1․ Գոչեա զաւրութեամբ, եւ մի խնայեար. բարձրացո իբրեւ զփողոյ զբարբառ քո. պատմեա ժողովրդեան իմում զմեղս նոցա, եւ տանն Յակովբայ զանաւրէնութիւնս նոցա:
2․ Զիս աւր ըստ աւրէ խնդրեն` եւ ճանաչել զճանապարհս իմ ցանկան, իբրեւ ժողովրդեան որոյ զարդարութիւն գործեալ իցէ, եւ զիրաւունս Աստուծոյ իւրոյ չիցէ թողեալ. արդ եկեալ խնդրեն զիրաւունս արդարութեան: Կարաւտին մերձենալ առ Աստուած,
3․ եւ ասեն. զի՞ է զի պահեցաք մեք` եւ դու ոչ տեսեր. խոնարհեցուցաք զանձինս մեր` եւ դու ոչ գիտացեր: Զի յաւուրս պահոց ձերոց գտանին կամք ձեր կատարեալ. եւ կսկծեցուցանէք զամենեսեան որ ընդ ձեռամբ ձերով են:
4․ Ի հակառակութիւնս եւ ի կռիւս պահէք, եւ կռփէք զանաւագն. իսկ զի՞նչ պիտոյ է ինձ այնպիսւոյ աւուր պահք. գալ բողոքել ձեր առ իս, եւ ինձ ոչ լսել ձեզ:
5․ ոչ զայդպիսի պահս ընտրեցի, եւ ոչ զաւրն յորում կարկամեցուցանէ մարդ զանձն իւր: Զի եթէ կորացուսցես իբրեւ զանուր զպարանոց քո, եւ քուրձ եւ մոխիր ի ներքոյ տարածանիցես. սակայն եւ ոչ զայն կոչեցի պահս` եւ աւր ընդունելի:
6․ ոչ զայնպիսի պահս ընտրեցի` ասէ Տէր: Այլ լոյծ զկնճիռն անիրաւութեան. քակեա զխարդախութիւն բռնութեան վաճառաց քոց: արձակեա զնեղեալս թողութեամբ, եւ զամենայն մուրհակս անիրաւութեան պատառեա:
7․ Բրդեա քաղցելոց զհաց քո, եւ զաղքատս անյարկս տար ի տուն քո. եթէ տեսանիցես զմերկս` զգեցուցանիջիր, եւ յընտանեաց զաւակի քոյ` զակն մի արկանիցես:
8․ Յայնժամ ծաւալեսցի կանուխ լոյս քո, եւ բժշկութիւն քեզ վաղվաղակի հասցէ. եւ գնասցէ առաջի քո արդարութիւն քո, եւ փառքն Աստուծոյ զքեւ փակեսցին:
9․ Յայնժամ կարդասցես, եւ Աստուած լուիցէ քեզ. եւ մինչդեռ խաւսիցիս, ասասցէ թէ ահաւասիկ հասեալ կամ: Եւ եթէ մերժեսցես դու ի քէն զկնճիռն եւ զձեռն արձակութիւն` եւ զբանս տրտնջման.
10․ եւ տացես քաղցելոց զհաց քո սրտի մտաւք, եւ զանձինս կարաւտեալս յագեցուսցես: Յայնժամ ծագեսցէ ի խաւարի լոյս քո, եւ խաւարն քո իբրեւ զմիջաւրեայ:
11․ եւ եղիցի Աստուած քո ընդ քեզ յամենայն ժամ. եւ լցցի ըստ ցանկութեան անձին քո, եւ ոսկերք քո պարարեսցին. եւ եղիցես իբրեւ զպարտէզ ջրալից, եւ իբրեւ զաղբեւր ուստի ջուր ոչ պակասեսցէ:
12․ Եւ շինեսցին աւերակք քո յաւիտենից, եւ եղիցին հիմունք քո մշտնջենաւորք ազգաց յազգս. կանգնեսջիր եւ կոչեսջիր խրամակարկատ ցանգոյ. եւ զընդմիջնաշաւիղս նոցա դադարեցուսցես:
13․ Եթէ դարձուսցես զոտն քո չառնել զկամս քո յաւուրն սրբութեան. եւ կոչեսցեն զշաբաթսն փափուկս նուիրեալս Աստուծոյ, եւ փառաւորեալս: եւ ոչ փոխեսցես զոտն քո ի գործ, եւ ոչ խաւսեսցիս բան ինչ բարկութեան բերանով քով.
14․ եւ եղիցես յուսացեալ ի Տէր: Եւ տարցի զքեզ ի բարութիւնս երկրին, եւ ջամբեսցէ քեզ զժառանգութիւն Յակովբայ հաւր քոյ. զի բերան Տեառն խաւսեցաւ զայս:
Հաղորդում կայքում սխալի վերաբերյալ
Տվյալ հատվածում առկա է սխալ: