1․ Յետ սակաւ ժամանակաց հազարապետն արքայի Լիւսիաս իբրեւ լուաւ, մեծաւ բարկութեամբ` լի նախանձու ծանրացեալ տրտմէր ի վերայ գործոցն եղելոց:
2․ Զաւրաժողով լինէր, կուտէր ութսուն հազար. եւ զամենայն զաւրսն հեծելազաւր` ութ բիւրուն հանդերձ ընդ իւր առնոյր. ընդ իւր առեալ խաղայր ի վերայ եբրայեցւոցն, ի մտի եդեալ զքաղաքն գլխաւոր բնակութիւն առնել հեթանոսաց:
3․ Եւ զտաճարն սրբութեան դրամաժողով ի վարձու կացուցանել իբրեւ զայլ մեհեանս. եւ զքահանայապետութիւնն ինքնին վարձկան գանձուն կացուցանել ամ յամէ:
4․ Զմտաւ ինչ ոչ ածէր զզաւրութիւնն Աստուծոյ` հպարտացեալ մտաւք ի բեւրս բիւրուց զհետեւակն եւ զհեծելազաւրն, եւ զփիղսն աղխաղխեալ տանէր:
5․ Այլ իբրեւ ի Հրէաստան մխեցաւ, եւ մերձ եղեւ յամուրսն Բեթսովրայ որ մերձ է յԵրուսաղէմ իբրեւ ասպարիսաւք հինգ, պատէր բիւրուքն, եւ ի նեղ մեծ զամուրն հասուցանէր:
6․ Իբրեւ ազդ եղեւ մակաբէացւոցն պաշարումն ամրոյն իւրեանց, ողբովք եւ արտասուաւք անկեալ ժողովրդովքն հանդերձ աղաչէին զԱստուած, հրեշտակ բարութեան առաքել ի փրկութիւն իսրայէլացւոց:
7․ Եւ ինքն Մակաբէ նախ յառաջագոյն ի զէն ընթանայր. եւ զաւրացն հրաման տայր վառել կազմել պատրաստել` աշխատութիւն յանձն առնուլ, լինել աւգնական եղբարցն որ ի նեղութեանն էին:
8․ Յայնմ ժամանակի` միաբան միահաւան վառեալ պատրաստեալ յառաջ մատչէին: Այն ինչ լինէր նոցա մերձ ի կողմն քաղաքին Երուսաղէմացւոց հասանել. եկն էջ առաջի նոցա այր մի սպիտակաձի յոսկիազէն վառեալ, ճաւճէր զնիզակն եւ պատրաստէր յարձակել:
9․ Եւ առհասարակ ամենեքին խրախոյս բարձեալ աւրհնէին զողորմածն Աստուած: Եւ այնպէս քաջալերեալք եւ զաւրացեալք էին, ի մտի եդեալ յարձակեալ երթային. իբրեւ ոչ եթէ մարդկան ի դիմի հարկանելոց երթային, այլ թէ եւ գազանք ինչ` անհնարին պատահեսցեն, եւ կամ պարիսպք երկաթիք, հարկանել սատակել կործանել թափ անցանել:
10․ Համարձակ յարձակէին. նիզակակից զերկնաւորն ողորմութեամբ իւրով յանձինս ընկալեալ:
11․ Եւ այնպէս վարազախառն առիւծաբար յար արձակեցան ի վերայ գնդին թշնամեաց. եւ անդէն ի նմին տեղւոջ հարին տապաստ արկին մետասան հազար զընտիր զաւր, եւ հազար հեծեալ ի վերայ հազարացն:
12․ Եւ զամենայն զաւրսն ի փախուստ դարձուցանէին. եւ բազումք ի նոցանէ խոց վիրաւորք` եւ ապիկար մերկանդամք փախստեայք ապրեցան: Եւ ինքն Լիւսիաս կորակոր փախուցեալ մազապուր լինէր:
13․ Իբր ոչ եթէ անմիտ ինչ լինէր յանձն իւր վասն իւրոյ վատթարութեանն: Ի մտի եդեալ խաւսէր անհնարինս առ յաղթութիւն ասէր զեբրայեցիսն, հզաւրին Աստուծոյ աւգնական լինել նոցա. եւ առաքեաց զնոսա: Եւ յղեաց զկնի նոցա հաշտութիւն առնել ի վերայ ամենայն իրաւանցն:
14․ Եւ թագաւորն եւս յանձն առ. եւ զթագաւորին միտս հաճեաց, բարեկամ լինել ընդ նմա:
15․ Յանձն առ Յուդա զոր միանգամ Լիւսին աղաչեաց զնա, վասն աւգտի ուխտի խորհրդոցն հասարակաց. եւ որչափ միանգամ Մակաբէ նամակեաց Լիւսիաս վասն հրէիցն, թողացոյց նոցա արքայն:
16․ Եւ էին առ հրէայս թուղթք գրեալ աւրինակաւս այսուիկ. Լիւսիաս առ գունդն հրէից ողջոյն:
17․ Յոհաննէս եւ Աբեսաղոմ որ առ մեզ ի ձէնջ առաքեցան, մատուցին մեզ իբրեւ ի ձէնջ գիրն էր, եւ աղաչէին որ ինչ ի նմա գրեալ էր: Եւ որչափ ինչ թողուլ արժան էր` թողի.
18․ եւ որչափ ինչ ցուցանել էր թագաւորին` ցուցի. զի թոյլ լիցի ձեզ վասն ձերոց իրաց.
19․ ինչ որ գրեալ էր մեզ ընդ ձեզ խնամ անկցի: Եւ յայսմ հետէ առաւել եւս ջանացայց լինել ձեզ պատճառք բարեաց:
20․ Եւ որ յապա ինչ իցէ, պատուէր տուաք խաւսել ընդ ձեզ:
21․ Եւ դուք ողջ լիջիք: Յամին հարիւրորդի քառասներորդի ութերորդի, յորմզդական տաւնին, որ աւր քսանեւչորք էին:
22․ Իսկ հրովարտակք արքունի գրեալ էր այսպէս: Արքայ Անտիոքոս` առ եղբայր Լիւսիաս` ողջոյն:
23․ Հայրն մեր իբրեւ ի դիցն պաշտաւն փոխեցաւ, կամեցաք զի որ ընդ մերով թագաւորութեամբ իցեն` առանց խռովութեան լիցին:
24․ Զո՞ այլ զոք առաւել քան զհրէայսդ. զի նախ նոքա ոչ հաճեցան զհաւրն ի հեթանոսութիւն դառնալոյ. վասն այսորիկ աղաչեցին թողութիւն առնել զաւրէնսն իւրեանց:
25․ Յանձն առաք եւ զայս ազգ առանց խռովութեան լինել. հրաման տուաք` զտաճարն անդրէն նոցին դարձուցանել, եւ զնոսա գրգել ըստ աւրէնս նախնեաց իւրեանց:
26․ Արդ լաւ եւ բարւոք արասցես. առաքեսցես դու առ նոսա, ուխտ արասցես, եւ դաշինս կռեսցես. զի գիտասցեն նոքա զմեր առ իւրեանս զխնամ կամաց, եւ խրախամիտ լիցին. մտադիւրագոյն շրջիցին, աւգնականութիւն գտեալ զիւրեանցն աւրինաց:
27․ Հրովարտակն արքունի աւրինակաւս այսուիկ գրեալ էր. Արքայ Անտիոքոս` առ ծերակոյտն հրէից, եւ առ զաւրս եւ առ գունդս հրէից ընտանի ողջոյն:
28․ Ողջ լիջիք. եւ եղիցի ամենայն որպէս եւ մեք կամիմք. եւ մեք իսկ ողջ եմք:
29․ Եցոյց այսպէս մեզ Լիւսիաս, եթէ կամիցիք դուք իջանել առ հրէայսդ որ են յԵրուսաղէմ:
30․ Այն որ այժմիկ գնաւ ունիցին` մինչչեւ յերեսունն Ահեկանի ամսեան ձեռն տուեալ լիցի. դաշինս հաստատեալ
31․ թողութեան դիւրութեան քաղցրութեան` ընդ հրէայսն, կալ դոցա յիւրեանց աւրէնս եւ ի կրաւնս որպէս յառաջն, եւ մի ումեք նեղել զնոսա միով իւիք աւրինակաւ:
32․ Այլ մեք արձակեցաք զԼիւսիաս, եւ զՄենեղաւոս` մխիթարել զձեզ. եւ դուք ողջ լիջիք:
33․ Յամին հարիւրորդի քառասներորդի ութերորդի, յամսեանն Ահեկանի, որ աւր հնգետասան էր:
34․ Առաքեցին եւ հռոմայեցիքն աւրինակաւս այսուիկ. Կոյինդոս Մեմիոս, Տիտոս Մանիոս` գլխաւորք հռոմայեցւոց, առ ժողովուրդդ հեբրայեցւոց ողջոյն:
35․ Վասն որոյ իրաց Լիւսիաս եղբայր թագաւորին թողութիւն արար ձեզ, հաճեալ եմք եւ մեք:
36․ Այլ ինչ որ զինչ արժան է ի մէնջ մատուցանել արքայի ինչ` տուք արագագոյն բերել խորհեցեալ իմաստութեամբ, զի դիցուք աւրէնս մի որպէս արժան իցէ աւգտել վասն ձեր. զի մեք աւադիկ յառաջագոյն երթամք ի քաղաքն Անտիոքացւոց.
37․ Վասն այսորիկ փութացարուք, եւ յղեցէք դուք զոք, զի եւ մեք գիտասցուք յորպիսի խորհուրդս կայք դուք:
38․ Ողջ լիջիք: Յամին հարիւրորդի քառասներորդի ութերորդի, յորմզդական տաւնին եդան դաշինքս այս:
Հաղորդում կայքում սխալի վերաբերյալ
Տվյալ հատվածում առկա է սխալ: