1. Ապականեսցի՛ Շամրին զի ընդդէ՛մ դարձաւ Աստուծոյ իւրոյ. ի սո՛ւր անկցին. և ստնդիա՛ցք նորա զքարի՛ հարցին, և յղիք նորա պայթեսցեն։
2. Դա՛րձ Իսրայէլ առ Տէր Աստուած քո. զի տկարացա՛ր յանօրէնութիւնս քո։
3. Առէ՛ք ընդ ձեզ բանս՝ և դարձարո՛ւք առ Տէր Աստուած ձեր. և ասացէ՛ք ցնա. Կարօ՛ղ ես թողուլ զմեղս մեր զի մի՛ առնուցուք անիրաւութիւն, այլ ընդունիցիք զբարիս. և հատուսցուք զպտուղ շրթանց մերոց. և վայելեսցեն ի բարութեան սիրտք ձեր։
4. Ասորեստանեայն ո՛չ փրկէ զմեզ, և յերիվարս ո՛չ հեծցուք. և մի՛ ևս ասասցուք Աստուա՛ծ մեզ զձեռագործս մեր. զի որ ի քեզդ է՝ ողորմեսցի՛ որբոց։
5. Բժշկեցից զբնակութիւնս նոցա. և սիրեցի՛ց զնոսա համօրէն. զի դարձա՛ւ բարկութիւն իմ ի նոցանէ։
6. Եւ եղիցի իբրև զցօղ Իսրայէլի. և ծաղկեսցէ իբրև զշուշան. և արձակեսցէ զարմատ իւր իբրև զԼիբանոս.
7. արձակեսցին ոստք նորա, և եղիցին իբրև զձիթենի պտղալից. և բուրեսցէ հոտ նորա իբրև զկնդրկի։
8. Դարձցին և նստցի՛ն ընդ յարկաւ նորա, կեցցեն և հաստատեսցին ցորենով. և ծաղկեսցէ իբրև զորթ յիշատակ նորա,
9. և իբրև զգինի Լիբանանու եղիցի Եփրեմայ։ Զի՞ ևս կայ նորա և կռոց, ե՛ս խոնարհեցուցի զնա, և ես զօրացուցից զնա. ե՛ս իբրև զայգի պտղախայծ՝ յինէ՛ն գտաւ պտուղ ի քեզ։
10. Ո՞վ է իմաստուն՝ և իմասցի զայս. հանճարեղ՝ և ծանիցէ զայս. զի ուղի՛ղ են ճանապարհք Տեառն. և արդարք գնասցեն ընդ նոսա. և ամպարիշտք տկարասցին ի նոսա։
Հաղորդում կայքում սխալի վերաբերյալ
Տվյալ հատվածում առկա է սխալ: