1. Պա՛ւղոս կոչեցեալ առաքեա՛լ Յիսուսի Քրիստոսի՝ կամաւքն Աստուծոյ, եւ Սոսթենէ՛ս եղբայր.
2. եկեղեցւոյդ Աստուծոյ որ է ի Կորնթոս, նուիրելոց ի Քրիստոս Յիսուս՝ կոչեցելո՛ց սրբոց, ամենեքումբք հանդերձ որ կարդան զանուն Տեառն մերոյ Յիսուսի Քրիստոսի, յամենայն տեղիս նոցա՝ եւ մեր:
3. Շնորհք ընդ ձեզ եւ խաղաղութի՛ւն յԱստուծոյ հա՛ւրէ մերմէ, եւ ի Տեառնէ Յիսուսէ Քրիստոսէ:
4. Գոհանա՛մ զԱստուծոյ իմոյ յամենայն ժամ վասն ձեր՝ ի վերայ շնորհացն Աստուծոյ որ տուեալ են ձեզ ի Քրիստոս Յիսուս.
5. զի յամենայնի՛ մեծացարուք դուք նովաւ՝ ամենայն բանիւ, եւ ամենայն գիտութեամբ.
6. որպէս վկայութիւնն իսկ Աստուծոյ հաստատեցաւ ի ձեզ:
7. Զի դուք մի՛ նուազիցիք՝ եւ մի՛ իւիք շնորհաւք, ա՛կն կալեալ յայտնութեանն Տեառն մերոյ Յիսուսի Քրիստոսի:
8. Որ եւ հաստատեսցէ զձեզ մինչեւ ի կատարած, անարա՛տս՝ յաւրն Տեառն մերոյ Յիսուսի Քրիստոսի:
9. Հաւատարի՛մ է Աստուած, որով կոչեցարուք ի հաղորդութիւն որդւո՛յ նորա Յիսուսի Քրիստոսի Տեառն մերոյ:
10. Աղաչեմ զձեզ ե՛ղբարք անուամբն Տեառն մերոյ Յիսուսի Քրիստոսի. զի զնո՛յն բան ունիցիք ամենեքեան, եւ մի՛ իցեն ի ձեզ հերձուածք. քանզի էիք հաստատեա՛լք ի նո՛յն միտս եւ ի նոյն հանճար:
11. Ա՛զդ եղեւ ինձ վասն ձեր ե՛ղբարք՝ ի Քղուացւո՛ց անտի, թէ հակառակութի՛ւնք են ի ձեզ:
12. Եւ արդ ասե՛մ իսկ, եթէ իւրաքանչիւր ոք ի ձէնջ ասէ. ես պաւղոսեա՛ն եմ, եւ մեւսն՝ եթէ ես ապաւղոսեան, եւ մեւսն՝ եթէ ես կեփայեան. եւ մեւսն՝ եթէ ես քրիստոսեան:
13. Իսկ արդ՝ բաժանեա՞լ ինչ իցէ Քրիստոս. մի՞թէ՝ Պաւղոս ի խաչ ելեալ իցէ վասն ձեր, կամ յանուն Պաւղոսի՞ մկրտեցարուք:
14. Գոհանա՛մ զԱստուծոյ իմոյ՝ զի ո՛չ զոք ի ձէնջ մկրտեցի, բայց միայն զԿրիսպոս՝ եւ զԳայիոս. զի մի՛ ոք ասիցէ,
15. թէ յիմ անուն մկրտեցարուք:
16. Տա՛լ ետու կնիք եւ տանն Ստեփանեայ: Զայլ ոք ո՛չ գիտեմ ամենեւին թէ մկրտեցի:
17. Զի ո՛չ առաքեաց զիս Քրիստոս մկրտել՝ այլ աւետարանե՛լ. ո՛չ ճարտարութեամբ բանից, զի մի՛ ընդունայն լիցի խա՛չն Քրիստոսի:
18. Զի ճա՛ռ խաչին՝ կորուսելոցն յիմարութի՛ւն այլ փրկելո՛ցս մեզ՝ զաւրութի՛ւն Աստուծոյ:
19. Զի գրեա՛լ է, կորուսից զիմաստութիւն իմաստնոց. եւ զխորհուրդս խորհրդականաց արհամարհեցից:
20. Ո՞ւր իմաստուն, ո՞ւր դպիր, ո՞ւր քննիչ աշխարհիս այսորիկ. ոչ ապաքէն յիմա՛րեցոյց Աստուած զիմաստութիւն աշխարհիս:
21. Քանզի իմաստութեամբն Աստուծոյ՝ ո՛չ ծանեաւ աշխարհ իմաստութեամբն զԱստուած. հաճեցա՛ւ Աստուած յիմարութեամբ քարոզութեանն ապրեցուցանել զհաւատացեալս:
22. Իսկ որովհետեւ հրեայք նշա՛ն հայցեն, եւ հեթանոսք իմաստութիւն խնդրեն.
23. մեք քարոզեսցուք զխաչելեա՛լն Քրիստոս, հրէից գայթագղութիւն, եւ հեթանոսաց յիմարութիւն.
24. բայց նոցին իսկ կոչեցելոցն հրէից եւ հեթանոսաց, զՔրիստոս՝ Աստուծոյ զաւրութիւն, եւ Աստուծոյ իմաստութիւն:
25. Զի յիմարն Աստուծոյ իմաստնագո՛յն է քան զմարդիկ. եւ տկարն Աստուծոյ զաւրագո՛յն է քան զմարդիկ:
26. Թէպէտ եւ զձե՛ր իսկ կոչումնդ տեսէք ե՛ղբարք, զի ո՛չ բազում իմաստունք ըստ մարմնոյ, եւ ո՛չ բազում հզաւրք, եւ ո՛չ բազում ազնուականք.
27. այլ զյիմարս աշխարհիս ընտրեաց Աստուած, զի յամա՛ւթ արասցէ զիմաստունս. եւ զտկարս աշխարհիս ընտրեաց Աստուած, զի յամա՛ւթ արասցէ զհզաւրս.
28. եւ զանտոհմս աշխարհի եւ զարհամարհեա՛լս ընտրեաց Աստուած՝ եւ զոչինչսն, զի զէ՛սն իմն խափանեսցէ՛.
29. որպէս զի մի՛ պարծեսցի ամենայն մարմին առաջի Աստուծոյ:
30. Զի ի նմանէ՛ դուք էք ի Քրիստոս Յիսուս, որ եղեւ մեզ իմաստութի՛ւն յԱստուծոյ, արդարութիւն, եւ սրբութիւն, եւ փրկութիւն.
31. զի որպէս եւ գրեա՛լ որ պարծի՛ն ի Տէր պարծեսցի:
Հաղորդում կայքում սխալի վերաբերյալ
Տվյալ հատվածում առկա է սխալ: