Գլուխ 3 (1)

   
1․ Արտաշէս կալաւ ի Հնդկաց աշխարհէն մինչչեւ յԵթովպիա հարիւր քսան եւ եւթն գաւառ.

2․ ի նմին աւուրս յորս նստաւ ի Սիսիս քաղաքի:

3․ Յամին երրորդի թագաւորութեանն իւրում. արար թագաւորն կոչունս սիրելեաց իւրոց եւ մեծամեծաց, եւ այլոց եւս ազգաց` պարսից եւ մարաց` եւ ամենայն իշխանաց նախարարացն:

4․ Եւ իբրեւ եցոյց նոցա զմեծութիւն թագաւորութեանն իւրոյ. եւ զփառաւորս ուրախութեան վայելչութեանն զաւուրս հարիւր եւ ութսուն:

5․ Եւ յորժամ յանգ ելանէին աւուրք հարսանեացն. դարձեալ միւսանգամ հրաման ետ կոչել ի հարսանիսն զռամիկ քաղաքակիցս իւր ի գաւիթ տանն արքունի զաւուրս վեց.

6․ եւ էր զարդարեալ բեհեզովք եւ կերպասովք` զորս էր կարգեալ եւ կազմեալս զլարեաւքն  ծիրանեաւք եւ բեհեզովք. եւ զորս էր կարգեալ ի խոյակսն ոսկիս, եւ ի ծիրանիս ուր կային ի վերայ     սեանցն պատուականաց. եւ ի խարսխացն ոսկեղինաց որ կային գահոյք բազումք ոսկեղէնք եւ արծաթեղէնք ընդելուզեալք մարգարտովք եւ ակամբք պատուականաւք` լցեալս պաստառւաւք. եւ գոյնագոյն նկարաւք, եւ պատուական հանդերձիւք ի վերայ վարդայատակ գաւթին:

7․ ուր կային թակոյկք եւ ըմպելիք թագաւորին ոսկեղէնք եւ արծաթեղէնք, որք էին յերից բիւրուց քանքարաց.

8․ եւ գինի յոյժ արքայի ըմպելի: Այլ կոչունքս` ոչ որպէս աւրէն էր եղեւ, վասն զի այսպէս կամեցաւ թագաւորն առնել պաշտաւնեայ ծառայիցն:

9․ Եւ Ասթինէ կին թագաւորին արար կոչունս կանանց յապարանս թագաւորին Արտաշէսի:

10․ Եւ յաւուրն եւթներորդի յանձն իւր զուարճացեալ լինէր թագաւորն. եւ ասէ ցԱման, եւ ցԲազան, եւ ցԹառա, եւ ցԲուրազէ, եւ ցԹառաբբա, ցԵւթանէորն ներքինեաց ցպաշտաւնեայս իւր.

11․ Կոչել զկինն յարքունիս թագաւորեցուցանել զնա, եւ ցուցանել ամենայն իշխանաց եւ ազգաց զգեղեցկութիւն նորա. զի էր գեղեցիկ յոյժ:

12․ եւ ոչ լուաւ նմա Ասթանէ գալ առ նա ընդ ներքինիսն: Եւ տրտմեցաւ թագաւորն` եւ բարկացաւ յոյժ:

13․ եւ ասէ ցսիրելիսն իւր զիրսն զոր արար Ասթինէն. Արդ` արարէք ասէ թագաւորն այսուհետեւ աւրէնս եւ իրաւունս:

14․ Եւ մատեան առաջի նորա Արքինսէոս եւ Առնաթեւ եւ Մաղիսեար, իշխանք Պարսից եւ Մարաց որ էին մերձաւորք եւ աթոռակիցք արքային.

15․ եւ պատմեցին եթէ ո՞րպէս աւրէն է առնել Ասթանեայ կնոջ թագաւորին, զի ոչ արար զհրամանս արքային, զոր հրամայեաց նմա ի ձեռն ներքինեացն:

16․ Եւ ասէ Ոմիքեւս ցարքայ եւ ցիշխանսն. Ոչ եթէ արքայի միայն ընդդէմ դարձաւ Ասթինէ տիկնանց տիկին, այլ ամենայն իշխանաց եւ կուսակալաց արքայի:

17․ Սոյնպէս եւ ամենայն կանայք լինին անհնազանդ իշխանաց Պարսից եւ Մարաց.

18․ յորժամ լսեն զարհամարհանս կնոջ թագաւորիս, համարձակին իշխել անարգել զարս իւրեանց:

19․ Արդ` եթէ կամք իցեն եւ հաճոյ թուեսցի արքայի, մի մտցէ նա առ արքայ. եւ զտիկնութիւն նորա տացէ կնոջ որ լաւ եւս իցէ քան զնա:

20․ Եւ լուիցեն զաւրէնսս զոր հրամայես ի թագաւորութեանդ քում. եւ պատուեսցեն կանայք զարս իւրեանց պատուով մեծաւ` յաղքատաց մինչչեւ ի մեծամեծս:

21․ Եւ հաճոյ թուեցաւ բանն արքայի, եւ ամենայն իշխանաց նորա. եւ արար թագաւորն որպէս խաւսեցաւ Մուրդքեւս:

22․ Եւ առաքեաց ընդ ամենայն թագաւորութիւնն իւր ի գաւառսն ամենայն, ըստ հրամանին որ եդաւ ի վերայ ամենայն կանանց: