1. Ոչ ապաքէն ազա՛տ եմ, ոչ ապաքէն առաքեա՛լ եմ. ոչ ապաքէն զՏէր մեր Յիսուս Քրիստոս աչաւք իմովք տեսի՛, ոչ ապաքէն գործ իմ դո՛ւք էք ի Տէր:
2. Թէպէտ եւ այլոց չիցեմ առաքեալ, այլ դէպ ձեզ ե՛մ. զի կնի՛ք իսկ առաքելութեան իմոյ դո՛ւք էք ի Տէր:
3. Իմ պատասխանի ուր զիս հարցանիցեն՝ ա՛յս է:
4. Միթէ ո՞չ ունիցիմք իշխանութիւն ուտել եւ ըմպել:
5. Մի՛թէ ո՞չ ունիցիմք իշխանութիւն զքորս կանայս շրջեցուցանել ընդ մեզ. որպէս եւ ա՛յլ առաքեալքն, եւ եղբարքն Տեառն, եւ Կեփաս:
6. Եթէ միայն ե՛ս եւ Բառնաբա՛ս ոչ ունիցիմք իշխանութիւն չգործե՛լ ինչ:
7. Ո՞ ոք երբէք զինուորիցի իւրովք թոշակաւք. ո՞ ոք տնկիցէ այգի՝ եւ ի պտղոյ նորա ո՛չ ուտիցէ. ո՞ ոք արածիցէ խաշն՝ եւ ի կաթանէ խաշինն ո՛չ ուտիցէ:
8. Մի՛թէ ըստ մարդկութեա՞ն խաւսիցիմ զայս. կամ թէ եւ աւրէնքն զսոյն ո՞չ ասիցեն:
9. Ի Մովսիսի իսկ աւրէնսն գրեալ Ո՛չ կապեսցես զցռո՛ւկ եզին կալոտւոյ: Միթէ՝ զեզա՞նց ինչ փո՞յթ էր Աստուծոյ:
10. Ոչ ապաքէն վասն մե՛ր ասէ. քանզի վասն մե՛ր գրեցաւ: Զի յուսո՛վ պարտի որ սերմանէն՝ սերմանել. եւ որ կասուն՝ յուսո՛վ վայելել:
11. Եթէ մեք ի ձեզ զհոգեւորսն սերմանեցաք, մե՞ծ ինչ է, եթէ ի ձէնջ զմարմնաւո՛րսդ հնձիցեմք:
12. Եթէ այլք ձերո՛վ իշխանութեամբդ վայելեն, ոչ առաւե՛լ եւս մե՛ք: Այլ ո՛չ ի գործ ինչ արկաք զիշխանութիւնս զայս. բայց ամենայնի համբերեմք, զի մի՛ խափա՛ն ինչ լինիցիմք աւետարանին:
13. Ո՞չ գիտէք՝ եթէ որ ի տաճարին գործեն, ի տաճարէ՛ անտի ուտեն. եւ որ սեղանոյն պաշտաւնեայք են, ի սեղանո՛յ անտի վայելեն:
14. Նոյնպէս եւ Տէր հրամա՛ն ետ. որոց զաւետարանն աւետարանեն, յաւետարանէ՛ անտի կեալ:
15. Բայց ես եւ ո՛չ զմի ինչ յայսցանէ արկի ի գործ, եւ ո՛չ գրեցի զայդ, զի ինձ ա՛յսպէս ինչ լինիցի: Լա՛ւ է ինձ մանաւանդ մեռանել, եւ ո՛չ զի զպարծա՛նս իմ ոք ընդունայն համարիցի:
16. Զի եթէ աւետարանեմ, ո՛չինչ են ինձ պարծանք. քանզի հարկ ի վերայ կայ. բայց վա՛յ է ինձ թէ ոչ աւետարանեմ:
17. Եթէ կամաւ զայն առնեմ, վա՛րձք են ինձ. եւ եթէ ակամայ, տնտեսութի՛ւն յանձն է ինձ:
18. Եւ արդ՝ զի՞նչ վարձք իցեն ինձ, եթէ յաւետարանելն ձրի՛ տաց զաւետարանն, զի մի՛ զեղծցի՛մ ինչ իշխանութեամբս իմով յաւետարանի՛ անդ:
19. Քանզի ազա՛տ էի յամենայնէ, եւ ամենեցուն զանձն ի ծառայութեան կացուցի, զի զբազումս շահեցայց:
20. Եղէ ընդ հրեայսն իբրեւ զհրեայ, զի զհրեա՛յսն շահեցայց:
21. Եղէ ընդ աւրինաւք, իբրեւ զայնոսիկ որ ընդ աւրինա՛ւքն էին. իբրեւ ո՛չ եթէ ընդ աւրինաւքն էի, այլ զի եւ որ ընդ աւրինաւքն իցեն՝ եւ զնոսա՛ շահեցայց: Ընդ անաւրէնս եղէ՛ իբրեւ զանաւրէն. իբր ո՛չ եթէ անաւրէն ինչ էի յԱստուծոյ, այլ ընդ աւրինաւքն Քրիստոսի. զի շահեցա՛յց զանաւրէնսն:
22. Եղէ ընդ տկարս իբրեւ զտկար, զի զտկա՛րսն շահեցայց: Ընդ ամենայնի ամենա՛յն եղէ, զի թերեւս ապրեցուցի՛ց զոմանս:
23. Զայս ամենայն առնեմ վասն աւետարանին, զի կցո՛րդ եղէց նմա:
24. Ո՞չ գիտէք՝ եթէ որ յասպարիսին ընթանան, ընթանալ՝ ամենեքի՛ն ընթանան. բայց մի՛ ոք առնու զյաղթութեանն. այնպէս ընթացարո՛ւք՝ զի հասանիցէք:
25. Ամենայն որ պատերազմի, ամենայնի՛ ժուժկալ լինի. նոքա զի զեղծանելի՛ պսակն առնուցուն, եւ մեք զանեղծութեանն:
26. Արդ՝ ե՛ս իսկ ա՛յնպէս ընթանամ, ո՛չ որպէս յաներեւոյթս ա՛յնպէս մրցիմ, որպէս ո՛չ թէ զհո՛ղմս ինչ կոծելով.
27. այլ ճնշե՛մ զմարմինս իմ, եւ հնազանդեցուցանեմ. զի գուցէ՞ որ այլո՛ցն քարոզեցի՝ ե՛ս ինքն անպիտա՛ն գտանիցիմ:
Հաղորդում կայքում սխալի վերաբերյալ
Տվյալ հատվածում առկա է սխալ: