Գլուխ 1

   

1․ Գիրք ծննդեան Յիսուսի Քրիստոսի որդւոյ Դաւթի որդւոյ Աբրահամու:

2․ Աբրահամ ծնաւ զԻսահա՛կ: Իսահակ ծնաւ զՅակո՛վբ: Յակովբ ծնաւ զՅուդա՛, եւ զեղբարս նորա:

3․ Յուդա ծնաւ զՓարէ՛ս եւ զԶարա՛ ի Թամարայ: Փարէս ծնաւ զԵզրո՛վն: Եզրովն ծնաւ զԱրա՛մ:

4․ Արամ ծնաւ զԱմինադա՛բ: Ամինադաբ ծնաւ զՆաասո՛վն: Նաասովն ծնաւ զՍաղմո՛վն:

5․ Սաղմովն ծնաւ զԲոո՛ս ի Հռեքաբայ: Բոոս ծնաւ զՈվբէ՛դ ի Հռութայ: Ովբէդ ծնաւ զՅեսսէ՛: Յեսսէ ծնաւ զԴաւ՛թ արքայ:

6․ Դաւիթ ծնաւ զՍողովմո՛ն ի կնոջէն Ուրիայ:

7․ Սողովմոն ծնաւ զՌոբովա՛մ: Ռոբովամ ծնաւ զԱբիա՛: Աբիա ծնաւ զԱսափ:

8․ Ասափ ծնաւ զՅովսափաթ: Յովսափաթ ծնաւ զՅովրամ: Յովրամ ծնաւ զՈզիա:

9․ Ոզիա ծնաւ զՅովաթամ: Յովաթամ ծնաւ զԱքազ: Աքազ ծնաւ զԵզեկիա:

10․ Եզեկիա ծնաւ զՄանասէ: Մանասէ ծնաւ զԱմովս: Ամովս ծնաւ զՅովսիա:

11․ Յովսիա ծնաւ զՅեքոնիա եւ զեղբարս նորա առ գերութեամբն բաբելա՛ցւոց:

12․ Յետ գերութեանն բաբելացւոց ծնաւ Յեքոնիա զՍաղաթիէլ: Սաղաթիէլ ծնաւ զԶորաբաբէլ:

13․ Զորաբաբէլ ծնաւ զԱբիուդ: Աբիուդ ծնաւ զԵղիակիմ: Եղիակիմ ծնաւ զԱզովր:

14․ Ազովր ծնաւ զՍադովկ: Սադովկ ծնաւ զԱքին: Աքին ծնաւ զԵղիուդ:

15․ Եղիուդ ծնաւ զԵղէազար: Եղէազար ծնաւ զՄատթան: Մատթան ծնաւ զՅակովբ:

16․ Յակովբ ծնաւ զՅովսէփ՝ զայրն Մարեմայ, որում խաւսեցեալ զՄարիամ կոյս, յորմէ ծնաւն Յիսուս որ անուանեցաւ Քրիստոս:

17․ Արդ՝ ամենայն ազգքն յԱբրահամէ մինչեւ ի Դաւիթ՝ ազգք չորեքտասանք: Եւ ի Դաւթէ մինչեւ ի գերութիւնն բաբելացւոց՝ ազգք չորեքտասանք: Եւ ի գերութենէն բաբելացւոց մինչեւ ի Քրիստոս՝ ազգք չորեքտասանք:

18․ Եւ Յիսուսի Քրիստոսի ծնունդն էր այսպէս: Խաւսեալ զմայր նորա Մարիամ Յովսեփու, մինչեւ եկեալ առ միմեանս՝ գտաւ յղացեալ ի Հոգւոյն Սրբոյ:

19․ Եւ Յովսէփ այրն նորա, քանզի արդար էր՝ եւ ո՛չ կամէր առակել զնա, խորհեցաւ լռելեա՛յն արձակել զնա:

20․ Եւ մինչդեռ նա զայս ածէր զմտաւ ահա հրեշտակ Տեառն ի տեսլեան երեւեցաւ նմա՝ եւ ասէ. Յովսէփ որդի Դաւթի, մի երկնչիր առնուլ առ քեզ զՄարիամ կին քո, քանզի որ ի նմայն ծնեալ է՝ ի Հոգւոյն Սրբոյ է:

21․ Ծնցի որդի, եւ կոչեսցես զանո՛ւն նորա Յիսուս, զի նա՛ փրկեսցէ զժողովուրդ իւր ի մեղաց իւրեանց:

22․ Այլ այս ամենայն եղեւ, զի լցցի որ ասացա՛ւն ի Տեառնէ ի ձեռն Եսայայ մարգարէի.

23․ Ահա կոյսն յղասցի՝ եւ ծնցի որդի, եւ կոչեսցեն զանուն նորա Է՛մանուէլ, որ թարգմանի՝ ընդ մե՛զ Աստուած:

24․ Եւ զարթուցեալ Յովսէփ ի քնոյ անտի, արար որպէս հրամայեա՛ց նմա հրեշտակն Տեառն, եւ ա՛ռ յինքն զկինն իւր:

25․ Եւ ո՛չ գիտէր զնա, մինչեւ ծնաւ զորդին իւր զանդրանիկ, եւ կոչեաց զանուն նորա Յիսուս: