1. Այսպէս ասէ Տէր. ու՞ր է թուղթն ապահարզանի որով արձակեցի զմայրն ձեր. կամ ու՞ր է գրաւական վաճառականացն, որով վաճառեցի զձեզ: այլ ի մեղս ձեր վաճառեցայք. եւ վասն անաւրէնութեանց ձերոց արձակեցի զմայրն ձեր:
2. Զի եկի, եւ ոչ գոյր մարդ. կոչեցի` եւ ոչ ոք էր որ լսէր: միթէ ո՞չ կարէ փրկել ձեռն իմ. կամ ո՞չ զաւրեմ ապրեցուցանել: ահա կշտամբութեամբ իմով աւերեցի զծով, եւ զգետս ապականեցից. եւ ցամաքեսցին ձկունք նոցա ի ջուրցն պակասութենէ. եւ մեռցին ի ծարաւոյ:
3. զգեցուցից զերկինս խաւարաւ, եւ իբրեւ զքուրձ արարից զհանդերձ նորա:
4. Տէր Տէր տայ ինձ լեզու խրատու, զի գիտացից խաւսել ի ժամու զբանն: պատրաստեաց զիս ընդ առաւաւտս: յաւել ինձ ունկն ի լսել:
5. եւ խրատ Տեառն բանայ զականջս իմ: եւ ես ոչ խստանամ եւ ոչ ընդդէմ դառնամ:
6. Զթիկունս իմ ետու ի հարուածս, եւ զծնաւտս իմ յապտակս. եւ զերեսս իմ ոչ դարձուցի յամաւթոյ ընդ երեսս թքանելոյ:
7. Եւ Տէր Տէր եղեւ իմ աւգնական. վասն այնորիկ ոչ ամաչեցի, այլ արարի զդէմս իմ իբրեւ զվէմ հաստատուն: Եւ գիտացի թէ ոչ ամաչեցից:
8. զի մերձ է որ արդարացուցանէ զիս: ո՞վ է ոսոխն իմ, եկեսցէ եւ կացցէ ի մէջ. եւ ո՞վ է որ դատին զիս, մերձեսցի առ իս:
9. զի ահաւասիկ Տէր Տէր աւգնական է ինձ, ո՞վ է որ չարչարիցէն զիս: Ահաւադիկ դուք ամենեքեան իբրեւ զձորձս հնասջիք, եւ ցեց մեցամէս կերիցէ զձեզ:
10. Ո՞վ իցէ ի մէնջ որ երկնչի ի Տեառնէ, լուիցէ զձայն ծառայի նորա. որ գնային ընդ խաւար` եւ ոչ գոյր նոցա լոյս. յուսացեալք յանուն Տեառն եւ խրախուսեալք յԱստուած:
11. Ահաւադիկ դուք ամենեքեան հուրբ վառեալ պարտեսջիք իբրեւ ի բոցոյ. գնասջիք ի լոյս հրոյ ձերոյ, եւ բորբոքեսջիք բոցով: վասն իմ եղեւ ձեզ այդ, եւ ի տրտմութեան ննջեսջիք:
Հաղորդում կայքում սխալի վերաբերյալ
Տվյալ հատվածում առկա է սխալ: