1. Ցուցանե՛մ ձեզ եղբարք՝ զաւետարանն իմ, զոր աւետարանեցի զոր եւ ընկալարուք, յոր եւ հաստատեա՛լդ էք.
2. որով ապրեցէքն. որով բանիւ աւետարանեցի՛ թէ ունիցիք. բայց եթէ ի զո՛ւր ինչ հաւատացէք:
3. Զի ես ձեզ զայն նա՛խ աւանդեցի, զոր եւ ե՛սն ընկալայ. թէ եւ Քրիստոս մեռա՛ւ վասն մեղաց մերոց ըստ գրոց,
4. եւ զի թաղեցա՛ւ, թէ եւ յարեա՛ւ յաւուր երրորդի՝ ըստ գրոց.
5. եւ թէ երեւեցաւ Կեփայի՛, եւ ապա երկոտասանի՛ցն.
6. ապա երեւեցաւ աւելի՛ եւս քան զհինգ հարեւր եղբարց միանգամայն. յորոց բազումք կա՛ն մինչեւ ցայժմ, եւ ոմանք ննջեցի՛ն:
7. Եւ ապա երեւեցաւ Յակովբա՛յ, ապա առաքելոցն ամենեցուն:
8. Հո՛ւսկ յետոյ քան զամենեսին՝ իբրեւ անարգի՛ միոջ՝ երեւեցա՛ւ եւ իձ:
9. Զի ե՛ս իսկ եմ տրո՛ւպն առաքելոց. որ չե՛մ իսկ արժանի թէ կոչեցայց առաքեալ. զի հալածեցի՛ զեկեղեցին Աստուծոյ:
10. Այլ շնորհա՛ւքն Աստուծոյ, եմ զինչ եւ իցեմ. եւ շնորհք նորա որ յիս՝ ընդունայն ինչ ո՛չ եղէն. այլ առաւե՛լ քան զնոսա ամենեսին վաստակեցի. եւ ո՛չ եթէ ես՝ այլ շնորհքն Աստուծոյ որ ընդ իս:
11. Արդ՝ եթէ ես, եւ եթէ նոքա՝ այսպէս քարոզեցաք, եւ դուք ա՛յսպէս հաւատացէք:
12. Ապա եթէ Քրիստոս քարոզի՛ թէ ի մեռելոց յարուցեալ է, զիա՞րդ ասեն ոմանք ի ձէնջ՝ եթէ յարութիւն մեռելոց չի՛ք:
13. Եթէ յարութիւն մեռելոց չի՛ք, ապա եւ Քրիստո՛ս չէ՛ յարուցեալ:
14. Եւ եթէ Քրիստոս չիցէ յարուցեալ, ընդունա՛յն է քարոզութիւնն մեր, ընդունա՛յն են եւ հաւատքն ձեր.
15. եւ գտանիցիմք սո՛ւտ վկայք Աստուծոյ. զի վկայեցաք զԱստուծոյ՝ եթէ յարոյց զՔրիստոս. զոր ո՛չն արդեւք յարոյց՝ եթէ մեռեալք ո՛չ յառնիցեն: 16 Իսկ եթէ մեռեալք ո՛չ յառնեն, ապա եւ Քրիստո՛ս չէ՛ յարուցեալ:
17. Եւ եթէ Քրիստոս չիցէ յարուցեալ, ընդունա՛յն են հաւատքն ձեր. եւ տակաւի՛ն ի նմին ի մեղս կայցէք:
18. Իսկ արդ՝ որ ննջեցինն ի Քրիստոս, կորեա՞ն արդեւք:
19. Եթէ այսու կենաւքս միա՛յն յուսացեալ եմք ի Քրիստոս, ապա ողորմելի՛ եմք քան զամենայն մարդիկ:
20. Այլ արդ՝ Քրիստոս յարուցեա՛լ է ի մեռելոց, առաջին պտուղն ննջեցելոց.
21. քանզի մարդով եղեւ մահ, եւ մարդո՛վ յարութիւն մեռելոց:
22. Որպէս Ադամաւն ամենեքին մեռանին, նոյնպէս եւ Քրիստոսիւ ամենեքին կենդանասցի՛ն,
23. իւրաքանչիւր յիւրում կարգի. նախ՝ Քրիստոս, եւ ապա քրիստոսեա՛նք ի գալստեան նորա.
24. եւ ապա կատարած: Յորժամ տացէ՛ ի ձեռս զթագաւորութիւնն Աստուծոյ եւ հաւր. յորժամ խափանեսցէ՛ զամենայն իշխանութիւնս, եւ զամենայն պետութիւն եւ զզաւրութիւն:
25. Զի պա՛րտ է նմա թագաւորե՛լ, մինչեւ դիցէ զամենայն թշնամիս ի ներքոյ ոտից իւրոց:
26. Յետին թշնամին խափանի՝ մա՛հ. եւ զամենայն ինչ հնազանդ արար ի ներքոյ ոտից նորա:
27. Այլ յորժամ ասիցէ, թէ հնազանդեա՛լ է նմա ամենայն, յա՛յտ է՝ թէ բա՛ց յայնմանէ որ հնազանդեցո՛յց նմա զամենայն:
28. Այլ յորժամ հնազանդեսցի՛ նմա ամենայն յայնժամ եւ ինքն որդի հնազանդեսցի ա՛յնմ, որ հնազանդեցո՛յց նմա զամենայն. զի եղիցի Աստուած ամենայն յամենայնի:
29. Ապա թէ ոչ, զի՞նչ գործիցեն որ մկրտիցինն վասն մեռելոց, եթէ արդարե՛ւ մեռեալք ո՛չ յառնիցեն: Ընդէ՞ր իսկ բնաւ մկրտի՛ն վասն նոցա.
30. Ընդէ՞ր եւ մեք ճգնիմք յամենայն ժամ, 31 եւ հանապազ մեռանիմք. ի պարծա՛նս ձեր երդնո՛ւմ ե՛ղբարք, զոր ունիմ ի Քրիստոս Յիսուս ի Տէր մեր:
32. Եթէ վասն մարդոյ ի գազանամարտի՛ լիեալ էի յԵփեսոս, զի՞նչ աւգուտ էր ինձ, եթէ մեռեալք ո՛չ յառնեն: Կերիցո՛ւք արբցո՛ւք, քանզի վաղիւ մեռանի՞մք:
33. Մի՛ խաբիք. Ապականեն զբարս քաղցունս բանք չարք:
34. Սթափեցարո՛ւք արդարութեամբ, եւ մի՛ մեղանչէք. զի զգիտութիւն Աստուծոյ ո՛չ ունին ոմանք: Առ ամաւթո՛յ ձերոյ ասեմ:
35. Այլ ասիցէ՞ ոք, զիա՞րդ յառնեն մեռեալք, կամ որո՞վ մարմնով գայցեն:
36. Անմիտ, դու զոր սերմանեսն, ո՛չ կենդանանայ՝ եթէ ոչ մեռանիցի՛:
37. Եւ զոր սերմանեսն, ո՛չ զնոյն մարմին որ ծնանելո՛ցն իցէ՝ սերմանես, այլ հա՛տ մերկ. եթէ ցորենո՛յ իցէ, եւ եթէ այլոց սերմանաց:
38. Եւ Աստուած տա՛յ նմա մարմին՝ որպէս եւ կամի. եւ իւրաքանչիւր սերմանացն զի՛ւր մարմին:
39. Ո՛չ ամենայն մարմին՝ նոյն մարմին այլ՝ այլ մարմին է մարդկան, եւ ա՛յլ մարմին անասնոց, այլ մարմին թռչնոց՝ եւ ա՛յլ մարմին ձկանց:
40. Եւ մարմինք երկնաւորք, եւ մարմինք երկրաւո՛րք. այլ՝ ա՛յլ փառք երկնաւորաց են, եւ ա՛յլ փառք երկրաւորաց:
41. Այլ փառք արեգական, եւ ա՛յլ փառք լուսնի, այլ փառք աստեղաց, եւ աստղ քան զաստղ առաւե՛լ է փառաւք:
42. Նոյնպէս եւ յարութիւն մեռելոց սերմանի ապականութեամբ՝ եւ յառնէ առանց ապականութեա՛ն.
43. սերմանի անարգութեամբ՝ եւ յառնէ փառա՛ւք. սերմանի տկարութեամբ՝ եւ յառնէ զաւրութեա՛մբ.
44. սերմանի մարմին շնչաւոր՝ եւ յառնէ մարմին հոգեւո՛ր: Եթէ գոյ մարմին շնչաւոր, գո՛յ եւ հոգեւոր:
45. Ա՛յսպէս եւ գրեա՛լ Եղեւ մարդն առաջին Ադամ շո՛ւնչ կենդանի. երկրորդ Ադամ ի հոգի կենդանարար:
46. Բայց ո՛չ նախ հոգեւորն, այլ շնչաւորն, եւ ապա՛ հոգեւորն:
47. Առաջին մարդն յերկրէ, հողեղէ՛ն. իսկ երկրորդ մարդն՝ Տէր յերկնի՛ց:
48. Որպէս հողեղէնն, նո՛յնպէս եւ հողեղէնքս, եւ որպէս երկնաւորն, նո՛յնպէս եւ երկնաւորքն:
49. Եւ որպէս զգեցաք զպատկեր հողեղինին. զգեցցո՛ւք եւ զպատկեր երկնաւորին:
50. Բայց զայս ասեմ ե՛ղբարք, եթէ մարմին եւ արիւն զարքայութիւնն Աստուծոյ ժառանգել ո՛չ կարեն. եւ ո՛չ ապականութիւն զանապականութիւն ժառանգէ:
51. Արդ՝ խորհուրդ մի՛ ասեմ ամենեքեան ննջեսցո՛ւք, այլ ո՛չ եթէ ամենեքեան: Նորոգեսցո՛ւք
52. յանկարծակի յական թաւթափել ի փող յետին. քանզի փող հարկանի, եւ մեռեալք յարիցեն առա՛նց ապականութեան, եւ մեք նորոգեսցո՛ւք:
53. Զի պա՛րտ է ապականութեանս այսմիկ զգենուլ զանապականութի՛ւն, եւ մահկանացուիս այսմիկ զգենուլ զանմահութիւն:
54. Այլ յորժամ մահկանացուս այս զգեցցի զանմահութիւն, եւ ապականութիւնս զանապականութիւն, յայնժամ եղիցի՛ բանն որ գրեցաւ. Եթէ ընկլա՛ւ մահ յաղթութիւն քո:
55. Ո՞ւր է մահ յաղթութիւն քո. ո՞ւր է դժոխք խայթոցքն քո:
56. Խայթոց մահու՝ մե՛ղք են, եւ զաւրութիւն մեղաց՝ աւրէնք:
57. Այլ շնորհք Աստուծոյ՝ որ ետ մեզ յաղթութիւն ի ձեռն Տեառն մերոյ Յիսուսի Քրիստոսի:
58. Այսուհետեւ եղբա՛րք իմ սիրելիք, հաստատո՛ւն եղերուք, անշա՛րժ կացէք, առաւե՛լ լերուք ի գործ Տեառն յամենայն ժամ. գիտասջի՛ք՝ զի վաստակքն ձեր ո՛չ են ընդունայն առաջի Տեառն:
Հաղորդում կայքում սխալի վերաբերյալ
Տվյալ հատվածում առկա է սխալ: