Գլուխ 7

   
1․ Եւ եկին նոքա յԵկբատանս, եւ մտին նոքա ի տուն Հռագուելայ. եւ ել ընդառաջ նոցա Սառա, եւ ողջոյն ետ նոցա` եւ նոքա նմա, եւ տարաւ զնոսա ի տուն:

2․ Եւ Հռագուէլ ասէ ցՀեդնա ցկին իւր. Տեսանե՞ս զի նման է պատանեակս Տուբիթայ եղբաւրորդւոյն իմոյ:

3․ եհարց ցնոսա Հռագուէլ եւ ասէ. Ուստի՞ էք եղբարք: եւ ասեն ցնա. Յորդւոցն Նեփթաղիմայ եմք որք գերեալն են ի Նինուէ:

4․ Եւ ասէ ցնոսա. Ճանաչէ՞ք դուք զՏուբիթ զեղբայրն մեր: եւ ասեն. Ճանաչեմք: եւ ասէ ցնոսա. Ողջ է:

5․ եւ նոքա ասեն. Ողջ է, եւ կենդանի է: եւ ասէ Տուբիա. Հայր իմ է:

6․ Եւ յարուցեալ վաղվաղակի Հռագուէլ համբուրեաց զնա, եւ ելաց յոյժ.

7․ եւ աւրհնեացզնա` եւ ասէ ցնա. Բարւոյ եւ բարերարի առն որդի: եւ իբրեւ լուաւ թէ Տուբիթայ կացին աչքն, ելաց.

8․ եւ տրտմեցաւ ինքն` եւ Հեդնա կինն իւր, եւ Սառա դուստր նոցա: Եւ ընկալան` եւ հանգուցին զնսա մեծաւ ուրախութեամբ:

9․ եւ զենին նոցա խոյ մի ի խաշանց, եւ յաւրինեցին եդին առաջի նոցա խորտիկս բազումս: Եւ ասէ Տուբիա ցՀռափայէլ. Եղբայր Ազարիա` արդ խաւսեաց դու վասն որոյ խաւսէիրն դու ի ճանապարհի անդ, զի եղիցի այնպէս: եւ դարձոյց զբանսն անդրէն առ Հռագուէլ: Եւ ասէ Հռագուէլ ցՏուբիա. Կեր արբ եւ ուրախ լեր զի քեզ անկ է առնուլ զմանուկն իմ. բայց ասեմ քեզ զճշմարիտն. ետու ես զմանուկդ իմ եւթն առն, եւ յորժամ կամէին մտանել առ դա` մեռանէին ի նմին գիշերի: այլ դու այժմ որդեակ իմ ուրախ լեր:

10․ Եւ ասէ Տուբիա. Ոչինչ ճաշակեմ ես աստ` մինչչեւ հաստատէք առ իս զիրսդ:

13․ Եւ ասէ Հռագուէլ. Եւ առ զնա քեզ ըստ աւրինաց. զի դու եղբայր ես աղջկանն, եւ քեզ լիցի.

14․ այլ ողորմածն Աստուած աջողեսցէ ձեզ ի բարիս:

15․ Եւ կոչեաց նա զՍառա զդուստրն իւր, եւ կալաւ նա զձեռանէ նորա, եւ ետ զնա Տուբիայ կնութեան: եւ ասէ. Ահաւասիկ ըստ աւրինացն Մովսիսի առ դու զնա. եւ տար դու զնա առ հայր քո: եւ աւրհնեաց զնոսա:

16․ Եւ կոչեաց նա զՀեդնա զկինն իւր, եւ առեալ նա տայր աղջկանն զամենայն ինչս զտանն. եւ հաստատէր մուրհակաւք եւ կնքէր:

17․ եւ ապա սկսան ուտել եւ ըմպել` եւ ուրախ լինել:

18․ Եւ կոչեաց Հռագուէլ զՀեդնա զկին իւր` եւ ասէ ցնա. Քոյր պատրաստեա դու զմեւս սենեակն` եւ տար անդր զաղջիկն:

19․ Եւ արար որպէս եւ հրամայեաց նմա, եւ տարաւ զնա անդր, եւ ելաց. եւ ջնջէր մաքրէր մայրն զարտասուս աղջկանն.

20․ եւ ասէր ցնա. Քաջալերեաց դուստր` Տէր երկնից եւ երկրի տացէ քեզ ուրախութիւն եւ ցնծութիւն, փոխանակ տրտմութեանս այսորիկ. քաջալերեաց դուստր` քաջալերեաց: