1. Մի թէ ո՞չ իցէ կարաւղ ձեռն Տեառն փրկել. կամ ծանրացոյց ինչ զունկն իւր` զի մի՞ լուիցէ:
2. այլ մեղք ձեր որոշեն ի մէջ ձեր` եւ ի մէջ Աստուծոյ: եւ վասն անաւրէնութեանց ձերոց դարձոյց զերեսս իւր ի ձէնջ` զի մի ողորմեսցի:
3. Զի ձեռք ձեր պղծեալ են արեամբ. եւ մատունք ձեր ի մեղս: շրթունք ձեր խաւսեցան զանաւրէնութիւն, եւ լեզուք ձեր խոկան զանիրաւութիւն:
4. Չիք ոք որ խաւսի զարդարութիւն, եւ ոչ գոն իրաւունք ճշմարտութեան: Յուսացեալ են ի սնոտիս, եւ խաւսին զունայնութիւն. զի յղանան զցաւս, եւ ծնանին զանաւրէնութիւն:
5. Զձուս քարբից ծակեցին, եւ զոստայնս սարդից անկանէին. եւ որ կամիցի ուտել ի նոցանէն, ծակեաց բաց` եւ եգիտ ջուր, եւ ի նմին քարբ:
6. Ոստայնք նոցա ոչ ձորձեսցին, եւ ոչ զգեցցին ի գործոց ձեռաց իւրեանց. քանզի գործք նոցա գործք անաւրէնութեան են, եւ գործք անաւրէնութեան ի ձեռս նոցա:
7. Ոտք նոցա ի չարիս ընթանան, վաղվաղեն հեղուլ զարիւն անպարտ: խորհուրդք նոցա` խորհուրդք անզգամաց. բեկումն եւ թշուառութիւն ի ճանապարհս նոցա:
8. Եւ զճանապարհս խաղաղութեան ոչ ծանեան, եւ ոչ գոն իրաւունք ի ճանապարհս նոցա. զի շաւիղք նոցա ընդ որ գնան խոտորեալք են, եւ ոչ ծանեան զխաղաղութիւն:
9. Վասն այնորիկ հեռացան ի նոցանէ իրաւունք, եւ մի հասցէ առ նոսա արդարութիւն: մինչդեռ ակն ունէին լուսոյ` եղեւ նոցա խաւար. եւ մինչդեռ սպասէին նմա, ընդ մութ շրջեցան:
10. Շօշափեսցեն զորմս իբրեւ կոյրք, եւ իբրեւ զաչացու խարխափեսցեն: եւ գլորեսցին ի միջաւրէի իբրեւ ի հասարակ գիշերի: եւ իբրեւ աւրհասականք ընդ ոգիս ջանայցեն:
11. Եւ իբրեւ զարջ եւ իբրեւ զաղաւնիս առհասարակ սահեսցին: Կացաք մնացաք իրաւանց` եւ ոչ էր. փրկութեան` եւ հեռացաւ ի մէնջ:
12. Զի բազում են անաւրէնութիւնք մեր առաջի քո, եւ մեղք մեր հակառակ կացին մեզ. զի անաւրէնութիւնք մեր ի մեզ են, եւ զանիրաւութիւնս մեր` մեք մեզէն գիտեմք:
13. Ամպարշտեցաք եւ ստեցաք Տեառն, եւ դարձաք յետս յԱստուծոյ մերմէ: խաւսեցաք զանիրաւութիւն` եւ հեստեցաք: յղացաք` եւ որոճացաք ի սիրտս մեր զբանս անիրաւութեան:
14. Յետս հարաք զիրաւունս, եւ արդարութիւն հեռացաւ ի մէնջ: Զի սպառեցաւ ի ճանապարհաց նոցա ճշմարտութիւն, եւ ընդ ուղորդն ոչ կարացին գնալ:
15. Եւ արդարութիւն բարձաւ ի նոցանէ. մերժեցին զսիրտս իւրեանց յիմանալոյ: Ետես Տէր` եւ ոչ հաճեցաւ, զի ոչ գոյին իրաւունք:
16. Հայեցաւ` եւ ոչ գոյր մարդ. ետես` եւ ոչ գոյր որ աւգնական լինէր: եւ հատոյց նոցա բազկաւ իւրով, եւ ըստ ողորմութեան իւրում հաստատեաց:
17. Եւ զգեցաւ իբրեւ զրահս զարդարութիւն. եւ եդ ի գլուխ իւր իբրեւ զսաղաւարտ զփրկութիւն, եւ արկաւ զիւրեւ հանդերձ եւ պատմուճան վրէժխնդրութեան` հատուցանել զհատուցումն.
18. եւ նախատինս հակառակորդաց եւ կղզեաց հատուսցէ զհատուցումն:
19. Եւ երկիցեն յարեւմուտս յանուանէ Տեառն, եւ յարեւելս ի փառաւորեալ անուանէ նորա: զի եկեսցէ իբրեւ զգետ բռնութեամբ բարկութիւն ի Տեառնէ. հասցէ սրտմտութեամբ:
20. Եկեսցէ ի Սիովնէ փրկիչ, եւ դարձուսցէ զամպարշտութիւնս Յակովբայ` ասէ Տէր:
21. Եւ այս նոցա որ յինէն ուխտ` ասէ Տէր: հոգին իմ որ է ի քեզ, եւ բանք զոր ետու ի բերան քո, մի պակասեսցէ ի բերանոյ քումմէ, եւ ի բերանոյ զաւակի քոյ. եւ ի բերանոյ զաւակէ զաւակի քոյ` ասէ Տէր, յայսմհետէ մինչչեւ յաւիտեան:
Հաղորդում կայքում սխալի վերաբերյալ
Տվյալ հատվածում առկա է սխալ: