Գլուխ 3

   
1. Իսկ արդ՝ զի՞նչ աւելի է հրէին, կամ զի՞նչ աւգուտ ի թլփատութենէ՛ անտի:
2. Բազո՛ւմ ինչ, ամենայն իրաւք. նախ՝ ա՛յն իսկ, զի հաւատարի՛մ եղեն պատգա՛մքն Աստուծոյ:
3. Իսկ արդ՝ եթէ չէ՛ր հաւատացեալ ոմանց, մի՞թէ՝ անհաւատութիւն նոցա զԱստուծոյ հաւա՛տսն խափանէ՞ր. քա՛ւ լիցի:
4. Արդ՝ եղիցի Աստուած ճշմարիտ, եւ ամենայն մարդ սո՛ւտ. որպէս եւ գրեալ որպէս արդա՛ր եղիցես ի բանս քո, եւ յաղթիցես ի դատե՛լ քեզ:
5. Իսկ արդ՝ եթէ ապիրատութիւնն մեր զԱստուծոյ արդարութիւնն յանդիմա՛ն կացուցանէ, զի՞նչ ասեմք. միթէ անիրա՞ւ ինչ է Աստուած՝ որ ածէ զբարկութիւնն
6. ըստ մարդկութեան ասեմ. քա՛ւ լիցի: Ապա թէ ոչ՝ զիա՞րդ դատի Աստուած զաշխարհ:
7. Զի եթէ ճշմարտութիւնն Աստուծոյ յիմում ստութեանն առաւելաւ ի փա՛ռս նորա, զի՞ եւս ես իբրեւ զմեղաւո՛ր դատիմ:
8. Եւ կամ թէ՝ որպէս հայհոյի՛մքն, եւ որպէս ասե՛ն ոմանք զմէնջ ասել, թէ արասցուք զչա՛ր՝ զի եկեսցէ՛ բարի. որոց դատաստանքն յիրաւի՛ են:
9. Եւ արդ՝ ի՞ւ իւիք առաւե՛լ իցեմք. ապաքեն եւ ո՛չ իւիք. քանզի յառաջագո՛յն իսկ մեղադի՛ր եղեաք հրէից եւ հեթանոսաց, ամենեցուն ընդ մեղաւք լինելոյ:
10. Որպէս եւ գրեալ թէ ո՛չ գոյ արդար՝ եւ ո՛չ մի.
11. եւ ո՛չ գոյ՝ որ իմանայ, եւ ո՛չոք է որ խնդրէ՛ զԱստուած:
12. Ամենեքեան խոտորեցան ի միասին եւ անպիտանացան: Ո՛չոք է որ առնէ զքաղցրութիւն, ո՛չոք է մինչեւ ի մի:
13. Գերեզման բա՛ց է կոկորդ նոցա, լեզուաւք իւրեանց նենգաւո՛րք եղեն: Թոյնք իժից ի ներքոյ շրթանց նոցա.
14. որոց բերա՛նք անիծի՛ւք եւ դառնութեամբ լի՛ են:
15. Երա՛գ են ո՛տք նոցա հեղուլ զարիւն:
16. Բեկումն եւ թշուառութիւն ի ճանապարհս նոցա.
17. եւ զճանապարհն խաղաղութեան ո՛չ ծանեան:
18. Ո՛չ է երկեւղ Աստուծոյ առաջի աչաց նոցա:
19. Բայց գիտե՛մք՝ որ ինչ միանգամ աւրէ՛նքն ասեն, ա՛յնոցիկ որ ընդ աւրինաւքն են՝ ասեն. զի ամենայն բերան խցցի, եւ դատապա՛րտ լիցի ա՛մենայն աշխարհ Աստուծոյ:
20. Զի ի գործոց աւրինաց, ո՛չ արդարասցի ամենայն մարմին առաջի նորա. քանզի աւրինա՛ւքն է գիտութիւն մեղաց:
21. Բայց արդ՝ առանց աւրինա՛ցն իսկ արդարութի՛ւնն Աստուծոյ յայտնեա՛լ է, վկայեա՛լ յաւրինա՛ց անտի՝ եւ ի մարգարէից:
22. Քանզի արդարութիւնն Աստուծոյ ի հաւատո՛ց անտի Յիսուսի Քրիստոսի, յամենա՛յն հաւատացեալս. եւ ո՛չինչ է խտիր:
23. Քանզի ամենեքին մեղան. եւ նուազեա՛լ են ի փառացն Աստուծոյ:
24. Եւ արդարանա՛ն ձրի նորին շնորհաւք ի ձեռն փրկութեանն որ ի Քրիստոս Յիսուս:
25. Զոր յառա՛ջն եդ Աստուած քաւութիւն ի ձե՛ռն հաւատոցն արեամբ նորա, ի հանդէ՛ս արդարութեան նորա, վասն թողութեան յառաջագոյն մեղա՛ցն գործելոց.
26. ի ներելն Աստուծոյ: Ի հանդէ՛ս արդարութեանն նորա ի ժամանակի յա՛յսմիկ. զի եղիցի նա՛ արդար, եւ արդարացուսցէ՛ զայն որ ի հաւատո՛ցն Յիսուսի:
27. Իսկ արդ՝ ո՞ւր են պարծանքն՝ արգելա՛ն: Յորո՞ց աւրինաց: Ի գործո՞ց անտի: Ո՛չ, այլ ի հաւատո՛ցն աւրինաց:
28. Քանզի համարիմք հաւատո՛վք արդարանալ մարդոյ՝ առանց գործոց աւրինաց:
29. Եթէ հրէից միա՛յն իցէ Աստուած՝ եւ հեթանոսաց ո՞չ. այո՛ եւ հեթանոսա՛ց:
30. Զի եթէ մի է Աստուած, որ արդարացուցանէ՛ զթլփատութիւն ի հաւատոց, ապա եւ զանթլփատութիւնն նովին հաւատովք:
31. Արդ՝ զաւրէնսն ինչ խափանե՞մք հաւատովքս. քա՛ւ լիցի: Այլ զաւրէնսն հաստատե՛մք: