1․ Յայնժամ նմանեսցի արքայութիւն երկնից տա՛սն կուսանաց, որոց առեալ զլապտերս իւրեանց՝ ելին ընդ առաջ փեսայի եւ հարսին:
2․ Հինգն ի նոցանէ յիմարք էին՝ եւ հինգն իմաստունք:
3․ Յիմարքն առին զլապտերսն, եւ ձէթ ընդ իւրեանս ո՛չ բարձին:
4․ Իսկ իմաստունքն առին եւ ձէ՛թ ամանաւք ընդ լապտերս իւրեանց:
5․ Եւ ի յամել փեսային, նիրհեցի՛ն ամենեքեան եւ ի քուն մտին:
6․ Եւ ի մէջ գիշերի եղեւ բարբառ. Ահա՛ փեսայ գա՛յ, արի՛ք ընդ առաջ նորա:
7․ Յայնժամ յարեան ամենայն կուսանքն, եւ կազմեցին զլապտերս իւրեանց:
8․ Ասեն յիմարքն ցիմաստունսն. Տո՛ւք մեզ յիւղոյդ ձերմէ, զի ահա՝ շիջանին լապտերքս մեր:
9․ Պատասխանի ետուն իմաստունքն՝ եւ ասեն. Գուցէ ո՛չ իցէ մեզ եւ ձեզ բաւական, այլ երթա՛յք ի վաճառականս՝ եւ գնեսջի՛ք ձեզ:
10․ Իբրեւ նոքա գնացին գնել՝ եւ եկն փեսայն եւ պատրաստքն մտի՛ն ընդ նմա ի հարսանիսն՝ եւ փակեցա՛ւ դուռնն:
11․ Յետոյ՝ գան եւ ա՛յլ կուսանքն՝ եւ ասեն. Տէ՛ր Տէ՛ր՝ բա՛ց մեզ:
12․ Նա պատասխանի ետ եւ ասէ. Ամէն ասե՛մ ձեզ, թէ ո՛չ գիտեմ զձեզ:
13․ Արթո՛ւն կացէք՝ զի ո՛չ գիտէք զաւրն եւ ո՛չ զժամ:
14․ Որպէս այր մի գնացեալ ի տա՛ր աշխարհ, կոչեաց զծառայս իւր՝ եւ ետ նոցա զինչս իւր:
15․ Ումեմն ետ հինգ քանքար, եւ ումեմն երկո՛ւս, եւ ումեմն մի՛. իւրաքանչի՛ւր ըստ իւրո՛ւմ կարի, եւ գնա՛ց:
16․ Չոգաւ վաղվաղակի՝ որ ա՛ռ զհինգն, գործեա՛ց նոքաւք, եւ շահեցաւ ա՛յլ եւս հինգ:
17․ Նոյնպէս եւ որ զերկո՛ւսն շահեցաւ ա՛յլ եւս երկուս:
18․ Եւ որ զմի՛ն առ՝ գնաց փորեա՛ց զերկիր, եւ թաքոյց զարծաթ տեա՛ռն իւրոյ:
19․ Յետ բազում ժամանակի, գա՛յ տէր ծառայիցն այնոցիկ, եւ առնէ համա՛րս ի մէջ նոցա:
20․ Եւ մատուցեա՛լ որ զհինգ քանքարն առ, մատոյց ա՛յլ եւս հինգ քանքար՝ եւ ասէ. Տէ՛ր՝ հինգ քանքա՛ր ետուր ցիս, արդ ահաւասիկ՝ հինգ ա՛յլ եւս քանքար ի վերայ շահեցայ:
21․ Ասէ ցնա տէրն իւր. Ազնի՛ւ ծառայ՝ բարի՛ եւ հաւատարիմ, որովհետեւ ի սակաւուդ հաւատարիմ ես, ի վերայ բազմա՛ց կացուցի զքեզ. մո՛ւտ յուրախութիւն տեառն քոյ:
22․ Մատուցեալ եւ որոյ զերկո՛ւս քանքարսն առեալ էր, եւ ասէ. Տէ՛ր՝ երկո՛ւս քանքարս ետուր ցիս, ահաւասիկ երկո՛ւս եւս ա՛յլ քանքարս՝ զոր ի վերայ շահեցայ:
23․ Ասէ ցնա տէրն իւր. Ազնի՛ւ ծառայ՝ բարի՛ եւ հաւատարի՛մ, որովհետեւ ի սակաւո՛ւդ հաւատարիմ ես, ի վերայ բազմա՛ց կացուցից զքեզ. մո՛ւտ յուրախութիւն տեառն քոյ:
24․ Մատուցեալ եւ որոյ զմի՛ քանքարն առեալ էր, եւ ասէ. Տէր՝ գիտէի զի այր մի խի՛ստ ես, հնձես՝ զոր ո՛չ սերմանեցեր, եւ ժողովե՛ս՝ ուստի ո՛չ սփռեցեր.
25․ երկեա՛յ՝ գնացի եւ թաքուցի՛ զքանքարս քո յերկրի. արդ՝ աւասիկ քոյդ՝ ցքե՛զ:
26․ Պատասխանի ետ տէրն՝ եւ ասէ ցնա. Ծառա՛յ չար եւ վատ՝ գիտէիր թէ հնձեմ՝ ուստի ո՛չ սերմանեցի, եւ ժողովե՛մ՝ ուստի ո՛չ սփռեցի.
27․ պա՛րտ էր քեզ արկանել զարծաթդ իմ ի սեղանաւորս, եւ եկեալ ես՝ տոկոսեաւք պահանջէի զիմն:
28․ Արդ՝ առէ՛ք ի դմանէ զքանքարդ՝ եւ տո՛ւք այնմ որ ունիցի զտա՛սն քանքարն:
29․ Զի ամենայնի որ ունիցի՝ տացի՛ եւ յաւելցի, եւ որ ո՛չն ունիցի, եւ զոր ունիցի՛ն՝ բարձցի՛ ի նմանէ:
30․ Եւ զծառայդ անպիտան հանէ՛ք ի խաւարն արտաքին. ա՛նդ եղիցի լալ եւ կրճել ատամանց:
31․ Եւ յորժամ եկեսցէ որդի մարդոյ փառաւք իւրովք՝ եւ ամենայն հրեշտակք ընդ նմա, յայնժամ նստցի՛ յաթոռ փառաց իւրոց,
32․ եւ ժողովեսցին առաջի նորա ամենայն ազգք, եւ մեկնեսցէ զնոսա ի միմեանց, որպէս հովիւ զի մեկնէ զաւդիս յայծեաց,
33․ եւ կացուսցէ զաւդիսն ընդ աջմէ՛ իւրմէ եւ զայծիսն ի ձախմէ:
34․ Յայնժամ ասասցէ՛ թագաւորն ցայնոսիկ որ ընդ աջմէն իցեն. Եկա՛յք աւրհնեալք հաւր իմոյ, ժառանգեցէ՛ք զպատրաստեալ ձեզ արքայութիւնն իսկզբանէ աշխարհի:
35․ Զի քաղցեայ՝ եւ ետո՛ւք ինձ ուտել. ծարաւեցի՝ եւ արբուցէք ինձ. աւտա՛ր էի՝ եւ ժողովեցէք զիս.
36․ մերկ՝ եւ զգեցուցէք զիս. հիւանդ էի՝ եւ տեսէք զիս. ի բանտի էի՝ եւ եկի՛ք առ իս:
37․ Յայնժամ պատասխանի տացեն նմա արդարքն եւ ասասցեն. Տէր՝ ե՞րբ տեսաք զքեզ քաղցեալ՝ եւ կերակրեցաք, կամ ծարաւի՝ եւ արբուցաք:
38․ Ե՞րբ տեսաք զքեզ աւտար՝ եւ ժողովեցաք, կամ մերկ՝ եւ զգեցուցաք:
39․ Ե՞րբ տեսաք զքեզ հիւանդ՝ կամ ի բանտի, եւ եկաք առ քեզ:
40․ Պատասխանի՛ տացէ թագաւորն՝ եւ ասասցէ ցնոսա. Ամէն ասե՛մ ձեզ, որովհետեւ արարէք միում յեղբարցս այսոցիկ փոքրկանց՝ ինձ արարէք:
41․ Յայնժամ ասասցէ՛ եւ ցայնոսիկ՝ որ ընդ ահեկէն իցեն. Երթա՛յք յինէն՝ ա՛նիծեալք ի հուրն յաւիտենական, որ պատրաստեալ է սատանայի եւ հրեշտակաց նորա:
42․ Զի քաղցեայ՝ եւ ո՛չ ետուք ինձ ուտել, ծարաւեցի՝ եւ ո՛չ արբուցէք զիս.
43․ աւտար էի՝ եւ ո՛չ ժողովեցէք զիս, մերկ էի՝ եւ ո՛չ զգեցուցէք զիս, հիւանդ՝ եւ ի բանտի՝ եւ ո՛չ տեսէք զիս:
44․ Յայնժամ պատասխանի՛ տացեն եւ նոքա՝ եւ ասասցեն. Տէր՝ ե՞րբ տեսաք զքեզ քաղցեալ՝ կամ ծարաւի, կամ աւտար, կամ մերկ, կամ հիւանդ, կամ ի բանտի, եւ ո՛չ պաշտեցաք զքեզ:
45․ Յայնժամ պատասխանի՛ տացէ նոցա՝ եւ ասասցէ. Ամէն ասե՛մ ձեզ, որովհետեւ ո՛չ արարէք միում ի փոքրկանցս յայսցանէ, եւ ո՛չ ինձ արարէք:
46․ Եւ երթիցեն նոքա ի տանջանսն յաւիտենականս, եւ արդարքն ի կեա՛նսն յաւիտենականս:
Հաղորդում կայքում սխալի վերաբերյալ
Տվյալ հատվածում առկա է սխալ: