1. Լուսաւորեաց` լուսաւորեաց Երուսաղէմ, զի հասեալ է լոյս քո, եւ փառք Տեառն ի վերայ քո ծագեսցեն:
2. Զի ահա խաւար ծածկեաց զերկիր, եւ մառախուղ զհեթանոսս. բայց ի քեզ Տէր յայտնեսցի, եւ փառք նորա ի քեզ երեւեսցին:
3. Եւ գնասցեն թագաւորք ի լոյս քո, եւ հեթանոսք ի ծագել լուսոյ քոյ:
4. համբարձ շուրջ զքեւ զաչս քո, եւ տես ժողովեալ առ քեզ զամենայն մանկունս քո. զի եկին հասին ի հեռաստանէ որդիք քո, եւ դստերք քո ի վերայ ուսոց նոցա բարձեալ բերիցին:
5. Յայնժամ տեսցես` եւ խնդասցես. երկիցես եւ զարհուրեսցիս ի սրտի քում. զի փոխեսցի ի քեզ մեծութիւն ծովու, եւ ազգաց` եւ ժողովրդոց:
6. Եկեսցեն ի քեզ երամակք ուղտուց, եւ ծածկեսցեն զքեզ ուղտերամակքն Մադիամու եւ Գեփայ: Ամենեքեան ի Սաբայ եկեսցեն, բերել ոսկի եւ կնդրուկ` եւ ականս պատուականս. եւ զփրկութեան Տեառն առցեն զաւետիս:
7. Եւ ամենայն խաշինքն Կեդարու ժողովեսցին առ քեզ, եւ խոյքն Նաբէովթայ ածցին եւ մատուսցին ընդունել ի պատարագ ի վերայ սեղանոյ իմոյ. եւ տուն աղաւթից իմոց փառաւորեսցի:
8. Ո՞վ են սոքա որ իբրեւ զամպս թռուցեալ են, եւ իբրեւ զաղաւնիս ձագախառն երամովին գան առ իս:
9. Ինձ ակն ունին կղզիք եւ նաւք Թարսսի, յառաջագոյն ածել զորդիս քո ի հեռաստանէ. զարծաթն եւ զոսկի ընդ իւրեանս` վասն անուան Տեառն սրբոյն, եւ վասն սրբոյն Իսրայէլի փառաւորելոյ:
10. Եւ շինեսցեն որդիք այլազգեաց զպարիսպ քո, եւ թագաւորք նոցա ընծայեսցին քեզ: զի վասն բարկութեան իմոյ հարի զքեզ, եւ վասն ողորմութեան իմոյ սիրեցի զքեզ:
11. Եւ բացցին դրունք քո հանապազորդք ի տուէ եւ ի գիշերի. եւ մի փակեսցին, կրել ի քեզ զզաւրութիւն ազգաց. եւ զթագաւորս իւրեանց ածիցեն առ քեզ:
12. զի ազգք եւ թագաւորք որ քեզ ոչ ծառայիցեն` կորիցեն, եւ ազգքն աւերելով աւերեսցին:
13. Եւ փառքն Լիբանանու առ քեզ եկեսցեն. սարդիւն, եւ սաւսիւ, եւ նոճով եւ մայրիւ` առհասարակ փառաւոր առնել զտեղի սրբութեան իմոյ եւ զտեղի ոտից իմոց փառաւորեցից:
14. Եւ եկեսցեն առ քեզ զարհուրեալք որդիք նեղչացն քոց` զայրացուցչաց, երկիր պագցեն հետոյ ոտից քոց, ամենեքին որ զարհուրեցուցանէինն զքեզ. եւ կոչեսջիր քաղաք Տեառն սրբոյն Իսրայէլի:
15. Վասն զի եղեր դու լքեալ եւ ատեցեալ, եւ ոչ ոք էր որ աւգնէր քեզ: Եւ արարից զքեզ յուրախութիւն յաւիտենական. ցնծութիւն ազգաց յազգս:
16. Եւ դիեսցես զկաթն հեթանոսաց, եւ զմեծութիւն թագաւորաց կերիցես: Եւ ծանիցես թէ ես եմ Տէր, որ ապրեցուցանեմ եւ փրկեմ զքեզ Աստուած Իսրայէլի:
17. Եւ փոխանակ պղնձոյն` բերից քեզ ոսկի, եւ փոխանակ երկաթոյն` բերից քեզ արծաթ, եւ փոխանակ փայտի` բերից քեզ պղինձ, եւ փոխանակ քարի` տաց քեզ երկաթ: եւ տաց զիշխանս քո ի խաղաղութիւն` եւ զայցելուս քո յարդարութիւն:
18. Եւ ոչ եւս լիցի անիրաւութիւն յերկրի քում, եւ ոչ բեկումն եւ թշուառութիւն ի սահմանս քո. այլ կոչեսցին ի փրկութիւն պարիսպք քո, եւ դրունք քո ցնծութիւն:
19. Եւ ոչ եւս եղիցի քեզ արեգակն ի լոյս տունջեան, եւ ոչ ծագումն լուսնի տացէ քեզ լոյս ի գիշերի. այլ եղիցի քեզ Տէր լոյս յաւիտենական, եւ փառք քո Աստուած:
20. Ոչ մտցէ քեզ արեգակն, եւ լուսին ի քէն ոչ պակասեսցէ. զի եղիցի քեզ Տէր լոյս յաւիտենական: Եւ կատարեսցին աւուրք սգոյ քոյ:
21. եւ ժողովուրդ քո ամենեւին արդար, եւ յաւիտեանս ժառանգեսցեն զերկիր: Եւ պահել զնորատունկ գործոց ձեռաց իւրեանց ի փառս:
22. Սակաւաւորն հազարաւոր եղիցի, եւ կրտսերն յազգ մեծ: Զի ես Տէր ընդ ժամանակս ժամանակս ժողովեցից զնոսա:
Հաղորդում կայքում սխալի վերաբերյալ
Տվյալ հատվածում առկա է սխալ: