առնիցես, մի՛ գիտասցէ ձախ քո զինչ գործէ՛ աջ քո.

4. որպէս զի եղիցի ողորմութիւնն քո ի ծածո՛ւկ. եւ Հայրն քո որ տեսանէ ի ծածուկ՝ հատուսցէ քեզ յայտնապէս:

5. Եւ յորժամ յաղաւթս կայցես, մի՛ լինիցիս որպէս կեղծաւորքն. զի սիրեն ի ժողովուրդս եւ յանկիւնս հրապարակաց կա՛լ յաղաւթս, որպէս զի երեւեսցին մարդկան: Ամէն ասե՛մ ձեզ՝ ա՛յն իսկ են վարձք նոցա:

6. Այլ դու յորժամ կայցես յաղաւթս, մո՛ւտ ի սենեակ քո՝ եւ փակեա՛ զդուրս քո, եւ կա՛ց յաղաւթս առ Հայր քո ի ծածո՛ւկ. եւ Հայրն քո որ տեսանէ ի ծածուկ, հատուսցէ քեզ յայտնապէս:

7. Եւ յորժամ կայցէք յաղոթս, մի՛ շատախա՛ւսք լինիք իբրեւ զհեթանոսսն. զի համարին թէ ի բազում խաւսի՛ց իւրեանց լսելի լինիցին:

8. Արդ՝ մի՛ նմանիցէք նոցա. զի գիտէ Հայրն ձեր զինչ պիտոյ է ձեզ, մինչչե՛ւ ձեր խնդրեա՛լ ինչ իցէ ի նմանէ:

9. Եւ արդ՝ ա՛յսպէս կացէ՛ք դուք յաղաւթս: Հա՛յր մեր որ յերկինս: Սուրբ եղիցի անուն քո:

10. Եկեսցէ՛ արքայութիւն քո: Եղիցին կամք քո որպէս յերկինս եւ յերկրի:

11. Զհա՛ց մեր հանապազորդ տո՛ւր մեզ այսաւր:

12. Եւ թո՛ղ մեզ զպարտիս մեր, որպէս եւ մեք թողումք մերոց պարտապանաց:

13. Եւ մի՛ տանիր զմեզ ի փորձութիւն: Այլ փրկեա՛ զմեզ ի չարէն: Զի քո՛ է արքայութիւն եւ զաւրութիւն եւ փա՛ռք յաւիտեանս. ամէն:

14. Զի եթէ թողուցուք մարդկան զյանցանս նոցա, թողցէ՛ եւ ձեզ Հայրն ձեր երկնաւոր:

15. Ապա թէ ո՛չ թողուցուք մարդկան զյանցանս նոցա, եւ ո՛չ Հա՛յրն ձեր թողցէ ձեզ զյանցանս ձեր:

16. Եւ յորժամ պահիցէք՝ մի՛ լինիք իբրեւ զկեղծաւորսն տրտմեալք. որ ապականեն զերեսս իւրեանց, որպէս զի երեւեսցին մարդկան թէ պահիցեն: Ամէն ասե՛մ ձեզ, այն իսկ են վարձք նոցա:

17. Այլ դու՝ յորժամ պահիցես, ա՛ւծ զգլուխ քո՝ եւ լուա՛ զերեսս քո,

18. զի մի՛ երեւեսցիս մարդկան իբրեւ զպահաւղ. այլ Հաւր քում ի ծածո՛ւկ. եւ Հայրն քո որ տեսանէ ի ծածուկ, հատուսցէ՛ քեզ:

19. Մի՛ գանձէք ձեզ գանձս յերկրի. ուր ցեց եւ ուտիճ ապականեն, եւ ուր գողք ական հատանեն եւ գողանան:

20. Այլ գանձեցէ՛ք ձեզ գանձս յերկինս, ուր ո՛չ ցեց եւ ո՛չ ուտիճ ապականեն, եւ ո՛չ գողք ական հատանեն եւ գողանան:

21. Զի ուր գանձք ձեր են, ա՛նդ եւ սիրտք ձեր լիցին:

22. Ճրագ մարմնոյ ա՛կն, եթէ ակն քո առատ է, ամենայն մարմինդ լուսաւո՛ր եղիցի:

23. Ապա թէ ակն քո չա՛ր է՝ ամենա՛յն մարմինդ խաւարին եղիցի: Իսկ արդ՝ եթէ լոյսդ որ ի քեզ է՝ խաւար է, խաւարն՝ ո՞րչափ եւս:

24. Ո՛չ ոք կարէ երկուց տերանց ծառայել. կամ զմին ատիցէ՝ եւ զմեւսն սիրիցէ. կամ զմին մեծարիցէ՝ եւ զմեւսն արհամարհիցէ. ո՛չ կարէք Աստուծոյ ծառայել եւ մամոնայի:

25. Վասն այդորիկ ասե՛մ մի՛ հոգայք վասն ոգւոց ձերոց՝ զինչ ուտիցէք՝ կամ զինչ ըմպիցէք. եւ մի՛ վասն մարմնոց ձերոց՝ թէ զինչ ագանիցիք. ո՞չ ապաքէն ոգի՛ առաւել է քան զկերակուր՝ եւ մարմին քան զհանդերձ:

26. Հայեցարո՛ւք ի թռչունս երկնից՝ զի ո՛չ վարեն եւ ո՛չ հնձեն, եւ ո՛չ ժողովեն ի շտեմարանս. եւ Հայրն ձեր երկնաւոր կերակրէ՛ զնոսա: Ո՞չ ապաքէն դուք առաւե՛լ էք քան զնոսա:

27. Իսկ արդ՝ ո՞ ի ձէնջ առ հոգա՛լ իւրում՝ յաւելուլ կարիցէ ի հասակ իւր կանգուն մի:

28. Եւ վասն հանդերձի զի՞ հոգայք: Հայեցարո՛ւք ի շուշանն վայրենի՝ ո՛րպէս աճէ. ո՛չ ջանայ, եւ ո՛չ նիւթէ՛:

29. Ասեմ ձեզ՝ զի եւ ո՛չ Սողովմովն յամենայն ի փառսն իւրում զգեցաւ իբրեւ զմի ի նոցանէ:

30. Իսկ եթէ զխո՛տն ի վայրի, որ այսաւր է եւ վաղիւ ի հնոց արկանի, Աստուած ա՛յնպէս զգեցուցանէ. որչափ եւս առաւել զձեզ թերահաւատք:

31. Մի այսուհետեւ հոգայցէք՝ եւ ասիցէք. Զինչ կերիցո՛ւք՝ կամ զինչ արբցուք՝ կամ զինչ զգեցցուք:

32. Զի զա՛յդ ամենայն հեթանոսք խնդրեն. քանզի գիտէ՛ Հայրն ձեր երկնաւոր՝ թէ պիտո՛յ է ձեզ այդ ամենայն:

33. Խնդրեցէ՛ք նախ զարքայութիւն Աստուծոյ եւ զարդարութիւն նորա, եւ այդ ամենայն յաւելցի՛ ձեզ:

34. Մի՛ այսուհետեւ հոգայցէք վասն վաղուի՝ զի վաղիւն վասն ի՛ւր հոգասցի. շա՛տ է աւուրն չա՛ր իւր: