1. Ո՛չ կամիմ եթէ տգէտք իցէք ե՛ղբարք, զի հա՛րքն մեր ամենեքի՛ն ընդ ամպովն էին. եւ ամենեքի՛ն ընդ ծովն անցին.
2. եւ ամենեքեան ի Մովսէս մկրտեցան յա՛մպն եւ ի ծովն.
3. եւ ամենեքի՛ն զնոյն զհոգեւոր զկերակուրն կերան.
4. եւ ամենեքի՛ն զնոյն զհոգեւոր ըմպելին արբին, զի ըմպէին ի հոգեւո՛ր վիմէն որ երթայր զհետ նոցա. եւ վէմն էր ի՛նքն Քրիստոս:
5. Այլ ո՛չ եթէ ընդ բազումս ի նոցանէ հաճեցաւ Աստուած. քանզի տապա՛ստ անկան յանապատի անդ:
6. Եւ այն աւրինակաւ լինէր վասն մեր. զի մի՛ լիցուք ցանկացաւղք չարեաց, որպէս նոքայն ցանկացան:
7. Եւ մի կռապա՛շտք լինել՝ որպէս ոմանք ի նոցանէ, որպէս եւ գրեա՛լ Նստա՛ւ ժողովուրդն ուտե՛լ եւ ըմպել՝ եւ յարեան ի խաղա՛լ:
8. Եւ մի՛ պոռնկեսցուք, որպէս ոմանք պոռնկեցան ի նոցանէ՝ եւ անկա՛ն ի միո՛ւմ աւուր քսան եւ չո՛րք հազարք:
9. Եւ մի՛ փորձեսցուք զՏէր. որպէս ոմանք ի նոցանէ փորձեցին, եւ յաւձի՛ց անտի սատակեցան:
10. Եւ մի՛ տրտնջեսցուք. որպէս ոմանք ի նոցանէ տրտնջեցին, եւ կորեան ի սատակչէ՛ անտի:
11. Այլ ա՛յն ամենայն աւրինակա՛ւ անցանէր ընդ նոսա. բայց գրեցաւ վասն մերո՛յ խրատու, յորս վախճան յաւիտեա՛նցն եհաս:
12. Այսուհետեւ որ համարիցի հաստատո՛ւն կալ, զգո՛յշ լիցի, գուցէ անկանիցի:
13. Փորձութիւն ի ձեր վերայ ո՛չ է եկեալ՝ բա՛ց ի մարդկանէ. այլ հաւատարի՛մ է Աստուած, որ ո՛չ արկցէ զձեզ ի փորձութիւն առաւել քան զկար ձեր. այլ արասցէ ընդ փորձութեանն եւ զե՛լսն, զի համբերե՛լ կարասջիք:
14. Վասն որոյ սի՛րելիք իմ փախերո՛ւք ի կռապաշտութենէ:
15. Իբրեւ ընդ իմաստո՛ւնս խաւսիմ. ընտրեցէ՛ք ձեզէ՛ն զոր ասեմս:
16. Բաժա՛կն աւրհնութեան զոր աւրհնեմք՝ ոչ ապաքէն հաղորդութիւն է արեա՛նն Քրիստոսի: Հացն զոր բեկանեմք, ոչ ապաքէն հաղորդութիւն է մարմնոյն Քրիստոսի:
17. Զի մի հաց՝ մի՛ մարմին եմք բազումքս. զի ամենեքին ի միոջէ՛ հացէ անտի վայելեմք:
18. Տեսէ՛ք զԻսրայէլն ըստ մարմնոյ. ոչ ապաքէն որ ուտեն ի զոհիցն, հաղորդք են սեղանոյն:
19. Իսկ արդ՝ զի՞նչ ասեմ, եթէ զոհեալն իցէ՞ ինչ. եւ կամ կո՛ւռքն իսկ՝ իցե՞ն ինչ:
20. Այլ զոր զոհենն հեթանոսք, դիւաց՝ եւ ո՛չ Աստուծոյ զոհեն: Ոչ կամիմ զձեզ հաղորդս դիւաց լինել. քանզի ո՛չ կարէք զբաժակն Տեառն ըմպել՝ եւ զբաժակն դիւաց:
21. Եւ ոչ կարէք ի սեղանոյ Տեառն վայելել՝ եւ ի սեղանոյ դիւաց:
22. Եթէ նախա՛նձ ինչ արկանիցեմք Տեառն. մի թէ զաւրագոյնք իցեմք քան զնա:
23. Ամենայն ինչ ինձ մա՛րթ է, այլ ո՛չ ամենայն ինչ աւգուտ ամենայն ինչ ինձ մա՛րթ է, այլ ո՛չ ամենայն ինչ շինէ:
24. Մի՛ ոք զանձին եւ եթ խնդրեսցէ՝ այլ եւ զընկերի՛ն:
25. Ամենայն ինչ որ ի սպանդանոցի վաճառի, կերա՛յք՝ եւ մի՛ խնդրէք վասն խղճի մտաց.
26. զի Տեառն է երկիր լրիւ իւրով:
27. Եթէ ոք կոչեսցէ զձեզ յանհաւատից, եւ կամիցիք երթալ. զամենայն ինչ որ առաջի դնիցի, կերա՛յք՝ եւ մի՛ խտրէք վասն խղճի մտաց:
28. Ապա թէ ոք ասասցէ ձեզ՝ թէ այդ զոհեալ է, մի՛ ուտիցէք վասն նորա՝ որ գուշակն եղեւ, եւ վասն խղճի մտացն:
29. Այլ զխիղճ մտացն ասեմ, ո՛չ զիւրն, այլ զընկերին: Իսկ ընդէ՞ր բնաւ ազատութիւնս իմ դատիցի յայլո՛յ խղճէ մտաց:
30. Եթէ ես շնորհաւք վայելեմ, ընդէ՞ր հայհոյիցիմ, վասն որոյ ե՛սն գոհանամ:
31. Արդ՝ եթէ ուտիցէք, եթէ ըմպիցէք, եթէ զինչ եւ գործիցէք, զամենայն ինչ ի փա՛ռս Աստուծոյ արասջի՛ք:
32. Առանց գայթագղութի՛ւն դնելոյ հրէից եւ հեթանոսաց՝ լինիցի՛ք, եւ եկեղեցւո՛յն Աստուծոյ:
33. Որպէս եւ ես ամենեւին ամենեցո՛ւն հաճոյ լինիմ. ո՛չ խնդրեմ զանձին աւգուտ, այլ զբազմա՛ց զի ապրեսցին:
Հաղորդում կայքում սխալի վերաբերյալ
Տվյալ հատվածում առկա է սխալ: