Գլուխ 8

   
1. Այլ վասն զոհի՛ց կռոցն, գիտեմք եթէ ամենեքի՛ն գիտութիւն ունիք: Գիտութիւն հպարտացուցանէ, այլ սէր շինէ՛:

2. Եթէ ոք կամիցի գիտել ինչ, չե՛ւ եւս գիտաց՝ որպէս արժա՛ն է գիտել:

3. Բայց որ սիրէ զԱստուած, նա՛ է տեղեկացեալ ի նմանէ:

4. Այլ վասն կերակրոցն զոհելոց՝ գիտեմք եթէ ո՛չինչ իսկ կուռքդ են յաշխարհի. զի չի՛ք ոք Աստուած բա՛ց ի միոյն:

5. Զի թէպէտ եւ իցեն անուանեալ աստուածք՝ եթէ յերկինս, եւ եթէ յերկրի. որպէս եւ են աստուածք բազումք՝ եւ տեարք բազումք.

6. այլ մեզ մի՛ է Աստուած, Հա՛յր՝ յորմէ ամենայն, եւ մե՛ք ի նա. եւ մի՛ Տէր Յիսուս Քրիստոս, որով ամենայն, եւ մե՛ք նովաւ:

7. Այլ ո՛չ յամենեսեան գիտութիւն է: Ոմանք առ խղճի մտաց մինչեւ ցայժմ զկռոցն իբրեւ զզոհեա՛լ ուտեն. եւ խիղճ մտաց նոցա քանզի տկա՛ր է, պղծի՛:

8. Այլ կերակուր զմեզ առաջի Աստուծոյ ո՛չ կացուցանէ. ո՛չ եթէ չուտեմք՝ պակասեմք ինչ, եւ ո՛չ եթէ ուտեմք՝ առաւելումք ինչ:

9. Բայց զգո՛յշ լերուք՝ գուցէ իշխանութիւնդ ձեր այդ՝ գայթագղութի՛ւն լիցի տկարաց:

10. Եթէ ոք տեսանիցէ զքեզ՝ որ զգիտութիւնդ ունիս՝ բազմեա՛լ ի մեհենի, ոչ ապաքէն խիղճ մտաց նորա, որ տկարութեամբն զգածեալ է, անդրէն շինիցի ուտե՛լ զզոհեալն.

11. եւ կորնչիցի տկար եղբայրն ի քում գիտութեանն, վասն որոյ Քրիստոսն մեռաւ:

12. Եւ ա՛յսպէս յանցուցեալ յեղբարս, եւ զխիղճ մտաց տկարացն զայրացուցեալ, ի Քրիստո՛ս մեղանչէ:

13. Վասն որոյ եթէ կերակուր գայթագղեցուցանէ զեղբա՛յրն իմ, ո՛չ կերայց միս յաւիտեան, զի մի՛ զեղբայրն իմ գայթագղեցուցից: