1․ Մակաբէոս եւ որ ընդ նմա էին յաւգնականութենէ Տեառն զաւրացեալ, գերեդարձ առնէին քաղաքին եւ տաճարին:
2․ Եւ զբագինսն որ ի մէջ քաղաքին էին, որ յայլազգեացն արարեալ էր, եւ զտեղիս պաշտամանց քակէին.
3․ եւ զտաճարն սրբէին, եւ այլ սեղան շինէին սրբեալ զվէմսն հրով: Եւ դարձեալ ի նոցունց հուր առնուին, եւ մատուցանէին զողջակէզսն պատարագաց` յետ երկեամ ժամանակի. ճրագունս եւ խունկս, եւ զդնել զնուէրս հանապազորդս յաճախաց հացին:
4․ Եւ զայս իբրեւ արարին, անկեալ տարածեալ ի վերայ երեսաց իւրեանց զՏէր աղաչէին` զի այլ մի կրկնեսցին ի վերայ նոցա նոյն չարիք: Այլ թէպէտ եւ երբէք յանցանիցեն ինչ` ի ձեռն իւր հեզութեամբ խրատել, եւ մի ի ձեռն հայհոյիչ խուժադուժ հեթանոսաց մատնել զմեզ:
5․ Արդ յորում աւուր տաճարն ի ձեռս հեթանոսաց պղծեցաւ` դէպ եղեւ ի նմին աւուր ի նոյն ժամանակի զսրբութիւնն անդրէն նորոգել, ի քսաներորդի հինգերորդի ամսոյն որ անուանեալ կոչի Քասղեւ`
6․ ցնծութեամբ եւ ուրախութեամբ առնել զտաւն աւուրցն զութ աւր, ըստ բանի աւուրցն տաղաւարահարաց: Զի յուշ լիցի նոցա` որպէս յառաջ զտաւնս տաղաւարահարացն ի լերինս պաշտէին` յայրս եւ ի քարածերպս, զաւրէն երէոց խոտաճարակ շրջել:
7․ Վասն այսորիկ ոստս առեալ գեղեցիկս ի թաւ ծառոց, եւ ոստս արմաւու` այնմիկ որ աջողեաց նոցա սրբել զիւր տեղին:
8․ Հրաման տուաք ածել զաւուրս զայս ի տաւն տարեկանաց բարեկենդանութեան ցնծութեամբ եւ ուրախութեամբ` ի հասարակաց համարուէ ազգին եբրայեցւոց` ածել զայս տաւն տարեկանաց ի կարգի աւուրց իւրոց:
9․ Այլ վասն Անտիոքայ Երեւեալն անուանելոյ մահուանն` այսչափ բանք:
10․ Բայց վասն հաւրամոյն Անտիոքայ անաւրէն զաւակի, ցուցցուք համառաւտ որ ինչ անցք ընդ քաղաքսն անցանէին:
11․ Իբրեւ առ թագ Անտիոքոս, կացոյց ի վերայ իրացն արքունի կողմանցն Ստորին Ասորւոց եւ Տաճկաստանի զԼիւսիաս,
12․ եւ զՊտղոմէոս` որում բարձր անձնն ասէին: Զիրաւունս հաստատուն պահէր առ եբրայեցիս, վասն ուխտիցն եդելոց` եւ իրաւանցն զրկելոց` ջանայր խաղաղութեամբ անցանել:
13․ Վասն այսորիկ ամբաստան լինէին զնմանէ ընկերքն իւր առ Անտիոքոս. եւ մատնիչ կոչէին զնա յայն սակս, զի կողմանքն Կիպրացւոց ի ձեռն էին նորա ի Փիղովմիտովրայ հրամանէ. թող զնա եւ եկն առ Անտիոքոս. նա իբրեւ ոչ համբերէր նախատանացն, դեղս առ անձամբ իւրով եւ մեռաւ:
14․ Գորգիաս զաւրավար վայրացն զաւրաժողով լինէր եդովմայեցւովքն հանդերձ, հասանել հարկանել խուզել զամուր ամուր կողմանսն:
15․ Ընդելանէին ընդելուզանէին փախուցանել զնոսա յԵրուսաղէմէ, գունդ գործէին, մարտի պատրաստէին:
16․ Իսկ որ զմակաբէացւովքն էին` խնդրուածս առ Աստուած առնէին, աւգնական ի ձեռն կոչէին. զի ինքեանք կանխեսցեն հարկանել զամուրսն եդովմայեցւոց:
17․ Իբրեւ եկին հասին պատեցին, խումբ արարին, առհասարակ ի վերայ յարձակեցան, զամուրսն փլուցին, հարին կոտորեցին, զոր ի ձեռն առին առհասարակ սատակեցին:
18․ Էին ոմանք որ փախստեայ գնացին, եւ եկին ամրացան ի բերդս երկուս ամուրս: Եւ նոքա ընդ իւրեանս ունէին զամենայն կահ մենքենայից, շուրջ պահ եդին, եւ զմենքենայսն առ պարիսպսն կանգնեցին:
19․ Եւ Մակաբէոս եթող ի վերայ բերդին զՇիմոն, եւ զՅովսէպ, եւ զԶաքէ, եւ որ ընդ նոսա զաւրք էին` վասն բերդիցն պաշարման. եւ ինքն գնաց:
20․ Իսկ Շիմոնեանք որ զբերդաւն նստէին` ի պատգամս անկանէին, կաշառագնաց լինէին. առնուին յամրականաց անտի եւթն բեւր սատեր կրկին արծաթոյ, եւ թոյլ տային նոցա ելանել սփռել յամրոցաց անտի:
21․ Իբրեւ ազդ եղեւ Մակաբեայ վասն իրացն որ եղեն, ժողովէր զիշխանսն ամենայն, ամբաստան լինէր, յայտ առնէր` զի արծաթոյ վաճառեցին զեղբարսն, եւ արձակեցին զթշնամիսն:
22․ Զայնոսիկ որ այնպէս մատն եղեն աւրինացն, ածին սատակեցին զնոսա. եւ ինքեանք ի բերդն արշաւեցին.
23․ Հասին պատեցին պաշարեցին, զի յաջողումն ի ձեռն նորա լինէր. եւ յայնմ աւուր կոտորեցին աւելի քան զքսան հազար:
24․ Եւ Տիմոթէոս որ յառաջ ի պարտութիւն մատնեցաւ ի ձեռաց հեբրայեցւոցն. դարձեալ զուարթանայր, դարձեալ զաւրաժողով լինէր յաւտարակողմն կուսաց. բազում զայրուձի զասիացւոցն կուտեալ, ի մտի եդեալ` գայր ի տէգս նիզակաց վարել ի գերութիւն զերկիրն Հրէաստանի:
25․ Իսկ որ զմակաբայեցւովքն էին` ընդ մերձենալ նոցա ի խնդրուածս պնդէին առ Աստուած. հող ի գլուխ քրձազգած լինէին.
26․ առաջի սեղանոյն անկեալ զաշտիճանաւքն թաւալէին. խնդրէին յայսմ հետէ հաշտ լինել ընդ նոսա, վանել զթշնամիս նոցա. հակառակ կալ ընդ հակառակորդս նոցա. եւ զամենայն աղաւթս որպէս աւրէնքն հրամայէին` աղաչէին:
27․ Իբրեւ զաղաւթսն կատարեցին` առհասարակ ի զէն դարձան, վառեցան կազմեցան պատրաստեցան, հարուստ մի ըստ քաղաքն արտաքս ելին. իբրեւ մերձ եղեն ի գունդն թշնամեաց, կարգեցան կազմեցան աւրինաւք ճակատեցան:
28․ Այն ինչ վարդագոյն ծայրակարմիր արեգակն ընդ երկիր ծաւալել կամէր, եւ նոքա կողմանքն երկոքին ընդ միմեանս խառնէին. կիսոցն` աւր բարենշան` զուարթութեամբ պատրաստեալ, զյաղթութիւն զուարճացեալ մատուցանէր. զի փառքն զաւրութեանց յերկնից աւգնականութեան Տեառն իւրեանց լուսով իջեալ շուրջանակի պատեալ հաստատեալ պահէին: Կիսոցն սրտմտութիւն բարկութեան ըստ հպարտութեան զաւրավարացն ածեալ պնդեալ շտապ տագնապի ի տեղին հասուցանէին:
29․ Այն ինչ լինէր նորա զանաչառ զանողորմ ձեռն պատերազմի ի գործ արկանել. եւ երեւեցան յերկնից արք հինգ հեծեալ սպառազէն վառեալ ի զէն ոսկի` եւ ի զարդ ոսկի, որ եկին իջին առ գնդաւն թշնամեացն. գային խառնէին ի գունդ եբրայեցւոց:
30․ Որք ի մէջ առեալ զՅուդա Մակաբէ, յառաջ խաղային իւրեանց զինուքն ծածուկ վառեալ, առաւել յառաջ տանէին քան իւրով զինուն. զի յամենայն կողմանց նետք եւ տէգք որ գային ի վերայ` առհասարակ ի բաց թաւթափէին. եւ ինքեանք իւրեանց նետիւք լի բարկութեամբ զաչս թշնամեացն` բուռն դէպ կալեալ առհասարակ ի կուրութիւն դարձուցանէին. եւ խռովեալ զաւրքն թշնամեացն ընդ միմեանս խառնէին:
31․ Յայնժամ յայնմ աւուր անկեալ գտանէր ի գնդէ անտի թշնամեացն առաջի նոցա քսան հազար եւ հինգ հարիւր սպառազէն:
32․ Եւ ինքն Տիմոթէոս պրծեալ ընդ ամբոխն ի փախուստ դառնայր. եկն անկաւ ի Գազարա քաղաք մի ամուր, ուր ինքնին Քերէաս զաւրագլուխ էր:
33․ Եւ Մակաբէ զաւրաւքն եկն փակեաց պաշարեաց զամուրն ի չորս աւուրս:
34․ Իսկ այն որ ի ներքս անդ էին, յամրութիւն քաղաքին յուսացեալ էին, այպն կատակ լինէին եբրայեցւոցն. եւ բանս կսկծելիս թշնամանաց առ իւրեանց չարի ի նոսա արձակէին:
35․ Իբրեւ աւրն հինգաւրեայ շաբաթուց լուսանալ կամէր, արք ընտիրք քսան ի գնդէ անտի եբրայեցւոցն` Մակաբէիւ հանդերձ` լի նախանձու բարկութեամբ զէնս առեալ ընդ դուռն քաղաքին ի ներքս յարձակեցան քաջութեամբ գազանաբար: Զորս առ դրանն գտին առ ոտս իւրեանց կոտորեցին:
36․ Եւ զաւրքն առհասարակ շուրջ զպարսպաւքն յարձակեցան. եւ զայն աղմուկ եւ զաղաղակ ի վերայ քաղաքին հասուցանէին, զի որ զաւրք պարսպապահ ի վեր անդ կային, որ ի ներքս` որ արտաքս` քան զտեղ քան զտարափ թանձր եւ արագ վերուստ ի վայր թաւթափէին. եւ ինքեանք առհասարակ ի ներքս անկանէին. զաշտարակս բերդին եւ զամենայն փայտակերտ քաղաքին հրձիգ առնէին. զդրունսն այրէին եւ զմենքենայսն. եւ զամենայն երեւելի եւ երեւելի գործի` ի բաց ապականէին: Ապա խարոյկս ի մէջ քաղաքին արկանէին, եւ զհայհոյիչ թշնամանաւղսն ի նմա այրէին:
37․ Եւ զամենայն զինչս եւ զստացուածս եւ զաւրէնս եւ զկարգս քաղաքին, զայն ի ձեռն առնուին. մինչչեւ զՏիմոթէոս եկին գտին փախուցեալ թաքուցեալ ի գբի միոջ. զնա եւ զՔերէոս եղբայր նորա, եւ զԱպողոփանէս ի նոյն գուբ փողոտեցին:
38․ Զայս ամենայն իբրեւ գործեցին կազմեցին` աւրհնութեամբ ցնծութեամբ գոհութեամբ ուրախութեամբ աւրհնէին զՏէր, որ մեծաւ քաջութեամբ քաջ անուամբ զյաղթութիւն պատրաստեաց ի ձեռն Իսրայէլի:
Հաղորդում կայքում սխալի վերաբերյալ
Տվյալ հատվածում առկա է սխալ: