1․ Եւ ասէ Սամուէլ ցՍաւուղ. Զիս առաքեաց Տէր աւծանել զքեզ ի թագաւոր ի վերայ ժողովրդեան իւրոյ Իսրայէլի. եւ արդ` լուր ձայնի պատգամաց Տեառն:
2․ Այսպէս ասէ Տէր զաւրութեանց. Արդ` խնդրեցից զվրէժ, զոր արար Ամաղէկ ընդ Իսրայէլի. զիա՞րդ պատահեաց նմա ի ճանապարհի ելանելոյ նորա յԵգիպտոսէ:
3․ Եւ արդ` երթ եւ հարցես զԱմաղէկ, եւ զՅարիմ. եւ զամենայն որ ինչ նորա իցէ. եւ մի ապրեցուցանիցես ի նոցանէ, եւ սատակեսցես զնա. եւ կորուսցես յառնէ մինչչեւ ցկին, եւ ի տղայոյ մինչչեւ ցստնդիացն, եւ յարջառոյ մինչչեւ ցոչխար, եւ յուղտուէ մինչչեւ ցէշ:
4․ Եւ հրաման ետ Սաւուղ ժողովրդեանն, եւ հանդէս արար նոցա Յաղիմ, չորեք հարեւր հազար դասականաց, եւ երեսուն հազարաց դասականաց Յուդայ:
5․ եւ եկն Սաւուղ մինչչեւ ցքաղաքս Ամաղեկայ. Եւ դարանամուտ եղեն ի հեղեղատին:
6․ Եւ ասէ Սաւուղ ցկինեցին. Երթ խոյս տուր ի միջոյ ամաղեկացւոցն, զի մի սատակեցից զքեզ ընդ նմա. եւ դու արարեր ողորմութիւն ընդ ամենայն որդիսն Իսրայէլի յելանելն նոցա յԵգիպտոսէ: եւ խոյս ետ կինեցին ի միջոյ Ամաղեկայ:
7․ Եւ եհար Սաւուղ զԱմաղէկ Յեւիլա մինչչեւ ի Սուր, որ է հանդէպ Եգիպտոսի:
8․ եւ կալաւ զթագաւորն Ամաղեկայ զԱգագ կենդանւոյն: եւ զամենայն ազգն Յարիմայ կոտորեցին սրով սուսերի:
9․ Եւ ապրեցոյց Սաւուղ եւ ամենայն ժողովուրդն զԱգագ կենդանի: եւ զընտիրս խաշանց, եւ զանդւոց, եւ զկերակրոց, եւ զայգեաց, եւ զամենայն բարութեանց, եւ ոչ կամեցաւ սատակել զնոսա. եւ զամենայն գործ զանարգ եւ զարհամարհեալ սատակեցին:
10․ Եւ եղեւ բան Տեառն առ Սամուէլ` եւ ասէ.
11․ Զղջացեալ եմ, զի թագաւորեցուցի զՍաւուղ ի թագաւոր. զի դարձաւ յինէն յետս, եւ զբանս իմ ոչ պահեաց: եւ տրտմեցաւ Սամուէլ: Եւ գոչեաց Սամուէլ առ Տէր զգիշերն ամենայն:
12․ եւ կանխեաց Սամուէլ` եւ գնաց ընդ առաջ Իսրայէլի, ընդ առաւաւտն: Եւ ազդ եղեւ Սամուելի` եւ ասեն. Եկն Սաւուղ ի Կարմելոս եւ կանգնեաց իւր ձեռն, եւ դարձոյց զկառսն եւ էջ ի Գաղգաղա: եւ եկն Սամուէլ առ Սաւուղ. եւ ահա նա մատուցանէր ողջակէզս Տեառն զառաջինս աւարոյն զոր ած յԱմաղեկայ:
13․ Եւ եկն Սամուէլ առ Սաւուղ, եւ ասէ ցնա Սաւուղ. Աւրհնեալ դու ի Տեառնէ. կացուցի զոր ինչ խաւսեցաւ Տէր:
14․ Եւ ասէ Սամուէլ. Եւ զի՞նչ է բարբառ հաւտիցդ այդոցիկ յականջս իմ, եւ բարբառ արջառոցդ զոր ես լսեմ:
15․ Եւ ասէ Սաւուղ. ՅԱմաղեկայ ածի զայդ` զոր ապրեցոյց ժողովուրդդ, զընտիրս խաշանց եւ զարջառոց. զի զոհեսցեն տեառն Աստուծոյ քում. եւ զայլսն սատակեցի:
16․ Եւ ասէ Սամուէլ ցՍաւուղ. Անսա եւ պատմեցից քեզ զոր խաւսեցաւ Տէր ընդ իս յայսմ գիշերի: եւ ասէ ցնա. Խաւսեաց:
17․ Եւ ասէ Սամուէլ ցՍաւուղ. Ո՞չ ապաքէն փոքր ես դու առաջի նորա զաւրավար գաւազանի ցեղին Իսրայէլի. եւ աւծ զքեզ Տէր` թագաւոր ի վերայ Իսրայէլի:
18․ եւ առաքեաց զքեզ Տէր ի ճանապարհ, եւ ասէ ցքեզ. Երթ եւ սատակեա զմեղանչականն յիս զԱմաղէկ. եւ տացես ընդ նոսա պատերազմ մինչչեւ վախճանեսցես զնոսա:
19․ եւ ընդէ՞ր ոչ լուար ձայնի Տեառն, այլ յարձակեցար դիմել ի վերայ աւարիդ. եւ արարեր չար առաջի Տեառն:
20․ Եւ ասէ Սաւուղ ցՍամուէլ. Վասն լսելոյ իմոյ ձայնի ժողովրդեանն. եւ չոգայ ի ճանապարհն զոր առաքեաց զիս Տէր. եւ ածի զԱգագ արքայ Ամաղեկայ, եւ զԱմաղէկ սատակեցի:
21․ եւ առ ժողովուրդս յաւարէ անտի հաւտս եւ անդեայս զընտիրս սատակմանն առաջի Աստուծոյ զոհել ի Գաղգաղա:
22․ Եւ ասէ Սամուէլ. Եթէ հաճո՞յ իցէ Տեառն ողջակէզ եւ զոհ իբրեւ զլսել ձայնի Տեառն. ահա լաւ է ունկնդրութիւն քան զզոհ ընտիր, եւ հնազանդութիւն քան զճարպ խոյոց:
23․ Զի հմայք մեղք են, եւ ցաւս եւ աշխատութիւնս ածէ թերափդ ի վերայ: զի արհամարհեցեր զբան Տեառն, արհամարհեսցէ զքեզ Տէր` չլինել թագաւոր ի վերայ Իսրայէլի:
24․ Եւ ասէ Սաւուղ ցՍամուէլ. Մեղայ զի անցի զբանիւ Տեառն, եւ զբանիւ քով. զի երկեայ ի ժողովրդենէն եւ լուայ ձայնի նոցա:
25․ եւ արդ` բարձ զմեղս իմ, եւ դարձիր ընդ իս, եւ պագից երկիր տեառն Աստուծոյ քում:
26․ Եւ ասէ Սամուէլ ցՍաւուղ. Ոչ դարձայց ընդ քեզ, զի արհամարհեցեր զբանն Տեառն. եւ արհամարհեսցէ զքեզ Տէր չլինել թագաւոր ի վերայ Իսրայէլի:
27․ եւ դարձոյց Սամուէլ զերեսս իւր ի գնալ. եւ բուռն եհար Սաւուղ զտտնոյ կրկնոցի նորա եւ պատառեաց զնա:
28․ Եւ ասէ ցնա Սամուէլ. Պատառեաց Տէր զթագաւորութիւնդ ի ձեռաց քոց յԻսրայէլէ այսաւր, եւ տացէ զդա ընկերի քում լաւագունի քան զքեզ:
29․ եւ բաժանեսցի Իսրայէլ ընդ երկու. եւ ոչ դարձցի, եւ ոչ զղջասցի Տէր. զի ոչ եթէ իբրեւ զմարդ է ի զղջանալ. ինքնին սպառնասցի:
30․ Եւ ասէ Սաւուղ. Մեղայ. այլ մեծարեա զիս առաջի ծերոց ժողովրդեան իմոյ, եւ առաջի Իսրայէլի. եւ դարձիր ընդ իս, եւ երկիր պագից տեառն Աստուծոյ քում:
31․ Եւ դարձաւ Սամուէլ զկնի Սաւուղայ, եւ երկիր եպագ Տեառն:
32․ եւ ասէ Սամուէլ. Մատուցէք առ իս Զագագ թագաւորն Ամաղեկայ. եւ մատեաւ առ նա Ագագ դողալով. եւ ասէ Ագագ. Եթէ այսպէս դառն իցէ մահ:
33․ Եւ ասէ Սամուէլ ցԱգագ. Զոր աւրինակ որդեկոտոր արար սուր քո զկանայս, նոյնպէս որդեկոտոր լիցի ի կանանց մայր քո: եւ սպան Սամուէլ զԱգագ առաջի Տեառն ի Գաղգաղա:
34․ Եւ գնաց Սամուէլ յԱրիմաթեմ, եւ Սաւուղ ել ի տուն իւր ի Գաբաա:
35․ եւ ոչ եւս յաւել Սամուէլ տեսանել զՍաւուղ մինչչեւ յաւր մահուան իւրոյ. զի սուգ ունէր Սամուէլ ի վերայ Սաւուղայ: Եւ զղջացաւ Տէր զի թագաւորեցոյց զՍաւուղ ի վերայ Իսրայէլի
Հաղորդում կայքում սխալի վերաբերյալ
Տվյալ հատվածում առկա է սխալ: