1. Թագաւոր մեծ Արտաշէս. Ձեզ՝ որ էք ի Հնդկաց կողմանսդ եւ յԵթւովպացւոց հարիւր քսան եւ եւթն գաւառաց, նախարարացդ եւ իշխանացդ, որ ի մերում մտի եւ ի խորհրդեան մերում էք, ողջոյն։
2. Բազումս բազում անգամ ի բարերար քաղցրութեանց աստի, ստէպ ստէպ պատուեալք՝ աւելի իմն եւ մեծամեծ խորհուրդս խորհեցան։
3. Եւ ոչ միայն զմեր հնազանդեալսն խնդրեն չարչարել. այլ եւ ոչ իւրեանց յանդգնութեամբն՝ եւ մեծութեանց կարեն համբերել, եւ յիւրեանց բարերարսն ձեռնարկել մենքենայեն։
4. եւ զգովութիւնս ոչ միայն ի մարդկանէ աստի բառնան առնուլ, այլ եւ ի չմարթնոց գովութիւնս բարձրացեալ յղփացեալ խնդրեն։ ոչ գիտեն որոց ամենայնի տեսուչ յաւէժ Աստուած է։ եւ ատելութիւն իմն չարութեան համարին փախչել ի դատաստանէն։
5. Բազում անգամ զբազումս որք յիշխանութեան կարգեալ են՝ որոց հաւատարմութեամբ զգործ ի ձեռն առեալ է, հանգիստ եւ մխիթարութիւն անձանց համարին առ ի հեղուլ զարիւն անբիծ։
6. Վասն որոյ կրեաց իսկ զարժան պատուհասն չարակամութեամբ ստութեամբ առանց խորհելոյ, ամբաստանութիւն մատուցանել մեզ. վասն այսորիկ որք ի մէնջն պատուեցան։ Այլ արդ՝ զգուշանալ արժան է։
7. ոչ այնչափ միայն, որչափ եւ յառաջնում նուագին ուսուցաք ձեզ առնել. որչափ եւ գրեցան ձեզ առանց սրբութեան, որ եղեւդ այնոցիկ որք արժանաւորութեամբքն զաւրացեալ էին՝ ժանտութեամբք իւրեանց։
8. Արդ հայեցեալ ձեր ի թագաւորութիւնս. առանց խռովութեան ամենայն մարդկան շնորհեցաք կեալ խաղաղութեամբ։ Արդ արարէք զդարձ փոխարինին ի նոյն։ եւ որ առաջին հրամանն էր՝ այն ի բաց մերժեսցի. եւ հեզութեամբ եւ խաղաղութեամբ ընդառաջ ելանել։
10. Եւ մի որպէս Համանն Ամադովթեանց Մակեդովնացի ճշմարտութեանց աւտար լեալ ի զաւակէն պարսից. եւ յոյժ ատեցեալ եւ մերժեալ ի մերմէ քաղցրութենէ աստի։
11. եւ աւտարացեալ զոր ունիմք առ ամենայն ազգս մարդասիրութիւնս. այնչափ եւս՝ զի եւ կոչեցաւ մեր աթոռակից. որում երկիր պագանեն ամենեքեան որք են ընդ մերով իշխանութեամբս. զոր յերկրորդ աթոռս իմում նստուցեալ պատուեցաք։
12. Եւ ոչ հանդարտեաց նաիւրում ամբարտաւանութեանն՝ մենքենայել ջանացաւ՝ յիշխանութենէ աստի զմեզ ի բաց մերժել. եւ յոգւոց աստի մերոց.
13. եւ զմեր փրկիչն եւ զերախտաւոր՝ զՄուրդքէ. եւ չքնաղ եւ զանարատ, զհաւասար թագաւորութեանս իմոյ զԵսթեր տիկնանց տիկին, ամենայն ազգաւն իւրեանց հանդարձ՝ բազում զուր ի նանիր վնաս ի վերայ եդեալ առանց պատճառի, խնդրեաց զսոսա ի կորուստ։
14. զի նա այսու աւրինակաւ խորհեցաւ առնուլ զիշխանութիւնս Պարսից յանապատ աւերակ, եւ ի մակեդոնացիս անդրէն դարձուցանել։
15. Այլ մեք ի բազմահնար սատակչէ յայնմանէ որք մատնեցան ի կորուստ հրէայքս, տեսանեմք զի ոչ ինչ գործք չարութեան ի սոսա գտանին. եւ արդար աւրինաց վարիչք։
16. Եւ են իսկ սոքա որդիք բարձրելոյն մեծի կենդանւոյն Աստուծոյ. որ ուղղէ զմեր եւ զազգիս մերոյ զթագաւորութիւնս յիւրմէ բարեսէր առատութեանն։
17. Եւ արդ բարւոք արարէք զի ոչ ինչ ձեռնամուխ եղէք ըստ հրամանի գրոյ հրովարտակացն Համանայ՝ որ առաքեցաւ առ ձեզ.
18. վասն զի եւ նա ինքն զայս յինքենէ գործեաց, մերձ ի դրունս Սիսացւոց քաղաքիս ամենայն ընտանեաւք իւրովք հանդերձ, ի փայտ ելեալ է. զարժանն վրիժուց հատուցումն անդրէն յանձն իւր ընկալեալ յամենակալէն Աստուծոյ, որ հատոյց նմա վաղվաղակի զդատաստանն։
19. Եւ զպատճէն հրովարտակիս այսորիկ յառաջ հանեալ՝ եդեալ եւ տարածեալ ամենայն զգուշութեամբ, եթէ հրէից վարել զիւրեանց աւրէնսն։
20. Արդ՝ քաջալերեսցին նոքա. զի որպէս ի ժամանակի նեղութեանն ստիպէին զնոսա չարչարել. հատուսցեն զհատուցումն ի թշնամիս իւրեանց, յերկոտասաներորդ եւ յերեքտասաներորդ ամսեանն Ադար՝
21. ի նմին աւուր։ զի զայս իսկ ամենազաւրն Աստուած փոխանակ սատակելոյ ընտրեալ ազգին՝ արար նոցա ուրախութիւն։
22. Եւ դուք այժմ ի կարգս ձեր եւ ի տաւնս տարեկանաց ձերոց, եւ յաւուր նշանաւորի ուրախութիւնս արասջիք.
23. զի որպէս ցայժմ, եւ արդ զկնի այսորիկ փրկութիւն եղիցի մեզ՝ եւ վաստակաւորաց պարսկաց։ Եւ որք ի մեր վերայ զխորհուրդ մահու խորհին՝ նոցա յիշատակ կորստեան։
24. Ամենայն քաղաքք եւ ամենայն գաւառք որ ոչ առնիցեն ըստ բանից մերոց այսորիկ՝ սրով եւ հրով եւ բարկութեամբ մաշեսցին. ոչ միայն ի մարդկանէ անապատ լիցի, այլ եւ գազանք երկրի եւ թռչունք երկնից՝ մինչեւ յաւիտեան ի բաց մերժեալք ընկեսցին։
Հաղորդում կայքում սխալի վերաբերյալ
Տվյալ հատվածում առկա է սխալ: