Գլուխ 5

   
1. Բնաւ՝ եւ անուանի՞ իսկ ի ձեզ ընդէ՞ր պոռնկութիւն, եւ այնպիսի պոռնկութիւն՝ որ ո՛չ եւ ի հեթանոսս, որպէս թէ զկի՛ն հաւր իւրոյ ունել:

2. Եւ դուք հպարտացեա՛լ էք. եւ ո՛չ առաւել զգացարուք, զի բարձցի՛ ի միջո՛յ ձերմէ՝ որ զգործն զայն գործեաց:

3. Զի ես թէպէտ եւ մարմնով մեկուսի՛ եմ, սակայն հոգւով մե՛րձ եմ. բայց արդէն իսկ իբրեւ ի մաւտո՛յ ընտրեցի. զայն որ այնպէ՛սն գործեաց.

4. յանուն Տեառն մերոյ Յիսուսի Քրիստոսի, ժողովել ձեզ ի միասին, եւ իմոյ հոգւոյս՝ զաւրութեամբն հանդերձ Տեառն մերոյ Յիսուսի Քրիստոսի,

5. մատնել զայնպիսին սատանայի ի սատակո՛ւմն մարմնոյ. զի ոգին ապրեսցի՛ յաւրն Տեառն մերոյ Յիսուսի Քրիստոսի:

6. Ո՛չ բարւոք են պարծանքդ ձեր. ո՞չ գիտէք եթէ փո՛քր մի խմոր զամենայն զանգուածն խմորէ:

7. Սրբեցէ՛ք ի բա՛ց զհին խմորն, զի եղիջիք նո՛ր զանգուած, որպէս է՛քդ անխմորք. քանզի զատի՛կ մեր զենաւ Քրիստոս:

8. Այսուհետեւ արասցո՛ւք տաւնս. մի՛ ի խմորն հին, եւ մի՛ ի խմորն չարութեան եւ անզգամութեան. այլ յանխմոր ստուգութեա՛ն եւ ճշմարտութեան:

9. Գրեցի ձեզ ի թղթի այդր չխառնակե՛լ ընդ պոռնիկս:

10. Եւ ո՛չ եթէ ընդ պոռնիկս աշխարհիս այսորիկ, կամ ընդ ագա՛հս, կամ ընդ յափշտակաւղս, կամ ընդ կռապարիշտս. ապա թէ ոչ՝ պարտ էիք եւ յաշխարհէ՛ իսկ ելանել:

11. Բայց արդ՝ գրեցի ձեզ չխառնակե՛լ: Եթէ ոք եղբայր անուանեալ կամ պոռնի՛կ իցէ, կամ կռապարիշտ, կամ ագա՛հ, կամ բամբասաւղ, կամ արբեցաւղ, կամ յափշտակաւղ, ընդ այնպիսումն եւ հա՛ց մի՛ ուտել:

12. Զի՞ կա՛յ իմ եւ զարտաքինսն դատելոյ. ոչ ապաքէն դուք զներքինսն դատիցիք.

13. եւ զարտաքինսն Աստուած դատիցի. բարձէ՛ք զչարն ի միջոյ ձերմէ: